I bas berngi si terakhir ras rasul-rasulna, ibereken Jesus pelajaren kerna meteruk ukur alu nuci nahe rasul-rasulna. Engkai enda cocok? Perban lit denga kelemahen kalak e. Memang semangat kalak e ngelayani Dibata, tapi tetap denga ate kalak e jadi kalak si mbelinna. (Markus 9:​33, 34; 10:​35-​37) Enda ka me si ilakoken kalak e i bas berngi e. 

“Turah ka me perubaten si mekelek kerna ise si mbelinna i bas kalak e.” (Lukas 22:24) Pasti sedih kel akap Jesus ngidah kalak e! Kai si ilakoken Jesus?

Labo irawai Jesus rasul-rasulna e, tapi alu sabar iajakna kalak e rukur. Nina Jesus man kalak e, “Raja bangsa-bangsa ngkuasai rakyatna, janah kalak si erkuasa nandangi kalak e igelari Kalak Melumbar. Tapi kena la banci bage. . . . Sebap si apai nge belinen, kalak si man ntah kalak si ngelai?” Kenca e iingetken Jesus kalak e kerna kai si nggo ilakokenna, nina, “Tapi aku i tengah-tengah kena jadi kalak si ngelai.”​—Lukas 22:​25-​27.

Aminna pe rasul-rasul Jesus kalak si la sempurna, tapi kalak e setia man Jesus gia melala kesuliten. Emaka nina Jesus man kalak e, “Kuban perjanjin ras kena bali bagi Bapakku nggo erban perjanjin ras aku guna sada kerajan.” (Lukas 22:29) Arah perjanjin e, ipastiken Jesus maka rasul-rasulna e ikut pagi merentah ras ia i bas Kerajan Dibata.

Amin pe luar biasa kel arapen rasul-rasul e, tapi kalak e tetap denga kalak si la sempurna. Nina Jesus, “Enggo ipindo Setan gelah ipiarina kena kerina bagi gandum.” (Lukas 22:31) Ipersingeti Jesus ka kalak e, “I bas berngi enda, kerina kari kena nadingken aku perban kai si nandangi terjadi bangku, sebap bagi si tertulis, ‘Kuserang pagi permakan e, janah merap pagi rarasen biri-biri e.’”​—Matius 26:31; Sakaria 13:7.

Alu pang nina Petrus, “Aminna pe kerina kalak nadingken kam perban kai si terjadi bandu, aku labo pagi nadingken kam!” (Matius 26:33) Ikataken Jesus maka i bas berngi e pe, ope lenga tekuak manuk dua kali, ipersoken Petrus kari ia. Tapi nina Jesus, “Nggo kutotoken kam gelah ula bene kinitekenndu, janah kenca kam jera dingen robah, pegegehilah senina-seninandu.” (Lukas 22:32) Tapi nina Petrus, “Aminna pe arus aku mate ras kam, pasti la kam kupersoken.” (Matius 26:35) Rasul-rasul si deban pe bage nina.

Nina Jesus man murid-muridna, “Kentisik nari ngenca aku ras kena. Idarami kena pagi aku, tapi kukataken man kena gundari bagi si nggo kukataken man kalak Jahudi, ‘Labo kena banci reh ku ingan si nandangi kudahi e.’” Janah nina ka, “Kubereken man kena perentah si mbaru: Sikeleng-kelengenlah kena. Bagi aku nggo ngkelengi kena, kena pe arus sikeleng-kelengen. Adi kena sikeleng-kelengen, kerina kalak meteh maka kena me murid-muridku.”​—Johanes 13:​33-​35.

Kenca ikataken Jesus maka lanai ndekah ia ras kalak e, nungkun Petrus, “Ku ja kin kam lawes Tuan?” Nina Jesus, “Gundari labo banci ikutkenndu aku ku ingan si nandangi kudahi e, tapi ikut nge kam pagi.” Mamang ate Petrus nina, “Engkai maka gundari la banci aku ikut ras kam Tuan? Nggit nge aku mate guna kam.”​—Johanes 13:​36, 37.

Gundari, icakapken Jesus pengalamen rasul-rasul paksa kalak e erberita i Galilea janah la lit ibaba kalak e ingan sen ntah pe kantong pangan. (Matius 10:​5, 9, 10) Isungkun Jesus kalak e, “Me labo kena kurang kai pe?” Ngaloi kalak e, “Lang!” Kenca si e ibereken Jesus petunjuk, “Adi lit ingan sen kena ntah pe kantong pangan kena, babalah. Adi la lit pedang kena, dayakenlah uis kena si arah darat guna nukursa. Sebap kai si tertulis arus terjadi bangku, eme, ‘Ipeseri kari ia ras kalak si ngelanggar undang-undang.’ Sebap kai si tertulis kerna aku paksana terjadi.”​—Lukas 22:​35-​37.

Si icakapken Jesus eme kerna ukumen mate si nandangi ialokenna, eme ipakuken i tiang radu ras penjahat. Kenca si e, pengikut Jesus pe isiksa. Iakap rasul-rasul e nggo siap kalak e ngadapi si e, nina, “O Tuan, nenlah! Lit dua pedang i jenda.” Nina Jesus, “Enggo bias ena.” (Lukas 22:38) Dungna, iajarken Jesus sada pelajaren si penting sanga lit sada rasulna si nggunaken pedang e.