Jesus ras murid-muridna tading i Betani sedekah telu wari, mulai kin kalak e seh bas Jeriho. Gundari, erpagi-pagi si lampas bas wari Senin, 10 Nisan, lawes kalak e ku Jerusalem. Melihe kel Jesus, emaka sanga idahna sada batang ara, ideherina batang e. Lit nge buahna?

Paksa si e nggo akhir bulan Maret, tapi biasana i bas bulan Juni maka erbuah batang ara. Iakap Jesus nggo erbuah perban batang e nggo erbulung ras nggo ertunas. Aminna pe bage, kepeken la bagi si teridah. La lit buahna sada pe. Emaka ikataken Jesus, “Asa ndigan pe lanai lit kalak si man buahndu.” (Markus 11:14) Mis melus batang ara e. Paginna paksa erpagi-pagi, ijelasken Jesus ngkai maka bage nina man batang ara e.

Kenca seh Jesus ras murid-muridna i Jerusalem, lawes kalak e ku rumah pertoton. Nderbih paksa karaben, nggo inen Jesus keadan rumah pertoton. Gundari pe i bas wari e, ilakoken Jesus bagi si pernah ilakokenna telu tahun si lewat i bas Perayan Paskah tahun 30 M. (Johanes 2:​14-​16) Sanga si e, “ipelawesna kalak si erbinaga ras si nukur” i bas rumah pertoton. Janah, “itunggalingkenna meja-meja kalak si nukari sen bage pe kursi-kursi kalak si erbinaga merpati.” (Markus 11:15) La ipediat Jesus kalak si maba barang lewat arah halamen rumah pertoton guna dalan motong.

Engkai maka bage kel perbahanen Jesus man kalak e? Nina, “La kin lit tertulis, ‘RumahKu pagi igelari rumah pertoton man kerina bangsa’? Tapi iban kena jadi gua perampok.” (Markus 11:17) Ikataken Jesus perbinaga e perampok perban merga kel idayaken kalak e binatang si ijadiken korban. Emaka ipeseri Jesus kalak e ras perampok ntah pe si ngompas.

Pasti ibegi imam-imam kepala, ahli-ahli Undang-Undang Musa, ras peminpin-peminpin si debanna kerna kai si ilakoken Jesus. Emaka iban kalak e ka rencana guna munuh Jesus. Tapi masalahna nterem kalak si sangana megiken Jesus, jadi uga kalak e munuh Jesus?

Labo ngenca kalak Jahudi, tapi kalak si berubah agama jadi eragama Jahudi pe nggo rehen guna ngerayaken Paskah. Si e termasuk kalak Junani pe reh guna nembah Dibata i bas perayan e. Ideheri kalak e Pilipus, banci jadi perban gelarna arah bahasa Junani, janah isungkun kalak e banci nge kalak e jumpa ras Jesus. Sangsi Pilipus, emaka iarihkenna ras Andreas. Jenari, isungkun kalak e Jesus, banci saja Jesus sangana i rumah pertoton denga.

Ieteh Jesus maka piga-piga wari nari nandangi mate ia, jadi labo gundari waktuna guna encidahken dirina man kalak si merhat meteh saja ntah pe si erban ia terkenal. Emaka ijawap Jesus dua rasulna e alu perumpaman, nina, “Enggo seh waktuna Anak manusia imuliaken. Situhuna, adi la ndabuh sada biji gandum ku taneh janah mate, tetap nge ia sada biji gandum. Tapi adi nggo mate biji gandum e, melala me buah si ihasilkenna.”​—Johanes 12:​23, 24.

Sada biji gandum banci saja tempa labo lit ergana. Tapi, adi si sada biji e ndabuh ku taneh janah “mate,” si e banci turah jadi batang gandum si ngasilken melala buah. Bage ka pe, Jesus eme sekalak manusia si sempurna. Erkiteken tetap ia setia man Dibata seh asa mate, ibuka Jesus dalan man nterem kalak si nggit erkorban bagi Jesus guna nggeluh si rasa lalap. Nina Jesus, “Ise pe si ngkelengi geluhna, kebenen geluhna me. Tapi ise pe si nggit kebenen geluhna i doni enda, iselamatkenna me geluhna gelah ngaloken kegeluhen si la erkeri-kerin.”​—⁠Johanes 12:25.

Labo dirina saja ngenca si iukuri Jesus, ikataken Jesus, “Ise pe si nggit ngelayani aku, arus ikutkenna aku. Ku japa pe aku lawes, ku je me ia. Ise pe si nggit ngelayani aku, ihamati Bapak nge ia.” (Johanes 12:26) Enda pasu-pasu si mbelin kel! Kalak ihamati Bapak ikut merentah pagi ras Jesus i bas Kerajan Dibata.

Iteh Jesus maka kentisik nari inanamina siksan janah ibunuh alu kejam, emaka nina, “Gundari latih kel ukurku. Uga nge ndia ningku? O Bapak, selamatken min aku paksa kiniseran enda.” Enda labo ngertiken maka la atena ngelakoken peraten Jahwe, sebap ikatakenna ka, “Memang, guna si enda nge aku reh.” (Johanes 12:27) Nggit Jesus ngelakoken kerina peraten Dibata, guna si e mate pe ia nggit!