I bas berngi si terakhir ras rasul-rasulna, nina Jesus man kalak e, “Kenca aku ipekeke, leben kari aku asa kena ku Galilea.” (Matius 26:32; 28:​7, 10) Emaka nterem pengikutna lawes ku Galilea. Kai si ilakoken kalak e?

Nina Petrus man enem rasul si deban, “Lawes ateku njala ikan.” Nina enemna rasul e, “Ikut ate kami.” (Johanes 21:3) Segedang berngi la lit idat kalak e kai pe. Kenca nggo nandangi terang, Jesus lit i pantai, tapi la itandai kalak e Jesus. Ilebuh Jesus kalak e, “O anak-anak, lit kang idat kena si man pangan?” Ijawap kalak e, “La lit!” Nina Jesus, “Amburken jala kena ku sebelah kanan perahu e, pasti lit idat kena.” (Johanes 21:​5, 6) Melala kel idat kalak e ikan, piah lanai tertarik kalak e jala e.

Nina Johanes man Petrus, “Tuan kap ah!” (Johanes 21:7) Minter ipake Petrus bajuna si arah darat, perban la ndai ipakena sanga nangkap ikan. Lompat ia ku lau e janah erlangi ku pantai kira-kira 90 meter dauhna. Rasul si debanna reh ku pantai e naik perahu janah maba jala si dem ikan e.

Seh kenca i pantai, idah kalak e “lit roti bage pe ikan si sangana ipanggang i datas rara api.” Nina Jesus, “Baba ku jenda piga-piga ikan si mbaru itangkap kena e.” Itarik Petrus me jala e janah lit 153 ikan si galang! Nina Jesus, “Iah manken kena.” Sada pe kalak e la pang nungkunsa, “Ise kam?” Perban nggo itandai kalak e ia Jesus. (Johanes 21:​10-​12) Enda petelu kaliken icidahken Jesus dirina i lebe-lebe murid-muridna.

Ibereken Jesus kalak e man ikan ras roti e. Iteh Jesus atena apai nge ate Petrus kelengen antara dahin njala ikan ntah dahin si ibereken Jesus. Emaka janah ngenen ikan e isungkunna Petrus, “O Simon anak Johanes, kelengen nge atendu aku asangken kerina enda?” Nina Petrus, “O Tuan, nggom itehndu maka keleng ateku kam.” Nina Jesus man bana, “Bere man lah anak biri-biriku.”​—Johanes 21:15.

Nina Jesus ka, “O Simon anak Johanes, keleng nge atendu aku?” Mamang ate Petrus janah ijawapna, “Ue Tuan, nggom itehndu maka keleng ateku kam.” Nina Jesus, “Permakanilah biri-biriku si kitik.”​—Johanes 21:16.

Petelu kaliken isungkun Jesus, “O Simon, anak Johanes, keleng nge atendu aku?” Gundari banci saja akap Petrus maka ragu Jesus kerna kesetianna. Nina Petrus, “O Tuan, kai pe itehndu kap. Itehndu nge maka keleng ateku kam.” Sekali nari ikataken Jesus kai si arus ilakoken Petrus, “Bere manlah biri-biriku si kitik.” (Johanes 21:17) Jelas me, kalak si minpin i bas runggun arus ngelayani biri-biri Dibata.

Jesus iiket ras isiksa seh asa mate erkiteken dahin si ibereken Dibata man bana. Ikatakenna man Petrus maka bage ka me pagi si inanamina. Nina Jesus, “Sanga kam nguda denga, kam sendiri si makeken uisndu, janah banci kam lawes ku japa pe atendu. Tapi kenca metua, iberekenndu tanndu janah kalak si deban si makeken uisndu, jenari ibabana kam ku ingan si la atendu bage.” Aminna pe bage, nina Jesus, “Teruslah ikutken aku.”​—Johanes 21:​18, 19.

Inen Petrus rasul Johanes janah isungkunna Jesus, “O Tuan, uga kerna ia?” Kai pagi si inanami rasul si ikelengi Jesus e? Nina Jesus, “Adi ateku, ia tetap nggeluh ngayak aku reh mulihken, kai kin urusenndu?” (Johanes 21:​21-​23) Petrus arus tetap ngikutken Jesus la soal kai pe si ilakoken kalak. Kata-kata Jesus ncidahken maka gedangen pagi umur Johanes asangken rasul-rasul si deban janah lit pagi idahna kejadin kerna kerehen Jesus selaku raja.

Pastilah melala denga si ilakoken Jesus. Tapi adi itulis kerina, asa kai pe buena gulungen e la banci siat.