Jesus nggo ihina ras isiksa janah piga-piga kali iusahaken Pilatus mbebasken Jesus. Tapi imam-imam kepala ras pengikut kalak e lalap atena gelah Jesus iukum mate. Serko kalak e nina, “Bunuh ia i bas tiang! Bunuh ia i bas tiang!” Jenari nina Pilatus, “Kena sajalah si mabasa janah bunuh ia, perban kai pe labo lit kudat salahna.”​—Johanes 19:6.

Kalak Jahudi la banci erban Pilatus tek maka Jesus ngelawan pemerentah. Emaka ituduh kalak e Jesus ngelanggar aturen agama. Tuduhen e nggo pernah ipake kalak e sanga Jesus iadili i bas Pengadilen Agama Jahudi. Ning kalak e, “Lit kap undang-undang kami, janah menurut undang-undang e, ia arus mate, perban iakukenna maka ia anak Dibata.” (Johanes 19:7) Enda me tangtangna ibegi Pilatus tuduhen e.

Mulihi ka ia masuk ku istanana janah idaramina ka cara mbebasken Jesus si nggo isiksa alu kejam. Banci saja iingetna ka nipi diberuna kerna Jesus. (Matius 27:19) Bingung Pilatus megi tuduhen e si ngataken Jesus e “anak Dibata.” Si iteh Pilatus Jesus rehna arah Galilea nari. (Lukas 23:​5-7) Emaka isungkunna Jesus, nina, “I ja nari kin asalndu?” (Johanes 19:9) Mungkin nge iakap Pilatus maka Jesus e dibata janah pernah nggeluh i surga?

Enggo ikataken Jesus langsung man Pilatus maka ia sekalak raja janah Kerajanna labo bagin i bas doni enda. Emaka sinik saja Jesus, lanai kapna perlu nuriken kai pe. Ngidah si e, megelut Pilatus janah merawa ia, “La kam nggit ngerana ras aku? La kin tehndu maka lit kuasaku guna mbebasken kam bage pe mereken ukumen mate man bandu?”​—Johanes 19:10.

Nina Jesus, “Labo lit kuasandu nandangi aku adi la kin ibereken Dibata man bandu. Perban si e me maka belinen dosa kalak si nerahken aku man bandu.” (Johanes 19:11) “Kalak” si imaksud Jesus bas ayat e labo ngenca sada kalak. E maksudna eme Kayapas, anak buah Kayapas, bage pe Judas Iskariot si belinen dosana asangken Pilatus.

Mamang ate Pilatus megi kata-kata Jesus e. Reh biarna ia perban ragu ia ntah tuhu kin Jesus e dibata. Emaka iusahakenna ka mbebasken ia. Tapi ipebiar-biar kalak Jahudi me Pilatus. Nina kalak e, “Adi ibebaskenndu dilaki ena, kam labo teman Kaisar. Tiap kalak si ngataken dirina raja, situhuna ilawanna kap Kaisar.”​—Johanes 19:12.

Sekali nari ibabai Pilatus me Jesus ku darat. Arah kursi penghakimenna nina man jelma si nterem e, “Nenlah raja kena!” Tapi labo mekuah ate kalak Jahudi e, serko kalak e, “Bunuh ia! Bunuh ia! Bunuh ia i bas tiang!” Nina Pilatus, “Arus kin kubereken ukumen mate man raja kena?” Situhuna labo senang kalak Jahudi nandangi pemerentah Roma, tapi pang kalak e ngataken, “Labo lit raja kami selain Kaisar.”​—Johanes 19:​14, 15.

Perban lalap ipaksa kalak Jahudi Pilatus, dungna iberekenna ukumen mate man Jesus. Itangtangi prajurit me baju Jesus si warna terong janah ipakeken kalak e man Jesus uis si arah darat. Jenari erdalan ia janah arus ibabana tiang siksanna.

Gundari wari Jumat erpagi-pagi tanggal 14 Nisan. Jesus la medem-medem mulai wari Kamis erpagi-pagi nari janah ia lalap isiksa. Selain si e, arus ka ibabana tiang siksan si mberat, emaka nggo keri gegeh Jesus. Emaka ipaksa prajurit me sekalak dilaki si sangana lewat gelarna Simon arah Kireni i Afrika. Isuruh kalak e ia maba tiang e seh ku ingan Jesus ipakuken. Enterem kalak si ngikutken Jesus janah itangisi kalak e Jesus ras itemtemi kalak e bana.

Nina Jesus man diberu-diberu si tangis e, “O diberu-diberu Jerusalem, ula nari tangisi kena aku. Tangisilah diri kena ras anak-anak kena, reh me warina paksa ikataken kalak, ‘Ermeriah ukur me diberu si la banci melahirken, si la pernah melahirken, ras si la pernah pepinemken!’ Jenari ikataken kalak e man deleng-deleng, ‘Dabuhi min kami!’ janah man uruk-uruk, ‘Tamburi min kami!’ Adi sanga meratah denga pe batang kayu e bage perbahanen kalak e, uga ka adi nggo kerah?”​—Lukas 23:​28-​31.

Jesus sangana ncakapken kerna bangsa Jahudi. Bangsa e bali bagi batang kayu si nandangi kerah tapi lit denga sitik segarna perban lit denga Jesus bage pe kalak Jahudi si erkiniteken man Jesus. Kenca mate Jesus janah murid-muridna pe lanai eragama Jahudi, kiniteken bangsa e dungna kerah, bali bagi batang kayu si nggo mate. Sanga ipake Dibata pasuken Roma guna ngukum bangsa e tangis me pagi kalak kerina!