Kenca Jesus itangkap i Taman Getsemane, kiamen rasul-rasul perban mbiar. Tapi lit dua rasul si berubah pikiren. Banci saja iikutken kalak e Jesus ibaba ku rumah Annas. Kalak e eme Petrus “ras sekalak murid si deban,” banci saja Johanes. (Johanes 18:15; 19:35; 21:24) Sanga isuruh Annas gelah ikirim Jesus ku Imam si Mbelin Kayapas, iikutken Petrus ras Johanes dauh-dauh nari. Banci saja mbiar kalak e mate tapi kuatir ka kalak e nandangi Tuanna.

Itandai imam si mbelin e Johanes, emaka banci ia masuk ku halamen rumah Kayapas e. Petrus tetap i darat nimai Johanes mulih janah ngerana ras sekalak pelayan si diberu si njaga pintu. Emaka ipediatna me Petrus masuk.

Mbergeh kel berngi e, emaka ipegara kalak e api i halamen e guna cudu. Kundul Petrus ras kalak e gelah la ia bergehen janahna “ngenen kai kari si terjadi” man Jesus. (Matius 26:58) Perban i deher api e dungna banci idah diberu si njaga pintu ndai Petrus alu jelas. Nina diberu e, “La kin kam pe muridna ka nge?” (Johanes 18:17) Kalak si deban si lit i je pe itandaina dungna Petrus janah bage ka nina kalak e.​—Matius 26:​69, 71-​73; Markus 14:70.

Megi si e merawa Petrus. Janah ipersokenna maka ia murid Jesus, nina, “La ia kutandai, janah la kuangka kai si ikatakenndu e.” Jenari lawes i ku gerbang gelah ulanai itandai kalak. (Markus 14:​67, 68) Selain si e, “ersumpah” ka ia maka nggit ia isumpahi adina erbual kin ia.​—Matius 26:74.

Ingan Jesus iadili e i bagin datas i rumah Kayapas. Banci idah Petrus ras kalak si lit i teruh i halamen e saksi-saksi si ku bas ras ku darat ingan pengadilen e.

Perban logat Petrus ngerana bagi kalak Galilea, tek kalak e maka Petrus e murid Jesus. Sekalak arah kalak e nari eme kade-kade Malkus si cupingna ipotong Petrus. Nina, “La kin kam si kuidah ras ia i bas taman?” Sanga ipersokenna Jesus petelu kaliken, tekuak me manuk bagi si nggo ikataken Jesus e.​—Johanes 13:38; 18:26, 27.

Paksa si e, Jesus sangana cinder bas ingan si banci idahna ku teruh ku halamen. Itulihken Jesus janah itatapna Petrus. Inget Petrus kai mbaru denga ikataken Jesus sanga kalak e i bas loteng. Cuba bayangken uga perasan Petrus ngidah perbahanenna e! Lawes me Petrus ku darat janah nderkuh ia tangis.​—Lukas 22:​61, 62.

Engkai maka banci terjadi bage? Uga maka Petrus si paguh kinitekenna ras setia, banci mersoken Tuanna? Jesus labo ersalah, tapi ia ijebak ras ianggap penjahat si kejam. Arusna ibela Petrus nge Jesus. Tapi itadingkenna Anak Dibata si kata-katana “mereken kegeluhen si rasa lalap.”​—Johanes 6:68.

Pengalamen Petrus enda mbuktiken maka umat Dibata si setia ras si semangat pe banci ndabuh adi la ia ngasup ngadapi percuban ras godan. Mbera pengalamen Petrus e banci erban kita reh metengetna!