Jesus ras empat rasulna i Deleng Saitun denga janah iceritakenna ka perumpaman si deban. Piga-piga wari si lewat sanga Jesus i Jeriho, iceritakenna perumpaman kerna mina si mbuktiken maka Kerajan Dibata merentah i bas wari si pepagi. Gundari iceritakenna ka perumpaman si deban si seri ras perumpaman e. Perumpaman e bagin arah penjelasenna kerna kerehenna ras pendungi jaman enda. Inasehati Jesus murid-muridna gelah rajin ngelakoken dahin si nggo ibereken man kalak e.

Nina Jesus, “Kerajan e bali bagi sekalak dilaki si lawes atena ku luar negri, ilebuhna budak-budakna janah ipercayakenna erta-ertana man kalak e.” (Matius 25:14) Nggo pernah ipeseri Jesus dirina ras sekalak dilaki si lawes ku luar negri guna “ndatken kuasa selaku raja.” Emaka menukah iakap rasul-rasul ngangkaisa maka Jesus me “dilaki” si sangana icakapkenna e.​—Lukas 19:12.

Ope lenga dilaki e lawes ku luar negri, iberekenna ertana man budak-budakna. Sedekah Jesus ngelayani telu setengah tahun, tutus atena erberita si meriah kerna Kerajan Dibata. Janah iberekenna pelatihen man murid-muridna ngelakoken dahin e. Lanai ndekahsa lawes me Jesus, tek kel ia maka ilakoken murid-muridna nge pagi kai si nggo iajarkenna man kalak e.​—Matius 10:7; Lukas 10:​1, 8, 9; bandingken Johanes 4:​38; 14:12.

I bas perumpaman e, uga dilaki e mbagiken ertana? Nina Jesus, “Sekalak iberekenna lima talenta, sekalak nari dua, janah sekalak nari ka sada menurut kengasupenna sekalak-sekalak. Kenca si e lawes ia ku luar negri.” (Matius 25:15) Kai si ilakoken budak-budak e nandangi erta e? Tutus nge ate kalak e nggunakenca guna kepentingen tuanna? Nina Jesus man rasul-rasulna:

“Si ngaloken lima talenta mis lawes janah ipakena talenta e erban usaha, janah idatna lima talenta untungna. Bage ka pe, si ngaloken dua talenta, datna ka untung dua talenta. Tapi budak si ngaloken sada talenta, lawes janah ikurakna taneh kenca si e ibunikenna sen tuanna e.” (Matius 25:​16-​18) Kai si terjadi paksa mulih tuan kalak e?

Nina Jesus, “Kenca nggo ndekah, reh me tuan budak-budak e janah erkira ia ras kalak e.” (Matius 25:19) Dua budak e nggo erdahin “menurut kengasupenna sekalak-sekalak.” Duana budak e rajin, kerja keras, janah erta si ibereken man kalak e mereken asil. Budak si ngaloken lima talenta, hasilna lima talenta. Si ngaloken dua talenta, hasilna dua talenta ka. (Paksa si e, sada talenta eme upah sekalak jelma si erdahin 19 tahun dekahna.) Duana budak e ipujiken tuanna, nina, “Merandal kel, kam budak si mehuli ras setia! Setia kam i bas si kitik. Kupilih kam ngurus si terbuen. Ikutlah ermeriah ukur ras tuanndu.”​—Matius 25:21.

Beda ras budak si ngaloken sada talenta. Nina, “O Tuan, kuteh kam kalak si nggit nuntut. Iperanindu kai si labo isuanndu janah ipepulungndu kai si labo ipiarindu. Emaka mbiar aku, jenari lawes aku muniken talentandu e i bas taneh. Enda, kuulihken bandu.” (Matius 25:​24, 25) La isimpanna sen tuanna e ku bank gelah banci ialoken tuanna bunga senna e. Emaka nggo rugi ibanna tuanna e.

Cocok kel ikataken tuanna e ia kalak “jahat ras perkisat.” Dungna ibuat me talenta si nggo ibereken man bana ndai janah ibereken man budak si rajin. Emaka nina tuan e, “Man kalak si lit bas ia ibereken terbuen, janah si lit i bas ia e reh buena me. Tapi man kalak si la lit bas ia, si lit i bas ia e pe ibuat i bas ia nari.”​—Matius 25:​26, 29.

Iukuri murid-murid kel kerna perumpaman e. Banci iteh kalak e kai si ipercayaken Jesus man kalak e eme erban murid-murid. Dahin e seh kel pentingna. Janah iarapken Jesus gelah rajin kalak e ngelakokenca. Labo iarapken Jesus gelah seri asil si idat kalak e i bas dahin erberita. Bagi perumpaman ndai, tiap kalak arus min ngelakokenca “menurut kengasupenna sekalak-sekalak.” Jesus pasti la senang adi lit kalak si “perkisat” janah la tutus ngelakoken dahin si nggo ibereken Jesus man bana.

Pasti seh kel riahna ukur rasul-rasul megi kata-kata enda, “Man kalak si lit bas ia ibereken terbuen”!