Jesus iiket bagi penjahat janah ibaba man Annas. Paksa Jesus kitik denga pernah ibanna kemamangen guru-guru agama i rumah pertoton. Sanga si e Annas me si jadi imam si mbelin. (Lukas 2:​42, 47) Kenca si e, anak-anak Annas me si jadi imam si mbelin. Gundari si jadi imam si mbelin eme kelana, gelarna Kayapas.

Sanga Jesus i rumah Annas, ipepulung Kayapas me anggota Pengadilen Agama Jahudi. Lit 71 anggotana termasuk imam si mbelin ras kalak si deban si pernah jadi imam si mbelin.

Isungkuni Annas me Jesus “kerna murid-muridna ras kerna kai si iajarkenna.” Nina Jesus ngaloi, “Enggo ngerana aku i lebe-lebe jelma si nterem. Rusur aku ngajar i bas ingan pulung kalak Jahudi bage pe i bas rumah pertoton, eme ingan kerina kalak Jahudi pulung, janah la pernah aku erbuni-buni ngerana. Jadi, ngkai maka isungkunindu aku? Sungkunlah kalak si nggo pernah megi kata-kataku e.”​—Johanes 18:​19-​21.

Sekalak petugas si cinder i je marap ayo Jesus, janah nina, “Bage kin carandu njawap imam kepala?” Tapi perban iteh Jesus labo ia salah, nina, “Adi lit kin si salah i bas pengeranaku, katakenlah i ja salahna. Tapi adi kai si kukataken e tuhu, ngkai maka iparapndu aku?” (Johanes 18:​22, 23) Jenari isuruh Annas me Jesus gelah ibaba ku Kayapas.

Enggo pulung kerina anggota Pengadilen Agama Jahudi, eme imam si mbelin, peminpin-peminpin kalak Jahudi, bage pe ahli-ahli Undang-Undang Musa i rumah Kayapas. Pengadilen enda situhuna la sah perban iban i bas berngi perayan Paskah. Si enda labo jadi masalah akap kalak e, perban enda me kesempaten kalak e guna ngelakoken rencana kalak e si jahat.

Enggo ndekah segat ate kalak e Jesus. Kenca ipekeke Jesus si Lasarus, ibunuh anggota Pengadilen Agama Jahudi atena Jesus. (Johanes 11:​47-​53) Piga-piga wari si lewat arih-arih peminpin agama guna nangkap ras munuh Jesus. (Matius 26:​3, 4) Emaka lenga pe pengadilen e ibenaken, situhuna nggo iputusken gelah Jesus iukum mate!

Selain si e, idarami imam-imam kepala ras anggota Pengadilen Agama Jahudi kalak si nggit mereken kesaksin palsu guna ngelawan Jesus. Melala kalak si nggit ngelakokenca, tapi sada pe la seri katana. Dungna, reh me dua saksi janah nina, “Ibegi kami katakenna, ‘Kuruntuhken pagi rumah pertoton enda si iban alu tan manusia, janah i bas telu wari kubangun ka pagi rumah pertoton si deban si la iban alu tan manusia.’” (Markus 14:58) Tapi kesaksin kalak si dua enda pe la seri.

Nina Kayapas man Jesus, “La nge atendu katakenndu kai pe? Uga menurutndu tuduhen kalak e bandu?” (Markus 14:60) Tapi Jesus tetap sinik. Emaka idarami Kayapas cara si deban.

Iteh Kayapas maka kalak Jahudi la senang adi lit kalak si ngataken dirina Anak Dibata. Sope si e, pernah ikataken Jesus maka Dibata e Bapakna. Ibunuh kalak Jahudi atena Jesus perban iakap kalak e “ipeserina ka dirina ras Dibata.” (Johanes 5:​17, 18; 10:​31-​39) Ieteh Kayapas kerna si e, emaka nina alu licik, “Ersumpahlah i bas gelar Dibata si nggeluh, janah kataken man kami tuhu nge kam Kristus, Anak Dibata!” (Matius 26:63) Enggo piga-piga kali ikataken Jesus maka ia Anak Dibata. (Johanes 3:​18; 5:​25; 11:4) Emaka adi sinik saja Jesus sekalenda, banci kari iakap kalak la iakuina maka ia Anak Dibata bage pe Kristus. Emaka nina Jesus, “Ue, aku, idah kena pagi Anak manusia kundul arah kanan Si Erkuasa janah reh i datas embun i langit.”​—Markus 14:62.

Kenca si e, iban-ban Kayapas ia sengget jenari irigatkenna uisna, nina, “Enggo ihinana Dibata! Man kadeta nari kin saksi? Gundari nggo ibegi kena ia nghina Dibata. Uga iakap kena?” Emaka nina anggota Pengadilen Agama Jahudi, “Bunuh saja ia.”​—Matius 26:​65, 66.

Kenca si e, ihina kalak e Jesus ras itinjuina. Si debanna marap ayona ras nciduri ia. Itutupi kalak e ayo Jesus kenca e itinjuina ka. Kenca si e ning kalak e, “Adi nabi kin kam, kataken dage man kami ise si nggudam kam?” (Lukas 22:64) Anak Dibata iadili alu la adil janah iperlakoken alu kejam!