Gundari nggo mbages kel berngi. Imam-imam kepala setuju nggalari Judas 30 sen logam. Emaka ibabai Judas me nterem imam-imam kepala ras kalak Parisi guna ndarami Jesus. Ikut ka ras kalak e sada pasuken prajurit Roma ras komandanna.

Banci saja kenca isuruh Jesus lawes Judas arah acara man pangan Paskah nari, ijumpai Judas me imam-imam kepala. (Johanes 13:27) Ipepulung kalak e petugas-petugas ras sada kelompok prajurit. Ibaba kalak e ka senjata, lampu, ras obor. Banci saja ibabai Judas lebe kalak e ku ingan Jesus ras rasul-rasulna ngerayaken Paskah ndai. Gundari nggo ilewati kalak e Lembah Kidron muat ku taman. Lanai kalak e sabar nangkap Jesus.

Ibabai Judas rombongen e ku Deleng Saitun, tek kel ia Jesus pasti i je. Perban sedekah Jesus ras rasul-rasulna tading i Betani, hampir tiap wari kalak e lawes ku Jerusalem janah rusur kalak e ngadi i taman Getsemane. Tapi gundari nggo berngi. Banci saja Jesus lit teruh batang saitun si melala i taman e. Jadi uga kari prajurit-prajurit e nandai Jesus adi lenga pernah idah kalak e Jesus? Guna nampati kalak e, iban Judas sada tanda. Nina, “Ise kari si kuema, ia me jelmana. Tangkaplah ia, babalah, ula sempat pulah.”​—Markus 14:44.

Sanga erdalan Judas ras rombongenna ku taman e, idah Judas me Jesus ras rasul-rasulna erdalan ndahi ia. Nina Judas, “Mejuah-juah, Guru!” Kenca si e, iemana Jesus. Emaka nina Jesus, “O Teman, kai kin atendu reh ku jenda?” (Matius 26:​49, 50) Ijawap Jesus sendiri penungkunenna e, nina, “O Judas, alu ema enda kin Anak manusia ihianatindu?” (Lukas 22:48) Tapi la itimai Jesus jawapen Judas si penghianat e.

Idahi Jesus rombongen si maba lampu ras obor e, janah isungkunna, “Ise daramen kena?” Ning kalak e, “Jesus kalak Nasaret.” Pang kel Jesus ngerana, nina, “Aku kap katandu e.” (Johanes 18:​4, 5) Perban sengget, ndabuh kalak e kerina.

Labo kiam Jesus gelah ula itangkap kalak e. Tapi isungkunna ka kalak e ise si idaramina. Ning kalak e ka, “Jesus kalak Nasaret,” nina Jesus alu manjar-anjar, “Nggo kukataken man kena maka aku kap jelmana. Emaka adi aku kin si idarami kena, pediat kalak enda lawes.” I bas keadan si bage pe, sempat denga ikataken Jesus kai si nggo pernah ikatakenna maka labo sekalak pe rasulna pagi bene. (Johanes 6:​39; 17:12) Enggo ijaga Jesus rasul-rasulna si setia janah sekalak pe la bene selain “ia si memang nandangi ikernepken” eme kap Judas. (Johanes 18:​7-9) Emaka gundari mindo ia gelah rasul-rasulna si setia e ipediat lawes.

Sanga cinder prajurit e janah ideherina Jesus, iteh rasul-rasul kai si nandangi terjadi. Nungkun kalak e, “O Tuan, arus kin iserang kami kalak e alu pedang?” (Lukas 22:49) Ope lenga ijawap Jesus, ibuat Petrus sada pedang rasul-rasul e jenari ipotongna cuping Malkus si sebelah kanan. Malkus e budak imam si mbelin.

Tapi ijemak Jesus cuping Malkus e janah ipepalemna. Jenari inenna Petrus janah ikatakenna pelajaren si penting, nina, “Masukken pedangndu ena ku inganna, sebap kerina si make pedang mate pagi iban pedang.” Ipediat Jesus kalak e nangkap ia sebap nina, “Uga kata-kata i bas Kitap si Badia banci terjadi, si ngataken maka kerina arus terjadi alu cara si bage?” (Matius 26:​52, 54) Nina ka, “La kin arus aku minem arah calung si ibereken Bapakku man bangku?” (Johanes 18:11) Nggit Jesus ngelakoken peraten Dibata aminna pe arus ia mate.

Isungkun Jesus rombongen e, “Akap kena kin aku enda perampok maka reh kena maba pedang ras perpalu nangkap aku? Tiap wari aku kundul ngajar i bas rumah pertoton, tapi la itangkap kena aku. Tapi kerina enda terjadi gelah seh kai si itulisken nabi-nabi.”​—Matius 26:​55, 56.

Itangkap prajurit e Jesus janah iiket kalak e ia. Ngidah si e kiam me rasul-rasul. Tapi “lit sekalak anak perana” banci saja ia murid Jesus gelarna Markus. Lalap ia ikut ras jelma si nterem e ngikutken Jesus. (Markus 14:51) Dungna itandai kalak ia janah itangkap kalak e atena ia. Emaka itangtangina uisna jenari kiam ia.