Kenca sepuluh wari Jesus nangkih ku surga, iberekenna kesah si badia man murid-muridna. Enda bukti maka Jesus tuhu-tuhu nggo i surga. Lit ka bukti si deban. Sope Stepanus ibenteri alu batu perban mereken kesaksin, ikatakenna, “Kuidah langit talang, janah cinder Anak manusia i sebelah kanan Dibata.”​—Perbahanen Rasul-Rasul 7:​56.

I surga, Jesus nimai perentah Bapakna bagi si nggo inubuatken bas Kata Dibata. Itulisken Daud, “Nina [Jahwe] man tuanku raja [Jesus]: ‘Kundulken arah kemuhenKu, seh maka Kutamaken imbang-imbangndu i teruh tapak-tapak nahendu.’” Kenca nimai, ‘erkuasa ia man imbang-imbangna.’ (Masmur 110:​1, 2) Tapi ope Jesus ngelawan musuh-musuhna, kai si ilakokenna i surga?

I bas Pentakosta tanggal 33 M, ibentuk me runggun Kristen. Arah surga nari, Jesus mulai merentah nandangi murid-muridna si nggo ipilih ku surga. (Kolose 1:​13) Isampati Jesus kalak e erberita janah isikapken Jesus kalak e guna ngelakoken tugasna i surga. Tugas kai kin e? Adi kalak e setia seh mate, kalak e ipekeke janah banci merentah jadi raja ras Jesus bas Kerajan Dibata.

Sekalak murid si ikut jadi raja ras Jesus eme Saul, tapi buen kalak nandai ia Paulus, eme gelarna selaku kalak Roma. Ia kalak Jahudi si tutus kel ndalanken Undang-Undang Dibata. Tapi peminpin-peminpin agama Jahudi ngajarken kai si salah man bana, Saul pe setuju sanga Stepanus ibenteri alu batu seh mate. Perban “terus denga iancamna murid-murid Tuan janah ersura-sura kel ia munuh kalak e,” lawes me Saul ku Damaskus. Ia isuruh Imam si Mbelin eme Kayapas guna nangkap murid-murid Jesus janah maba kalak e ku Jerusalem. (Perbahanen Rasul-Rasul 7:​58; 9:1) Tapi, sanga Saul bas dalan, rempet lit sinar si nerangi ku sekelilingna, janah ndabuh me ia.

Ibegina sora si ngataken, “Saul, Saul, ngkai maka isiksandu aku?” Nungkun Saul, “Ise kin kam Tuan?” Nina sora e ngaloi, “Aku kap Jesus, si isiksandu.”​—Perbahanen Rasul-Rasul 9:​4, 5.

 Isuruh Jesus gelah masuk Saul ku kota Damaskus janah arus itimaina petunjuk arah Jesus nari. Tapi arus ia itegu-tegu ku kota e, perban sinar ndai nggo erban pentang matana. Ngerana ka Jesus man Ananias, ia murid Jesus si tading i Damaskus. Tangtangna sangsi Ananias, tapi nina Jesus, “Nggo kupilih ia guna mberitaken gelarku man bangsa-bangsa si deban, raja-raja, bage pe man kalak Israel.” Dungna Saul banci ngidah mulihi, janah i Damaskus “iberitakenna maka Jesus kap Anak Dibata.”​—Perbahanen Rasul-Rasul 9:​15, 20.

Alu penampat Jesus iterusken Paulus ras murid-murid si deban dahin erberita si nggo imulaina. Ipasu-pasu Dibata kalak e janah kai si ilakokenna berhasil. Kira-kira 25 tahun kenca ngerana Jesus man Paulus i bas dalan ku Damaskus, itulis Paulus maka berita si meriah e nggo “iberitaken ku kerina ciptan si lit i teruh langit.”​—Kolose 1:​23.

Ertahun-tahun kenca si e, iban Jesus banci iidah Johanes kejadin-kejadin si luar biasa, janah enda itulis i bas buku Ketangkasen. Iidah Johanes reh Jesus mulihi selaku Raja. (Johanes 21:22) Ikataken Johanes, “Erkiteken dem alu kesah Dibata, aku lit i bas wari Tuan.” (Ketangkasen 1:​10) Ndigan “wari Tuan” e terjadi?

Nubuat i bas Pustaka njelasken maka “wari Tuan” e imulai i bas tahun 1914. I bas tahun e terjadi me Perang Doni I. Mulai tahun e melala terjadi perang, penakit, gempa, bage pe erbage-bage kiniseran. Kerina enda bali bagi “tanda” si ibereken Jesus man rasul-rasulna kerna ‘kerehenna’ bage pe kerna “kedungen” jaman enda. (Matius 24:​3, 7, 8, 14) Dahin mberitaken berita si meriah kerna Kerajan e sangana iberitaken, labo ngenca i bas daerah Kerajan Roma, tapi i belang-belang doni.

Kai ertina si enda? Alu penampat Dibata itulisken Johanes bagenda, “Dibata nggo nelamatken manusia, nggo ibuktikenNa kuasaNa, nggo pajek KerajanNa, janah gundari nggo erkuasa KristusNa!” (Ketangkasen 12:10) Jelas kel, Kerajan Dibata si iberitaken Jesus nggo merentah i surga!

Pasti meriah kel iakap murid-murid Jesus si setia megi si e. Bagi si ikataken Johanes, “Erkiteken si e, ermeriah ukurlah surga, bage pe kerina kena si tading i je! Tapi cilaka me doni ras lawit, sebap Iblis nggo nusur ku kena, janah merawa kel ia sebap itehna maka waktuna kentisik nari ngenca.”​—Ketangkasen 12:12.

Gundari Jesus lanai kundul i sebelah kanan Bapakna guna nimai. Ia nggo merentah jadi Raja janah kentisik nari ikernepkenna kerina musuhna. (Heber 10:​12, 13) Adi bage, pasu-pasu kai si nandangi sidatken?