Gundari wari Jumat tanggal 14 Nisan karaben. Kenca ndabuh kari matawari, nggo mulai wari Sabat tanggal 15 Nisan. Jesus nggo mate, tapi dua kalak perampok si lit i sebelahna nggeluh denga. Menurut Undang-Undang Musa, mayat si igantung i bas sada tiang la banci ipediat i je erberngi, tapi mayat e “arus ikuburken i bas wari e.”​—Ulangen 21:​22, 23.

Wari Jumat igelari wari Persikapen erkiteken nterem jelma nikapken pangan ras dahin si debanna si arus idungi ope lenga wari Sabat. Kenca ndabuh matawari imulai me “Sabat si mbelin.” (Johanes 19:31) Ikataken Sabat si mbelin erkiteken i bas wari e lit dua Sabat. Pertama, tanggal 15 Nisan e wari Sabtu eme Sabat tiap minggu. Peduaken, tanggal 15 Nisan e wari pertama i bas Perayan Roti si La Itama Ragi si rusur ijadiken Sabat.​—Imamat 23:​5, 6.

Emaka ipindoken kalak Jahudi man Pilatus gelah reh terna ibanna Jesus ras dua perampok si lit i sebelahna e mate. Uga carana? Alu menggelken nahe kalak e. Sebap adi nggo penggel nahe kalak e lanai banci iangkat kalak e dagingna guna erkesah. Emaka ipenggelken prajurit e me nahe dua perampok e. Tapi Jesus nggo mate, emaka la ipenggelken kalak e nahena. Kejadin e erban nubuat si lit i Masmur 34:21 terjadi. Nina, “Badanna tetap ikawali [Jahwe], e maka la lit sada pe tulanna si penggel.”

Guna mastiken Jesus nggo mate ntah lang, itebak prajurit e me tulan rangrang Jesus kenca si e “ndarat dareh ras lau.” (Johanes 19:34) Si e sue ras ayat si ngataken, “Itatapna kalak si enggo itebakna.”​—Sakaria 12:10.

I je lit Jusup si ngidah Jesus iukum mate. Ia “sekalak dilaki si bayak” janah ia anggota Pengadilen Agama Jahudi si ihamati. (Matius 27:57) Ia ikataken “kalak si bujur ras benar,” si “nimai Kerajan Dibata.” Situhuna, “Jusup e pe murid Jesus ka, tapi la ipebetehkenna man kalak si deban perban mbiar ia man kalak Jahudi.” Janah labo ia setuju nandangi keputusen si iban man Jesus. (Lukas 23:50; Markus 15:43; Johanes 19:38) Situhuna mbiar nge Jusup tapi ipala-palaina mindo mayat Jesus man Pilatus. Ilebuh Pilatus me prajurit si ngawasi Jesus e si mastiken Jesus nggo mate. Kenca ikatakenna Jesus nggo mate, ibereken Pilatus pemindon Jusup ndai.

Itukur Jusup kain linen si bersih ras halus. Jenari ipenusurna mayat Jesus arah tiang nari janah ibalutina alu uis e guna ikuburken. Nikodemus “si mbarenda pernah reh ndahi Jesus berngi-berngi,” ikut nikapken penguburen Jesus. (Johanes 19:39) Ibabana kira-kira 30 kilogram campuren mur ras gaharu si merga. Ibaluti me mayat Jesus alu kain-kain si itama campuren rempah-rempah, bali bagi kebiasan penguburen kalak Jahudi.

Lit kuburen si mbaru si ipahat i uruk batu i je. Ku bas me itama kalak e mayat Jesus. Jenari igulingken kalak e me batu si galang nutup kuburen e. Merudu kalak e ngelakokenca erkiteken kentisik nari nggo wari Sabat. Banci saja Maria Magdalena ras Maria nande Jakup si Kitik ikut nikapken penguburen Jesus. Gundari merudu kalak e ku rumah guna “nikapken rempah-rempah ras minak” si itamaken pagi ku mayat Jesus kenca lewat wari Sabat.​—Lukas 23:56.

Paginna i bas wari Sabat, imam-imam kepala ras kalak Parisi njumpai Pilatus. Nina kalak e, “Inget kami kai si kataken penipu e sanga ia nggeluh denga, nina, ‘Kenca telu wari, ipekeke me aku.’ Emaka, perentahkenlah gelah kuburen e ijaga seh wari si peteluken, gelah ula reh murid-muridna janah itangkona mayat e, jenari nina man kalak, ‘Enggo ipekeke ia i bas si mate nari!’ Adi bage, penipun si terakhir enda keleken kari asangken si pertama.” Nina Pilatus, “Banci ibaba kena penjaga. Te kena jagalah kuburen e asa ngasup kena.”​—Matius 27:​63-​65.

I bas pagi-pagi si lampas i bas wari Minggu, ibaba Maria Magdalena, Maria nande Jakup si Kitik me rempah-rempah ku kuburen Jesus. Nina kalak e sapih-sapih ia, “Ise kari nampati kita nggulingken batu si nutupi kuburen e?” (Markus 16:⁠3) Tapi mbaru denga terjadi gempa. Janah malekat Dibata nggo nggulingken batu e, lanai lit si njaga kuburen e janah kuburen e nggo kosong!