Kenca berkat Jesus i Jeriho nari lawes ia ku Betani. Mesera kel dalanna ku je, arus nangkeng 20 kilometer dauhna. Ingan kota Jeriho e lit kira-kira 250 meter ganjangna adi isibari arah teruh lawit nari. Janah ingan Betani lit kira-kira 610 meter ganjangna adi isibari i datas lawit nari. Lasarus ras dua turangna tading i sada kuta si kitik i Betani si lit i Deleng Saitun. Kuta e lit telu kilometer dauhna arah Jerusalem nari.

Nterem kalak Jahudi nggo seh i Jerusalem guna ngerayaken Paskah. Lampas kalak e reh “guna ngelakoken acara pembersihen diri,” perban lit kalak si nggo njemak mayat ntah pe si ngelakoken kai si erban kalak e lanai bersih. (Johanes 11:55; Bilangen 9:​6-​10) Kalak si leben seh pulung bas rumah pertoton. Merhat kalak e metehsa reh ntah lang Jesus bas Paskah e.​—Johanes 11:​56.

Piga-piga peminpin agama itangkapna ras ibunuhna atena Jesus. Iperentahken kalak e ka maka ise pe si meteh i ja Jesus arus ilaporkenna, gelah banci “itangkap kalak e ia.” (Johanes 11:57) Kenca Lasarus ipekeke nggo pernah ka icubaken kalak e munuh Jesus. (Johanes 11:​49-​53) Emaka, lit si sangsi reh ntah lang Jesus ku perayan e.

I bas wari Jumat seh Jesus ku Betani, “Enem wari sope Perayan Paskah.” (Johanes 12:1) Paginna wari Sabat tanggal 8 Nisan. Wari e imulai kenca matawari ndabuh. Emaka, ope lenga Sabat Jesus nggo seh. Sebap la mungkin ia lawes arah Jeriho nari i bas wari Sabat. Perban menurut undang-undang kalak Jahudi la banci erban perdalanen paksa wari Sabat. Wari Sabat e mulai arah wari Jumat kenca ndabuh matawari seh asa wari Sabtu kenca ndabuh matawari. Banci saja idahi Jesus ka rumah Lasarus bagi si sange.

Simon si tading i Betani ngundang Jesus ras teman-temanna termasuk Lasarus gelah man i bas wari Sabtu berngi. Simon enda “pernah sakit kusta” tapi dungna ipepalem Jesus. Bagi si biasa ilakoken Marta, sikap kel ialo-alona tamuna. Tapi Maria ibegikenna kel Jesus, emaka lit si la senang ngenen si ilakoken Maria.

Ibuka Maria me botol si isina “minak wangi eme narwastu si asli si merga.” (Johanes 12:3) Erga minak e kira-kira 300 dinar, seri ras upah sekalak jelma si erdahin sada tahun! Icurcurken Maria minak e ku takal Jesus ras ku nahena jenari ielapna alu bukna. Kerina ruangen jadi bau minak e.

Ngidah si e, merawa murid-murid, nina, “Engkai maka isia-siaken minak wangi e?” (Markus 14:4) Judas Iskariot pe la senang, emaka nina, “Engkai maka la idayaken saja minak wangi si ergana 300 dinar e, janah bereken senna man kalak mesera?” (Johanes 12:5) Situhuna labo tuhu-tuhu iukuri Judas kalak mesera. Sedekah enda ia kap si ngurus kotak sen murid-murid, janah rusur itangkona sen arah kotak e.

Ibela Jesus me Maria, nina, “Engkai maka susah iban kena diberu e? Si mehuli kap ibanna bangku. Sebap kalak mesera lalap nge ras kena, tapi aku labo lalap ras kena. Sanga itamana minak wangi e ku dagingku, ilakokenna e guna nikapken penguburenku. Situhuna, i japa pe berita si meriah iberitaken i belang-belang doni, kai si ilakoken diberu enda iceritaken ka pagi guna nginget ia.”​—Matius 26:​10-​13.

Lebih sada wari dekahna Jesus tading i Betani, emaka nterem kalak si metehsa. Enterem kalak Jahudi reh ku rumah Simon, labo ngenca guna ngenen Jesus tapi guna ngenen Lasarus ka “si nggo ipekeke i bas si mate nari.” (Johanes 12:9) Arih-arih imam-imam kepala guna munuh Jesus ras Lasarus. Iakap peminpin-peminpin agama e nterem kalak tek man Jesus perban Lasarus nggo nggeluh mulihi. Seh kel kalak e jahatna!