Mbaru denga ijawap Jesus penungkunen murid-muridna kerna tanda kerehenna ras pendungi jaman enda. Gundari, iceritaken Jesus sada perumpaman si ncidahken uga pagi keadanna i bas masa kerehenna. Perumpaman e iceritakenna gelah iteh murid-muridna uga arusna perbahanen kalak e i bas masa kerehenna.

Iceritaken Jesus perumpamanna, “Kerajan surga banci ipeseri ras sepuluh singuda-nguda si maba lampuna janah lawes ngalo-ngalo penganten si dilaki. Lima kalak si motu, janah lima kalak nari pentar.”​—Matius 25:​1, 2.

Maksud Jesus labo maka kalak si masuk ku Kerajan surga e setengah kalak si motu janah setengah nari kalak si pentar. Maksud Jesus eme kerina murid-muridna banci milih nggit ntah lang ia erjaga-jaga. Tapi tek Jesus maka kerina muridna banci tetap setia janah ipasu-pasu Bapakna.

I bas perumpaman e, sepuluhna singuda-nguda e lawes ndarat guna ngalo-ngalo penganten si dilaki janah ngikutken acara perjabun. Kenca seh penganten e, ipegara singuda-nguda e lampuna, janah ibabai penganten e kalak e ku rumah si nggo isikapkenna man kalak e. Tapi kai si terjadi?

Ijelasken Jesus, “Si motu e maba lampuna tapi la ibabana minakna, si pentar e maba lampuna ras minakna tare botol. Sanga penganten si dilaki melawen reh, kerina kalak e munduk-unduk dungna terpedem.” (Matius 25:​3-5) Penganten dilaki e melawen reh. Kenca nggo ndekah kalak e nimai, dungna terpedem kalak e. Banci saja iinget rasul-rasul kerna sekalak bangsawan si lawes ndauh janah ‘mulih me ia kenca ia jadi raja.’​—Lukas 19:​11-​15.

I bas perumpaman kerna sepuluh singuda-nguda e, ijelasken Jesus kai pagi si terjadi sanga penganten e nggo reh, “I bas tengah berngi terbegi sora, ‘Enda penganten si dilaki ndai! Ndaratken, alo-alolah ia.’” (Matius 25:⁠6) Kerina nge singuda-nguda e ersikap guna ngalo-ngalosa?

Nina Jesus, “Emaka medak me kerina singuda-nguda ndai janah isikapkenna lampuna. Nina si motu e man si pentar, ‘Bereken sitik minak kena man kami, sebap nggo mate atena lampu kami.’ Ngaloi si pentar, ‘Banci saja lanai kari bias man kami bage pe man kena. Laweslah ku si ndayakenca, janah tukurlah jang kena.’”​—Matius 25:​7-​9.

Lima singuda-nguda si motu e la ersikap-sikap janah la erjaga-jaga sanga reh penganten e. La bias minak lampu kalak e emaka arus idaramina lebe. Nina Jesus, “Sanga lawes kalak e nukursa, reh me penganten si dilaki. Singuda-nguda si nggo ersikap ndai masuk ras ia ku bas pesta perjabun, kenca si e pintu itutup. Kenca bage, reh ka me singuda-nguda si motu ndai, nina, ‘Pak, Pak, buka min pintu e!’ Ngaloi ia, ‘Situhuna, la kena kutandai.’” (Matius 25:​10-​12) Seh kel sedihna akibatna adi la ersikap-sikap ras erjaga-jaga!

Iangkai rasul-rasul maka penganten e maksudna eme Jesus. Erkiteken pernah ipeseri Jesus dirina ras sekalak penganten. (Lukas 5:​34, 35) Uga kerna singuda-nguda si pentar e? Sanga icakapkenna kerna “rarasen si kitik” si ngaloken Kerajan, ikataken Jesus bagenda, “Erbajulah ras ersikaplah, janah pastikenlah lampu kena tetap gara.” (Lukas 12:​32, 35) Emaka i bas perumpaman kerna singuda-nguda e, iteh rasul-rasul si maksud Jesus eme kalak si setia si bali bagi kalak e. Jadi arah perumpaman e kai persinget si ate Jesus ipesehna?

Jelas kel ikataken Jesus i bas akhir perumpamanna e, nina, “Emaka, teruslah erjaga-jaga sebap la iteh kena wari ntah pe jamna.”​—Matius 25:13.

Jadi kerna kerehen Jesus inasehatina pengikutna si setia gelah ‘terus erjaga-jaga.’ Reh me Jesus pagi, emaka arus kalak e ersikap-sikap ngalo-ngalosa bagi lima singuda-nguda si pentar ndai. Alu bage, banci terus inget kalak e arapen si seh kel ergana janah banci ialoken kalak e.