Paginna wari Minggu tanggal 9 Nisan, lawes Jesus ras murid-muridna i Betani nari ku Jerusalem. Seh kenca kalak e i deher Betpage i Deleng Saitun ngerana Jesus man dua muridna, nina:

“Laweslah ku kuta si arah lebe ah, idapeti kena kari i je sada kelede si itambat ras anakna. Pulahi janah baba man bangku. Adi lit kari si nungkun, arus ikataken kena, ‘Perlu Tuan.’ Minter kari ipediatna ibaba kena.”​—Matius 21:​2, 3.

Tangtangna la iteh murid-murid maka kata-kata Jesus e lit hubungenna ras nubuat Pustaka si Badia. Tapi dungna iteh kalak e lit hubungenna ras nubuat Sakaria. Inubuatkenna maka Raja si ijanjiken Dibata reh pagi ku Jerusalem, “meteruk ukurna, ia reh ngersak kelede; kelede si nguda denga e me anak indung kelede.”​—Sakaria 9:9.

Sanga seh murid-murid i Betpage, ibuatna kelede jantan ras indungna. Nungkun kalak si lit i je, “Engkai maka ipulahi kena anak kelede e?” (Markus 11:⁠5) Tapi kenca iteh kalak e maka binatang e ibaba man Tuan, dungna ipediat kalak e. Itama murid-murid uisna si arah darat i datas kelede e ras i datas anakna, tapi si inangkihi Jesus eme anak kelede e.

Sanga Jesus nandangi seh i Jerusalem, reh teremna jelma rehen. Nterem kalak ngkimbangken uisna i tengah dalan. Si debanna motong dahan batang kayu “i bas juma nari” janah iamparkenna ka i dalan. Ersurak kalak e, “Tolong selamatkenlah! Ipasu-pasu me ia si reh i bas gelar Jahwe! Ipasu-pasu me Kerajan bapakta Daud si nandangi reh!” (Markus 11:​8-​10) La senang kalak Parisi megi si e. Ning kalak e, “O Guru, rawai min murid-muridndu e.” Nina Jesus, “Adi tetap kalak e sinik, batu-batu enda me si ersurak.”​—Lukas 19:​39, 40.

Itatap Jesus Jerusalem janah ngandung ia, nina, “Bicara itehndu kai si banci maba dame bandu, tapi gundari ibuniken e i bas matandu nari.” Mberat kel pagi ukumen man Jerusalem perban la patuh. Inubuatken Jesus, “Sebap reh me warina sanga musuh-musuhndu mbangun benteng kayu si ntelap i sekelilingndu jenari ikepungna kam janah iserangna kam arah japa pe. Ikernepken kalak e pagi kam ras anak-anakndu, janah la pagi itadingkenna sada batu pe i datas batu si debanna.” (Lukas 19:​42-​44) Kata-kata Jesus e terjadi. I bas tahun 70 M, Jerusalem ikernepken.

Sanga masuk Jesus ku Jerusalem, “guntar me belang-belang kota e, nina, ‘Ise kin enda?’” Janah jelma si nterem terus ngerana, nina, “Enda kap nabi e, Jesus, arah Nasaret nari i Galilea!” (Matius 21:​10, 11) Kalak si lit bas jelma si nterem e, si ngidah Jesus mpekeke Lasarus, iceritakenna ka mukjizat e man si debanna. I jenda pe merawa ka kalak Parisi, ning kalak e sapih-sapih ia, “Kerina doni enda nggo jadi pengikutna.”​—Johanes 12:​18, 19.

Bagi si biasana ilakoken Jesus adi ia reh ku Jerusalem, lawes ia ku rumah pertoton guna ngajar. I je ipepalemna kalak si pentang ras si lumpuh. Ibegi imam-imam kepala ras ahli Undang-Undang Musa kai si ilakoken Jesus. Janah merawa kalak e sanga ibegina anak-anak i bas rumah pertoton ngataken, “Tolong selamatken Anak Daud!” Nungkun peminpin-peminpin agama e man Jesus, “Ibegindu nge kai nina kalak enda?” Nina Jesus, “La kin pernah ibaca kena enda: ‘IbanNdu ndarat pujin arah babah anak-anak nari bage pe arah bayi nari’?”​—Matius 21:​15, 16.

Inen Jesus ku sekeliling rumah pertoton e. Gundari nggo nandangi ben, emaka berkat me ia ras rasul-rasulna. Sope tanggal 10 Nisan, mulihken ia ku Betani, i je ia erberngi seh wari Minggu berngi.