Sanga Petrus mersoken Jesus, wari nggo nandangi terang. Kenca dung persidangen e sirang me kerina anggota Pengadilen Agama Jahudi e. Situhuna keputusen si iban kalak e berngi nderbih labo sah. Emaka pulung ka kalak e i bas wari Jumat erpagi-pagi, gelah sah keputusen kalak e janah jelma si nterem pe la curiga. Ibaba me Jesus masuk.

Ning kalak e ka, “Kam kin Kristus e? Kataken dage man kami.” Ijawap Jesus, “Aminna pe kukataken man kena, labo kari kena tek. Janah adi kusungkun kena, labo kari jawap kena.” Pang kel Jesus ngatakenca maka ia me kalak si ikataken i Daniel 7:​13. Nina, “Mulai gundari nari kundul me Anak manusia arah kanan Dibata si erkuasa.”​—Lukas 22:​67-​69; Matius 26:63.

Isungkun kalak e ka, “Adi bage, Anak Dibata kin kam?” Ijawap Jesus, “Kena sendiri si ngatakenca aku Anak Dibata.” Jawapen Jesus enda erban tetap ukur kalak maka nggo ihina Jesus Dibata janah patut iukum mate. Nina kalak e, “Kita lanai perlu saksi!” (Lukas 22:​70, 71; Markus 14:64) Emaka iket kalak e Jesus janah ibabana ku Gubernur Roma eme Pontius Pilatus.

Banci saja idah Judas Iskariot Jesus ibaba ku Pilatus. Sanga iteh Judas maka Jesus iukum mate, erkadiola janah sedih kel ia. Tapi la ia tutus ertobat, iulihkenna 30 sen logam e man imam-imam kepala. Janah nina man kalak e, “Enggo erdosa aku perban kuhianati dareh kalak si la ersalah e.” Tapi la diate kalak e Judas. Ning kalak e ngaloi, “Kai ka kin urusenna ras kami? Ena urusenndu!”​—Matius 27:4.

Ibenterken Judas 30 sen logam pirak e ku rumah pertoton jenari itambahina ka dosana alu bunuh diri. Sanga igantungna bana, penggel dahan batang kayu inganna ngiket nali e. Emaka ndabuh me ia ku batu-batu janah merigat beltekna.​—Perbahanen Rasul-Rasul 1:​17, 18.

Pagi-pagi denga kel sanga Jesus ibaba ku istana Pilatus. Kalak Jahudi si maba Jesus la nggit masuk. Menurut kalak e, adi masuk kalak e ku ingan kalak si labo Jahudi kalak e jadi najis. E erbanca la banci ipan kalak e pangan i bas tanggal 15 Nisan, eme wari si pertama i bas Perayan Roti si La Itama Ragi, si ianggap nggo jadi bagin i bas perayan Paskah.

Ndarat me Pilatus janah isungkunna kalak e, “Kai kin tuduhen kena man dilaki enda?” Ijawap kalak e, “Labo iserahken kami dilaki enda man bandu adi la lit salahna.” Banci saja iteh Pilatus maka ate kalak e gelah iukumna Jesus, emaka nina, “Kena sajalah si maba ia janah adililah ia menurut undang-undang kena.” Ijawap kalak e, “La kap lit hak kami guna munuh ise pe.” (Johanes 18:​29-​31) Jawapen kalak Jahudi e mbuktiken maka ate kalak e gelah Jesus iukum mate.

Adi ibunuh kalak e Jesus sanga perayan Paskah, jelma si nterem banci kari guntar. Tapi adi kalak Roma si ngukum Jesus alu tuduhen Jesus ngelawan pemerentah, kalak Jahudi si maba Jesus e la kari isalahken jelma si nterem.

La ikataken peminpin-peminpin agama e man Pilatus maka Jesus nghina Dibata. Iban kalak e tuduhen si deban man Jesus, nina, [1] “Enggo itipuna bangsa kami, [2] ilarangna kami nggalar pajak man Kaisar, janah [3] ikatakenna ka ia Kristus, sekalak raja.”​—Lukas 23:2.

Selaku wakil pemerentah Roma, arus iperiksa Pilatus tuduhen kalak e man Jesus si ngaku selaku raja. Emaka masuk ka Pilatus ku istanana janah ilebuhna Jesus. Nungkun ia, “Kam kin Raja Kalak Jahudi?” Banci saja iakap Pilatus perban ikataken Jesus ia raja ilanggarna undang-undang ras ilawanna raja. Merhat Jesus metehsa ngayak ja nge itandai Pilatus ia, emaka nina, “I bas ukurndu nari kin penungkunenndu enda, ntah lit si ngatakenca man bandu kerna aku?”​—Johanes 18:​33, 34.

Iban-ban Pilatus lenga itehna kai pe kerna Jesus janah merhat kel ia metehsa, emaka nina, “Me labo aku kalak Jahudi? Bangsandu ras imam-imam kepala nge si nerahken kam man bangku. Kai kin si nggo ilakokenndu?”​—Johanes 18:35.

La icakapken Jesus kerna si deban, tapi iteruskenna kai si ikataken Pilatus e eme kedudukenna selaku raja. Tapi jawapen Jesus e pasti erban Gubernur Pilatus jadi sengget.