Musuh-musuh Jesus la banci njebak ia. Emaka la banci iserahken kalak e Jesus man kalak Roma. (Lukas 20:20) Gundari tanggal 11 Nisan, Jesus sangana bas rumah pertoton. Ipebetehkenna atena man peminpin agama ise kin situhuna ia. Nina Jesus, “Uga pendapat kena kerna Kristus? Anak ise ia?” (Matius 22:42) Iteh kalak Jahudi maka Kristus ntah pe Mesias rehna i bas kesusuren Daud nari. Emaka, e me jawapen peminpin agama sanga isungkun Jesus.​—Matius 9:​27; 12:23; Johanes 7:​42.

Tapi nungkun ka Jesus, “Adi bage, ngkai maka igelari Daud ia Tuan? Sebap Daud si ipengaruhi kesah si badia ngataken, ‘Nina Jahwe man Tuanku, “Kundullah arah kananKu seh asa Kutamaken musuh-musuhndu i teruh nahendu”’? Adi igelari Daud ia Tuan, uga maka ia anakna?”​—Matius 22:​43-​45.

Iakap kalak Parisi maka Mesias e kesusuren Daud si mbebasken kalak e arah kuasa kalak Roma. Tapi alu nggunaken kata-kata Daud i bas Masmur 110:​1, 2, ibuktiken Jesus maka Mesias e labo manusia biasa si jadi penguasa. Daud saja pe ngelebuh ia Tuan, janah kundul pagi ia i sebelah kanan Dibata guna merentah. Sinik kalak Parisi megi jawapen Jesus.

Murid-murid Jesus ras kalak si deban megi kerna si e. Gundari ipersingeti Jesus kalak e kerna ahli Undang-Undang Musa ras kalak Parisi. Tek kalak e “maka kai si iajarkenna seri ras kai si iajarken Musa.” Nina Jesus man kalak si megiken ia, “Lakokenlah kerina si ikatakenna man kena tapi ula ikutken perbahanenna, sebap la ilakokenna kai si ikatakenna.”​—Matius 23:​2, 3.

Jenari ibereken Jesus bukti maka ahli Undang-Undang Musa ras kalak Parisi e munapik, nina, “Ipegalangna kotak-kotak si isina ayat si ipakena guna njaga ia.” Lit piga-piga kalak Jahudi si namaken kotak-kotak si kitik si isina ayat-ayat arah Undang-Undang Musa i bas perdempaken ras tanna. Tapi galangen kotak si ipake kalak Parisi, atena gelah idah kalak maka patuh kel kalak e man Undang-Undang Musa. Selain si e, “ipegedangna rumbai uisna.” Kalak Israel memang isuruh erban rumbai bas ujung uisna, tapi ipegedang kalak Parisi rumbai uisna. (Bilangen 15:​38-​40) Kerina enda ilakoken kalak e “gelah idah kalak.”​—Matius 23:5.

Murid-murid Jesus pe banci terpengaruh jadi sombong. Emaka inasehati Jesus kalak e, “Tapi kena ula ilebuh Guru, sebap sada Guru kena, janah kerina kena ersenina. Selain si e, ula ise pe ilebuh kena Bapak i doni, sebap sada Bapak kena eme si i surga. Janah, ise pe ula lebuh kena peminpin, sebap sada Peminpin kena, eme Kristus.” Adi bage, uga arusna perukuren ras perbahanen kalak e? Nina Jesus, “Ise si mbelinna i bas kena arus jadi pelayan kena. Ise pe si ipeganjangna bana ipeteruk me, janah ise pe si ipeterukna bana ipeganjang me.”​—Matius 23:​8-​12

Dung e, ikataken Jesus man ahli Undang-Undang Musa ras kalak Parisi, “Cilaka kel kena, o ahli Undang-Undang Musa ras kalak Parisi, kalak si munapik! Erkiteken itutup kena Kerajan surga i lebe-lebe kalak. Kena sendiri la masuk ku bas janah kalak si atena masuk la ipediat kena.”​—Matius 23:13.

Irawai Jesus kalak Parisi perban la diate kalak e kai si penting menurut Jahwe. Si ilakoken kalak Parisi eme erban melala peraturen si la masuk akal. Contohna, nina kalak e, “Adi kalak ersumpah i bas gelar rumah pertoton, la lit ertina. Tapi adi kalak ersumpah i bas gelar emas si lit bas rumah pertoton, arus itepatina.” Pentingen akap kalak e emas bas rumah pertoton asangken rumah pertoton e. Padahal rumah pertoton e eme ingan guna nembah Jahwe. ‘La iperdiateken kalak e kai si pentingen i bas Undang-Undang eme keadilen, perkuah ate, ras kesetian.’​—Matius 23:​16, 23; Lukas 11:42.

Igelari Jesus kalak Parisi e ‘penegu-negu si pentang, agas iaguina tapi unta ibendutna!’ (Matius 23:24) Iagui kalak e agas arah inemenna nari perban menurut Undang-Undang Musa agas e najis. Tapi la diate kalak e kai si lebih penting i bas Undang-Undang Musa. Kalak e bagi mbendut unta, binatang si najis kang tapi galangen asangken agas.​—Imamat 11:​4, 21-​24.