Jesus ibaba ku ingan si igelari Golgota ntah pe Ingan Tengkorak. Ingan e ndeher arah Jerusalem nari janah banci iidah “dauh-dauh nari.” Jesus ras dua kalak penjahat nandangi iukum mate i bas ingan e.​—Markus 15:40.

Itangtangi prajurit me uis Jesus bage pe uis dua perampok ndai. Kenca e iberekenna man kalak e anggur si nggo icampur mur ras pegu. Banci saja inemen e iban diberu-diberu arah Jerusalem. Inemen e banci erban lanai mesuisa kel iakap kalak si nandangi iukum mate, janah ipediat kalak Roma inemen e ibereken man telu kalak ndai. Sanga icepcep Jesus inemen e, la ia nggit nginemsa. Engkai? Ate Jesus gelah ia tetap sadar i bas ngadapi ujin si mberat enda janah setia ngasa mate.

Ipepedem kalak e Jesus i datas tiang, kenca e ipakuken kalak e tan ras nahe Jesus. (Markus 15:25) Pasti seh kel suina akap Jesus. Sanga ipepajek tiang e, reh suina iakap Jesus tan ras nahena si ipakuken ndai. Amin pe bage, la irawaina prajurit-prajurit e. Ertoto Jesus, “O Bapak, ampunilah kalak e, sebap la iangkana kai si ilakokenna.”​—Lukas 23:34.

Biasana iban kalak Roma papan si risiken kai kejahaten si nggo ilakoken kalak si iukum e. Iban Pilatus me tulisen si jadi tanda man Jesus, isina, “Jesus kalak Nasaret, Raja Kalak Jahudi.” Enda itulis bas bahasa Heber, Latin, ras Junani, emaka hampir kerina kalak banci ngangkaisa. Enda mbuktiken maka la senang Pilatus man kalak Jahudi si merhat kel gelah Jesus mate. Ngidah si e, la setuju imam-imam kepala, ning kalak e, “Ula tulis, ‘Raja Kalak Jahudi,’ tapi tulislah, ‘Aku kap Raja Kalak Jahudi.’” Tapi Pilatus lanai nggit isuruh-suruh kalak Jahudi, nina Pilatus ngaloi, “Kai si nggo kutulisken, lanai banci iubah.”​—Johanes 19:​19-​22.

Iulihi imam-imam e ka kesaksin palsu si ibegi kalak e sanga Jesus iadili Pengadilen Agama Jahudi. Kalak si lewat ngupirken takalna janah melasken ranan si nghina Jesus, nina, “Oh! Kam si atendu ngeruntuhken rumah pertoton janah ibangunndu bas telu wari, selamatkenlah bandu janah nusurlah arah tiang siksan e nari.” Imam-imam kepala ras ahli Undang-Undang Musa pe nghina ia, nina, “Pediatlah Kristus, Raja Israel e nusur gundari i bas tiang siksan nari, gelah banci siidah janah tek kita.” (Markus 15:​29-​32) Kalak si ipakuken i kanan ras i kiri Jesus pe nghina ia ka, padahal labo lit salah Jesus.

Empat prajurit Roma si lit i je pe ikut nghina ia. Kalak e banci saja sangana minem anggur si macem, iberekenna anggur e ku lebe-lebe Jesus padahal nggo iteh kalak e maka la banci ibuat Jesus. Ikataken kalak e ka, “Adi Raja Kalak Jahudi kin kam, selamatken dage bandu.” (Lukas 23:​36, 37) Cuba ukuri enda! Jesus kap dalan, kebenaren, ras kegeluhen, tapi gundari ia isiksa ras ihina! Amin pe bage, Jesus tetap tenang. La irawaina kalak Jahudi si sangana ngenen-ngenen ia, prajurit Roma si nghina ia, bage pe dua penjahat si ipakuken i sampingna.

Kenca e, ibuat empat prajurit e uis Jesus si arah darat jenari irigatkenna jadi empat bagin. Iban kalak e ka undi guna meteh ise si ndatken tep-tep baginna. Uis Jesus si arah bas, seh kel jilena, “datas nari seh ku teruh uis e la lit penjarumenna.” Nina prajurit-prajurit e, “Uis si e ula sirigatken. Mari siban undi guna nentuken man ise uis e.” Alu bage ayat enda nggo terjadi, “Irigatken janah ibagiken kalak e uisku si arah darat man dirina sendiri janah iban kalak e undi man uisku si arah bas.”​—Johanes 19:​23, 24; Masmur 22:19.

Paksa si e, sekalak penjahat e nggo sadar maka Jesus e pastilah sekalak raja. Ipersingetina penjahat si sada nari, “La kin kam mbiar man Dibata? Seri kap ukumenndu ras ia. Adi kita nggo patut iukum sue ras perbahanenta. Tapi dilaki enda la lit salahna.” Kenca si e mindo ia man Jesus, “Inget min aku sanga kam masuk ku Kerajanndu.”​—Lukas 23:​40-​42.

Nina Jesus ngaloi, “Situhuna kukataken bandu wari enda: Kam ras aku i Pardis pagi.” (Lukas 23:43) Janji enda beda ras janji Jesus man rasul-rasulna eme ikut pagi kalak e merentah ras Jesus bas Kerajan Dibata. (Matius 19:28; Lukas 22:​29, 30) Penjahat e kalak Jahudi, banci saja nggo pernah ibegina kerna Pardis i doni si tangtangna iban Dibata jadi ingan Adam ras Hawa bage pe kesusurenna. Gundari nggo lit arapen penjahat e guna nggeluh i Pardis.