Mbaru denga iajarken Jesus sipat meteruk ukur man rasul-rasulna alu nuci nahe kalak e. Gundari, banci saja kenca dung kalak e man pangan Paskah, ibelaskenna nubuat Daud, nina, “Teman si kuteki, dingen kalak si man ras aku pe, enggo ngimbangi aku.” Jenari ijelaskenna, “Sekalak i bas kena nari ihianatina kari aku.”​—Masmur 41:​10; Johanes 13:​18, 21.

Sitatapen me rasul-rasul e, janah sekalak-sekalak nungkun man Jesus, “Tuan, me labo aku?” Judas Iskariot pe ikut nungkun. Nce isuruh Petrus me Johanes si kundul i samping Jesus gelah isungkunna ise kin si imaksud Jesus e. Emaka nina Johanes man Jesus, “O Tuan, ise kin katandu e?”​—Matius 26:22; Johanes 13:25.

Nina Jesus, “Kucelupken me roti enda, jenari ku ise kari kubereken, ia me jelmana.” Kenca icelupken Jesus roti e, iberekenna man Judas, nina, “Lawes me Anak manusia e, bagi si nggo itulisken kerna ia. Tapi cilaka kel kalak si nghianati Anak manusia e! Ulin min ndai ia la lahir.” (Johanes 13:26; Matius 26:24) Kenca e, ipengaruhi Setan me Judas. Dilaki si jahat enda nggit ipake Iblis guna ngelakoken peratenna, ia “nandangi ikernepken.”​—Johanes 6:​64, 70; 12:⁠4; 17:⁠12.

Nina Jesus man Judas, “Minterlah lakoken kai si atendu ilakokenndu.” Erkiteken Judas si ngurus kotak sen, iakap rasul-rasul isuruh Jesus ia “nukur keperlun guna perayan e, ntah mereken sumbangen man kalak mesera.” (Johanes 13:​27-​30) Situhuna Judas lawes guna nghianati Jesus.

I bas berngi e ka sanga kalak e man pangan Paskah, ipetandaken Jesus perayan si mbaru. Ibuatna sada roti, nce ertoto ia ngata bujur, icepik-cepikkenna jenari iberekenna man rasul-rasul gelah ipan kalak e. Nina, “Enda ngertiken dagingku, si ibereken guna kepentingen kena. Teruslah lakoken enda jadi peringet-ingeten man bangku.” (Lukas 22:19) Emaka iberekenna roti e man rasul-rasul gelah ipan kalak e.

Gundari ibuat Jesus sada calung ntah pe sada cangkir anggur, ertoto ia ngata bujur, jenari iberekenna man rasul-rasul. Kerina kalak e minem arah calung e, nina Jesus, “Calung enda ngertiken perjanjin baru si isahken alu darehku, si iamburken pagi guna kepentingen kena.”​—Lukas 22:20.

Jadi ipindoken Jesus gelah pengikut-pengikutna mperingeti kematenna tiap tahun tanggal 14 Nisan. Alu mperingetisa, banci iukuri kalak e kai si nggo ilakoken Jesus ras Bapakna guna mbebasken manusia arah dosa ras kematen. Acara enda ndauh pentingen asangken acara Paskah man kalak Jahudi, perban kai si nggo ilakoken Jesus banci tuhu-tuhu mbebasken kerina manusia.

Ikataken Jesus maka darehna e “iamburken pagi guna ngampuni dosa nterem jelma.” Rasul-rasul Jesus si setia bage pe murid si deban si bagi kalak e banci iampuni dosana. Kalak e me si ikut ras Jesus merentah i bas Kerajan Bapakna.​—⁠Matius 26:​28, 29.