Pelayanen Jesus nggo nandangi dung. Lalap igunaken Jesus perumpaman-perumpaman guna ncidahken uga situhuna ahli-ahli Undang-Undang Musa ras imam-imam kepala. Perban si e, ibunuh kalak e atena Jesus. (Lukas 20:19) Tapi lalap ituriken Jesus perbahanen kalak e. Iceritaken Jesus ka perumpaman si deban:

“Kerajan surga e banci ipeseri ras sekalak raja si erban pesta perjabun man anakna si dilaki. Isuruhna budak-budakna ngelebuh kalak si iundang ku pesta perjabun e, tapi kalak e la nggit reh.” (Matius 22:​2, 3) Imulai Jesus perumpaman e alu ngataken “Kerajan surga.” Pastilah “raja” e maksudna Dibata Jahwe. Ise anak raja e ras ise si iundangna bas pesta perjabun e? Anak raja eme Anak Jahwe, si sangana nceritaken perumpaman e. Si iundang e eme kalak si merentah pagi ras Anak Dibata i bas Kerajan surga.

Ise si pertama iundang? Janah, ise si megiken Jesus ras rasul-rasulna sanga kalak e erberita kerna Kerajan? Kalak e eme kalak Jahudi. (Matius 10:​6, 7; 15:24) Bangsa e ngaloken perjanjin Undang-Undang Musa bas tahun 1513 SM, alu bage kalak e si pertama jadi anggota ‘si ipinpin imam-imam.’ (Keluaren 19:​5-8) Tapi ndigan kalak e situhuna iundang ku “pesta perjabun”? Kalak e iundang bas tahun 29 M sanga Jesus mulai mberitaken kerna Kerajan surga.

Kai si ilakoken kalak Israel sanga ndatken undangen e? Bagi si ikataken Jesus, ‘kalak e la nggit reh.’ Melala arah peminpin-peminpin agama bage pe kalak si deban la nggit ngaloken Jesus jadi Mesias ras Raja si ipilih Dibata.

Tapi ibereken Jesus kesempaten si deban man kalak Jahudi, “Isuruh [raja] ka mulihi budak-budak si deban, nina, ‘Kataken man kalak si iundang, “Enggo kusikapken pangan, lembu-lembu ras asuh-asuhen si mbur nggo ipotong janah kerinana nggo sikap. Rehlah ku pesta perjabun e.”’ Tapi la diate kalak e janah lawes ia, deba ku jumana, si debanna ndahiken usahana. Lit ka si nangkap budak-budak e, ipekpekina, janah ibunuhna.” (Matius 22:​4-6) Bage me pagi si terjadi sanga runggun Kristen ibentuk. Sanga si e kalak Jahudi ibere kesempaten masuk ku Kerajan, itulak kalak e undangen e janah ianiaya kalak e ‘budak-budak raja.’​—Perbahanen Rasul-Rasul 4:​13-​18; 7:​54, 58.

Kai si dungna terjadi man bangsa e? Ijelasken Jesus, “Merawa kel raja, emaka isuruhna pasukenna janah ibunuhna pemunuh e ras itutungna kota kalak e.” (Matius 22:7) E me si terjadi man kalak Jahudi bas tahun 70 M sanga kalak Roma ngkernepken “kota kalak e” eme Jerusalem.

Lanai nge lit kalak si nggit iundang? Ikataken Jesus i bas perumpamanna, nina, “Kenca si e ikatakenna man budak-budakna, ‘Pesta perjabun nggo sikap, tapi kalak si iundang e la cocok reh. Erkiteken si e, laweslah ku dalan-dalan si nuju ku darat kota, janah undang ise pe si ijumpai kena ku pesta perjabun e.’ Emaka, lawes budak-budak e ku dalan-dalan janah ipepulungna kerina si ijumpaina, si jahat bage pe si mehuli. Emaka dem tamu bas ingan acara perjabun e.”​—Matius 22:​8-​10.

Si e terjadi sanga rasul Petrus mulai nampati kalak si labo Jahudi gelah jadi kalak Kristen. Bas tahun 36 M, sekalak perwira Roma eme Kornelius ras keluargana ngaloken kesah si badia, bagi si ikataken Jesus kalak enda banci merentah ras ia bas Kerajan surga.​—Perbahanen Rasul-Rasul 10:​1, 34-​48.

Ikataken Jesus maka labo kerina kalak si reh ialoken “raja.” Nina Jesus, “Sanga reh raja guna mereksa tamu-tamu, idahna sekalak dilaki si la make baju pesta. Emaka isungkunna ia, ‘O Teman, uga maka banci kam masuk ku jenda alu la make baju pesta?’ Sinik saja ia. Emaka nina raja man pelayan-pelayanna, ‘Iket tan ras nahena janah ambekken ia ku darat, ku bas kegelapen. I je me kari ia tangis janah erderep ipenna.’ Sebap nterem si iundang, tapi sitik si ipilih.”​—Matius 22:​11-​14.

Banci saja labo iangkai peminpin-peminpin agama kai si ikataken Jesus. Amin pe bage, kalak e la senang janah tetap ibunuhna atena Jesus si nggo erban kalak e mela.