Jesus nggo dung ngajar i Deleng Saitun. Enggo ijawap Jesus penungkunen empat rasulna kerna kerehenna ras pendungi jaman enda.

Seh kel sibukna Jesus i bas tanggal 11 Nisan. Sanga kalak e mulih arah Betani nari i bas berngi wari, nina Jesus man rasul-rasul, “Iteh kena maka dua wari nari Paskah irayaken, janah Anak manusia iserahken pagi guna iukum mate i bas tiang.”​—Matius 26:⁠2.

I bas wari Selasa, irawai Jesus peminpin-peminpin agama janah ikatakenna kejahaten kalak e i lebe-lebe jelma si nterem. Perban si e, ibunuh kalak e atena Jesus. Emaka paginna bas wari Rabu tanggal 12 Nisan, Jesus ras rasul-rasulna la ku japa pe gelah ula idah jelma si nterem. La ate Jesus lit si ngambati ia ngerayaken Paskah ras rasul-rasulna i bas tanggal 14 Nisan, eme kenca matawari ndabuh.

Tapi iban imam-imam kepala ras peminpin kalak Jahudi rencanana ope lenga Paskah. Pulung kalak e i rumah imam si mbelin eme Kayapas. Engkai? Merawa kalak e perban iceritaken Jesus kejahaten kalak e. Gundari arih-arih kalak e “nangkap Jesus alu cara si licik guna munuh ia.” Uga carana ras ndigan ilakokenna? Ning kalak e, “Ula sanga perayan, gelah ula guntar jelma si nterem.” (Matius 26:​4, 5) Mbiar kalak e perban nterem jelma jadi atena Jesus.

Rempet reh tamu peminpin-peminpin agama e. Sengget kel kalak e, perban tamu e eme Judas Iskariot, rasul Jesus. Nggo ipengaruhi Setan ia gelah ihianatina Tuanna! Isungkun Judas kalak e, “Kai kari si ibereken kena bangku adi kuserahken ia man kena?” (Matius 26:15) Meriah kel ukur kalak e megisa emaka ‘ijanjiken kalak e mere sen pirak bana.’ (Lukas 22:⁠5) Sekai buena? Erjanji kalak e mereken 30 sen pirak, enda erga sekalak budak. (Keluaren 21:32) Sitik pe la merga iakap peminpin-peminpin agama e nandangi Jesus. Gundari mulai me ‘idarami Judas kesempaten si cocok guna nerahken Jesus man kalak e alu la iteh jelma si nterem.’​—Lukas 22:6.

Tanggal 13 Nisan imulai i bas wari Rabu kenca matawari ndabuh. Janah enda wari peenemken ras berngi si terakhir Jesus i Betani. Paginna, wari si terakhir erban persikapen guna Paskah. Anak biri-biri arus nggo lit gelah banci igeleh ras kerina ipanggang kenca tanggal 14 Nisan imulai. I ja kalak e man pangan Paskah janah ise si nikapkenca? Lenga ituriken Jesus alu jelas. Emaka, la banci ikataken Judas kerna si e man imam-imam kepala.

Banci saja i bas wari Kamis ciger i Betani, isuruh Jesus me Petrus ras Johanes, nina, “To laweslah, sikapken pangan Paskahta.” Nina kalak e, “I ja atendu isikapken kami?” Ijawap Jesus, “Sanga masuk kena ku bas kota, lit kari sekalak dilaki si maba kudin taneh ingan lau njumpai kena. Ikutken ia ku rumah si imasukina. Kataken man tuan rumah e, ‘Bagenda nina Guru, “I ja ruang tamu si banci jadi inganku man pangan Paskah ras murid-muridku?”’ Icidahken dilaki e kari man kena sada ruangen si mbelang i das loteng, si nggo isikapken gelah sipake. Sikapkenlah pangan Paskahta i je.”​—Lukas 22:​8-​12.

Tuan rumah e pastilah murid Jesus. Banci saja nggo itehna maka ate Jesus make rumahna. Sanga lawes dua rasul e ku Jerusalem, kerina si ijumpai kalak e pas bagi si ikataken Jesus. Emaka isikapken kalak e me anak domba ras kerina keperlun si deban guna Paskah i je. Isikapken kalak e guna Jesus ras 12 rasulna.