Kenca Jesus ipekeke, iaturken Jesus gelah 11 rasulna banci njumpai ia bas deleng i Galilea. Lit 500 kalak murid-murid si deban i je, tapi piga-piga arah kalak e ragu denga. (Matius 28:17; 1 Korinti 15:6) Tapi kata-kata Jesus erban kalak e tek maka Jesus nggo nggeluh mulihi.

Ijelasken Jesus maka nggo ibereken Dibata man bana kuasa nandangi surga bage pe doni. Nina Jesus, “Emaka, laweslah, banlah kalak i bas kerina bangsa jadi murid-muridku, peridikenlah kalak e i bas gelar Bapa ras Anak ras kesah si badia, ajarlah kalak e ngelakoken kerina si nggo kuperentahken man kena.” (Matius 28:​18-​20) Jelas me kenca Jesus ipekeke tetap denga ia ermediate nandangi berita si meriah.

Kerina pengikut Jesus termasuk si dilaki, si diberu, bage pe anak-anak ngaloken petunjuk si seri guna erban murid. Si la senang man berita e banci saja icubakenna gelah dahin erberita ras ngajar ngadi. Tapi nina Jesus, “Kerina kuasa i surga ras i doni nggo ibereken man bangku.” Kai ertina e man pengikut-pengikutna? Nina Jesus man kalak e, “Ingetlah! Katawari pe aku tetap ras kena seh ku kedungen jaman enda.” Labo maksud Jesus maka kerina kalak si meritaken berita si meriah banci ngelakoken mukjizat. Tapi kalak e isampati alu kesah si badia.

Kenca Jesus ipekeke “lit 40 wari” dekahna ia rusur ndahi murid-muridna. “Iberekenna melala bukti man kalak e si ncidahken maka ia nggo nggeluh,” ras iberitakenna ka “kerna Kerajan Dibata.”​—Perbahanen Rasul-Rasul 1:3; 1 Korinti 15:7.

Banci saja sanga rasul-rasul i Galilea denga, isuruh Jesus kalak e mulih ku Jerusalem. Sanga jumpa Jesus ras kalak e i je, nina, “Ula tadingken Jerusalem, tapi teruslah timai kai si nggo ijanjiken Bapak, bagi si nggo ibegi kena; sebap Johanes mperidiken alu lau, tapi lanai ndekah kena iperidiken alu kesah si badia.”​—Perbahanen Rasul-Rasul 1:​4, 5.

Kenca si e, ijumpai Jesus ka rasul-rasulna. Ibaba Jesus “kalak e ku Betani,” i daerah timur Deleng Saitun. (Lukas 24:50) Aminna pe nggo melala ibereken Jesus penjelasen maka ia nggo nandangi lawes, iakap kalak e denga maka Kerajan Jesus e i doni.​—Lukas 22:​16, 18, 30; Johanes 14:​2, 3.

Isungkun rasul-rasul me Jesus, “O Tuan, gundari kin atendu majekken kerajan Israel mulihi?” Ijawap Jesus, “Kerna waktu ras masana, Bapak nge si nentukenca. La perlu iteh kena kerna si e.” Mulihi ka iingetken Jesus kerna kai si arus ilakoken kalak e, “Ialoken kena pagi kuasa sanga nusur kesah si badia ku kena, janah kena pagi jadi saksiku i Jerusalem, i belang-belang Judea ras Samaria, bage pe seh ku ujung doni.”​—Perbahanen Rasul-Rasul 1:​6-8.

Rasul-rasul sangana i Deleng Saitun sanga idahna Jesus manjar-anjar terangkat ku surga. Minter Jesus itutupi embun emaka lanai idah kalak e ia. Kenca Jesus ipekeke, Jesus jadi manusia denga. Tapi gundari kenca Jesus nangkih ku surga ia nggo jadi mahluk roh. (1 Korinti 15:​44, 50; 1 Petrus 3:​18) Sanga itatap rasul-rasul denga Jesus, lit i deher kalak e “dua kalak si ruis mbentar.” Kalak e malekat, nina, “O kalak Galilea, engkai maka kena cinder natap ku langit? Bagi si nggo idah kena Jesus iangkat ku langit, bage ka me pagi carana ia reh mulihken.”​—Perbahanen Rasul-Rasul 1:​10, 11.

Sanga Jesus terangkat ku surga pengikutna si setia ngenca ngidahsa. “Bage ka me pagi carana” sanga Jesus reh mulihi, pengikut Jesus si setia ngenca si banci ngidah kerehen Jesus i bas Kerajanna.

Rasul-rasul mulih ku Jerusalem. Piga-piga wari kenca si e, pulung kalak e ras murid-murid si deban, termasuk, “Maria nande Jesus ras . . . senina-senina Jesus.” (Perbahanen Rasul-Rasul 1:​14) Terus kalak e ertoto. Si itotoken kalak e termasuk kerna milih pengganti Judas Iskariot gelah rasul e tetap 12 kalak. (Matius 19:28) Ipilih kalak e atena murid si nggo ngidah kegeluhen ras kekeken Jesus. Iban kalak e undi guna metehsa ise si ipilih Dibata. I bas Pustaka si Badia enda me si terakhir iceritaken kerna undi. (Masmur 109:8; Kuan-kuanen 16:33) Matias si terpilih e banci saja ikut i bas 70 murid si isuruh Jesus erberita janah ia “jadi rasul, bagi 11 rasul si debanna.”​—Perbahanen Rasul-Rasul 1:​26.

Sepuluh wari kenca Jesus nangkih ku surga, kalak Jahudi ngerayaken Pentakosta tahun 33 M. Kira-kira 120 murid pulung i loteng i kota Jerusalem. Rempet terbegi sora si gejek bagi sora angin si meter i bas ruangen e. Teridah lit bagi dilah-dilah api i datas kalak e. Kerina murid-murid mulai ngerana i bas bahasa si deban. Nusur me kesah si badia bagi si ijanjiken Jesus!​—Johanes 14:26.