Keleng kel ate Jesus rasul-rasulna, emaka isampati Jesus kalak e gelah ersikap adi lawes pagi ia. Gundari inenna ku datas janah ertoto ia man Bapakna, nina, “Muliakenlah anakNdu gelah imuliaken anakNdu ka Kam. Enggo iberekenNdu kuasa man bana nandangi kerina manusia, gelah iberekenna kegeluhen si rasa lalap man kerina kalak si iberekenNdu man bana.”​—Johanes 17:​1, 2.

Si pentingna iakap Jesus eme gelah Dibata imuliaken. Tapi ikataken Jesus ka arapen si seh kel luar biasana eme kegeluhen si rasa lalap! Kenca ngaloken ‘kuasa nandangi kerina manusia,’ banci ibereken Jesus pasu-pasu arah tebusen man manusia. Tapi labo kerina manusia ndatken pasu-pasu e? Engkai? Erkiteken kalak si ngaloken pasu-pasu e eme kalak si ngelakoken kata-kata enda: “Adi itandai kalak maka Kam ngenca Dibata situhu-tuhu, janah itandaina Jesus Kristus si isuruhNdu, ialokenna me kegeluhen si rasa lalap.”​—Johanes 17:3.

Arus tuhu-tuhu sitandai Bapak ras Anak janah arus rembak hubungenta ras kalak e. Carata rukur kerna kai pe arus min bagi cara kalak e janah arus siusih sipat-sipat Dibata ras Jesus i bas erurusen ras kalak si deban. Ula min pentingen siakap arapen kegeluhen si rasa lalap asangken Dibata imuliaken. Gundari nina Jesus:

“Enggo kumuliaken Kam i doni enda, alu ndungi dahin si iberekenNdu man bangku. O Bapak, gundari muliakenlah aku i adep-adepenNdu, bali bagi kemulian si lit bas aku sanga aku i sampingNdu ope lenga lit doni enda.” (Johanes 17:​4, 5) Ipindoken Jesus gelah ia imuliaken mulihi i surga kenca ia ipekeke.

Pastilah inget Jesus kerina si nggo ilakokenna i bas pelayanenna. Ertoto ia, nina, “Enggo kuban gelarNdu iteh kalak si lit i bas doni enda, si iberekenNdu man bangku. JangNdu kap kalak e, iberekenNdu kalak e man bangku, janah nggo ipatuhi kalak e kataNdu.” (Johanes 17:6) Labo saja gelar Dibata Jahwe si iberitakenna. Tapi isampatina ka rasul-rasulna meteh sipat-sipat Jahwe bage pe caraNa erurusen ras manusia.

Alu meteruk ukur nina Jesus, “Nggo kupeseh man kalak e kata si iberekenNdu man bangku janah nggo ialoken kalak e. Enggo iteh kalak e maka aku reh jadi wakilNdu janah nggo tek kalak e maka Kam kap si nuruh aku.” (Johanes 17:8) Emaka rasul-rasul nggo nandai Jahwe janah iteh kalak e kai tanggung jawap Jesus ras iangkai kalak e ajarenna.

Kenca si e ituriken Jesus perbedan antara pengikut-pengikutna ras nterem kalak i bas doni enda. “Labo aku ertoto guna doni enda tapi guna kalak si nggo iberekenNdu man bangku perban kalak e jangNdu. . . . O Bapak si badia, jagalah kalak e guna gelarNdu si nggo iberekenNdu man bangku, gelah kalak e ersada bali bagi aku ersada ras Kam. . . . Enggo kujaga kalak e, janah sada pe la lit si kernep, selain ia si memang nandangi ikernepken,” maksudna eme Judas Iskariot si sangana erban rencana guna nghianati Jesus.​—Johanes 17:​9-​12.

Iterusken Jesus ertoto, nina, “Segat ate doni enda nandangi kalak e. Labo kupindo gelah ibuatNdu kalak e i bas doni enda nari, tapi gelah ijagaNdu kalak e i bas si jahat nari. Kalak e labo bagin i bas doni enda, bali bagi aku labo bagin i bas doni enda nari.” (Johanes 17:​14-​16) Rasul-rasul ras murid-murid si deban nggeluh i bas doni si ikuasai Setan, tapi kalak e arus tetap serap arah doni si jahat enda nari. Uga carana?

Ertoto Jesus, “Pebadiakenlah kalak e alu kebenaren. KataNdu kap kebenaren.” (Johanes 17:17) Adi idalanken murid-murid kebenaren si lit i bas Kitap-Kitap Heber ras kebenaren si iajarken Jesus, kalak e tetap badia janah serap arah doni enda guna ngelayani Dibata. I bas pudi wari, piga-piga rasul e ikut nulisken buku-buku si jadi bagin i bas “kebenaren” si banci erban kalak badia.

Lit ka pagi kalak si deban si ngaloken “kebenaren.” Emaka ertoto Jesus “labo guna kalak e saja [11 rasul], tapi guna kalak si erkiniteken man bangku kenca ibegina kata-kata kalak e.” Kai si iarapken Jesus man kalak e kerina? “Kerina kalak e jadi sada. O Bapak, bali bagi Kam ersada ras aku janah aku ersada ras Kam, kalak e pe ersada ras kita.” (Johanes 17:​20, 21) Jesus ras Bapakna labo sada. Tapi kalak e sada maksudna seperukuren i bas kerinana. Ertoto Jesus gelah pengikut-pengikutna pe bage.

Enggo pernah ikataken Jesus man Petrus maka lawes ia leben guna nikapken ingan man kalak e, maksudna ingan bas surga. (Johanes 14:​2, 3) Gundari itotoken Jesus kerna si e, “O Bapak, ateku min kalak si nggo iberekenNdu man bangku ersada ras aku i bas inganku, gelah idah kalak e kemulianku si nggo iberekenNdu man bangku, sebap keleng ateNdu aku ope lenga pe doni enda ijadiken.” (Johanes 17:24) Kata-katana e mbuktiken maka ndauh ope lenga Adam ras Hawa iciptaken bage pe lit kesusurenna, nggo leben Jesus ikelengi Dibata eme Anakna si tonggal si jadi Jesus Kristus.

I bas pendungi totona, mulihi ibelaskenna kerna kai si pentingna eme gelar Bapakna ras kekelengen Dibata man rasul-rasul bage pe man kerina kalak si ngaloken “kebenaren.” Nina, “Enggo kuban gelarNdu itandai kalak e janah terus kupetandaken, gelah icidahken kalak e kekelengen bali bagi kekelengen si icidahkenNdu man bangku, janah gelah ersada aku ras kalak e.”​—Johanes 17:26.