Ngerana denga Jesus ras rasul-rasulna si setia guna mpegegehi kalak e. Enggo berngi wari, banci saja nggo lewat tengah berngi. Gundari iceritaken Jesus sada perumpaman:

Nina, “Aku kap batang anggur situhu-tuhu, janah Bapakku kap perjuma anggur e.” (Johanes 15:⁠1) Perumpamanna e bali bagi si ikataken ratusen tahun si lewat kerna bangsa Israel si ikataken bagi batang anggur Jahwe. (Jeremia 2:​21; Hosea 10:​1, 2) Tapi nggo itulak Jahwe bangsa e. (Matius 23:​37, 38) Emaka Jesus me batang anggur e, si mulai iperjumai Bapakna alu kesah si badia mulai tahun 29 M. Tapi batang anggur e labo ngenca ngertiken Jesus, nina:

“Dahan-dahan si la erbuah itektekNa [Bapakku], janah dahan-dahan si erbuah ibersihkenNa gelah reh buena buahna. . . . Dahan la banci erbuah adi la kin ersada dahan e ras batangna. Bage ka pe kena adi la kin ersada ras aku, la banci erbuah. Aku kap batang anggur e janah kena me dahan-dahanna.”​—Johanes 15:​2-5.

Erjanji Jesus man rasul-rasulna si setia, adi nggo lawes ia pagi, ikirimna pagi si nampati kalak e eme kesah si badia. Lima pulu sada wari kenca si e, sanga ialoken rasul-rasul ras kalak si deban kesah si badia e, kalak e jadi dahan-dahan batang anggur e. Janah kerina “dahan-dahan” e arus tetap ersada ras Jesus. Engkai?

Nina Jesus, “Ise pe si tetap ersada ras aku janah aku ersada ras ia, melala me buah si ihasilkenna. Adi la kin ras aku, labo kai pe banci ilakoken kena.” “Dahan-dahan” e eme pengikut Jesus si setia si ngasilken melala buah, si ngusih sipat-sipat Jesus, rajin erberita, ras si erban murid. Kai si terjadi man kalak si la tetap ersada ras Jesus janah la ngasilken buah? Nina Jesus, “Ise pe si la tetap ersada ras aku, ia bali bagi dahan si iambekken.” Selain si e nina Jesus ka, “Adi tetap kena ersada ras aku, janah kata-kataku tetap lit i bas pusuh kena, pindolah kai si ate kena ipindo kena, e pasti ibereken man kena.”​—Johanes 15:​5-7.

Enggo dua kali icakapken Jesus kerna kai si pentingna eme terus ngelakoken perentah-perentahna. (Johanes 14:​15, 21) Ijelasken Jesus uga carana gelah murid-muridna banci ndalanken perentah-perentahna, nina, “Adi ipatuhi kena perentah-perentahku, kena tetap i bas keleng ateku. Bali bagi aku nggo matuhi perentah-perentah Bapak janah aku tetap i bas kekelengenNa.” Tapi la bias ngkelengi Dibata Jahwe ras AnakNa saja. Nina Jesus, “Enda me perentahku: Sikeleng-kelengenlah kena, bali bagi aku nggo ngkelengi kena. Labo lit keleng ate si belinen asangken kalak si nggit mereken geluhna guna teman-temanna. Kena kap teman-temanku adi ilakoken kena kai si kuperentahken.”​—Johanes 15:​10-​14.

Piga-piga jam nari, ibuktiken Jesus me kekelengenna alu mereken kegeluhenna man kerina kalak si erkiniteken man bana. Usihen si iberekenna e arusna erban pengikut-pengikutna nggit erkorban nandangi sada ras si debanna bagi si ilakoken Jesus. Kekelengen e jadi tanda man kalak e. Bali bagi si nggo pernah ikataken Jesus, “Adi kena sikeleng-kelengen, kerina kalak meteh maka kena me murid-muridku.”​—Johanes 13:35.

Nina Jesus man rasul-rasulna, “Kugelari kena teman-temanku, perban nggo kupebetehken man kena kerina si nggo kubegi arah Bapakku nari.” Seh kel rembakna Jesus ras rasul-rasulna janah banci iteh kalak e kai si ikataken Bapak man Jesus! Adi terus ate kalak e ersada ras Jesus kalak e pe arus terus ‘ngasilken buah.’ Adi ilakoken kalak e bage, nina Jesus, “Kai pe si ipindo kena man Bapak i bas gelarku, iberekenNa nge [pagi] man kena.”​—Johanes 15:​15, 16.

 “Dahan-dahan” e eme murid-murid Jesus. Jadi, kekelengen si lit i tengah-tengah kalak e banci erban kalak e megenggeng ngadapi kai si nandangi terjadi. Ipersingeti Jesus kalak e maka segat pagi ate doni man kalak e. ”Adi segat ate doni enda kena, ingetlah nggo leben segat atena aku. Adi kena jadi bagin i bas doni enda, ikelengi doni enda nge kena, perban kena jangna. Gundari kena lanai jadi bagin doni enda, . . . perban si e me maka segat ate doni nandangi kena.”​—Johanes 15:​18, 19.

Ijelasken Jesus ka alasen si deban ngkai maka segat ate doni enda kalak e, nina Jesus, “Kerina si enda ilakoken kalak e man kena erkiteken gelarku, perban la itandai kalak e Ia si nuruh aku.” Ikataken Jesus maka adi lit si nggo ngidah mukjizat Jesus tapi rate segat man bana, berarti kalak e erdosa. Nina Jesus, “Bicara la pernah kulakoken pendahin-pendahin si lenga pernah ilakoken kalak si deban, labo kalak e erdosa. Tapi gundari, nggo idah kalak e aku janah segat ka atena aku ras Bapakku.” Situhuna, arah perbahanen kalak e terjadi me kai si nggo inubuatken.​—Johanes 15:​21, 24, 25; Masmur 35:19; 69:5.

Sekali nari, ijanjiken Jesus ka ngirim penampat eme kesah si badia. Kuasa si megegeh e ibereken man kerina pengikutna janah banci nampati kalak e gelah erbuah eme ersaksi kerna Jesus.”​—Johanes 15:27.