Kentisik nari itadingken Jesus ras rasul-rasulna me ruangen i loteng ingan kalak e man pangan Paskah. Melala nasehat si ibereken Jesus man kalak e. Ikataken Jesus ka, “Kukataken enda man kena gelah ula bene kiniteken kena.” Kai si banci erban bene kiniteken kalak e? Nina Jesus, “Ipedarat kalak pagi kena i bas ingan pulung kalak Jahudi nari. Seh me pagi waktuna maka ise pe si munuh kena erpengakap nggo iberekenna pelayanen si badia man Dibata.”​—Johanes 16:​1, 2.

Banci saja kuatir rasul-rasul megi si e. Memang nggo ikataken Jesus maka segat pagi ate doni enda man kalak e, tapi lenga pernah langsung ikataken Jesus maka kalak e ibunuh pagi. Engkai? Nina Jesus, “Tangtangna la kukataken si enda man kena, perban aku ras kena denga.” (Johanes 16:4) Tapi sope Jesus lawes ikatakenna enda gelah ersikap-sikap rasul-rasul e.

Ikataken Jesus ka, “Lawes me aku ndahi Si nuruh aku, tapi sekalak pe kena la nungkun, ‘Ku ja kam lawes?’” Situhuna, i bas berngi e nggo nge isungkun rasul-rasul kerna si e. (Johanes 13:36; 14:5; 16:5) Tapi kenca ibegi kalak e maka isiksa pagi ia, ceda kel pusuh kalak e. Emaka, lanai isungkun kalak e kerna kemulian si nandangi ibereken man Jesus bage pe kai pasu-pasu si idatken murid-murid Jesus pagi. Nina Jesus, “Erkiteken nggo kupebetehken man kena kerna si enda, ceda kel ate kena.”​—Johanes 16:6.

Jenari nina Jesus, “Aku lawes guna kiniulin kena. Adi la aku lawes, labo reh penampat e. Tapi adi lawes aku, kukirim me penampat e man kena.” (Johanes 16:7) Kesah si badia e banci ialoken murid-murid adi Jesus nggo mate ras lawes ku surga. Arah surga nari banci ikirim Jesus penampat e man murid-muridna i belang-belang doni.

Kesah si badia banci ‘mbuktiken man doni kerna ise si erdosa, janah kerna ise si ngelakoken si benar, bage pe kerna ise si iukum.’ (Johanes 16:8) Maksudna, terbukti pagi doni enda erdosa perban la tek man Anak Dibata. Kenca Jesus lawes ku surga, terbukti me maka ia kalak si benar janah Setan eme “penguasa doni enda,” cocok iukum.​—Johanes 16:11.

Nina Jesus ka, “Melala denga si ateku kukataken man kena tapi gundari lenga ngasup kena ngangkaisa.” Kenca ibereken Jesus kesah si badia maka nggo banci iangkai kalak e “kerina kebenaren,” janah ipakeken kalak e kebenaren e bas geluhna.​—Johanes 16:​12, 13.

Tapi mamang ate rasul-rasul sanga ikataken Jesus bagenda, “Kentisik nari lanai idah kena aku, janah kentisik nari idah kena ka me aku.” Sisungkun-sungkunen kalak e kai maksud Jesus. Iteh Jesus si e, emaka nina, “Situhuna, tangis ras ngandung pagi kena, tapi doni enda ermeriah ukur. Ceda pagi ate kena, tapi ceda ate kena e berubah jadi keriahen ukur.” (Johanes 16:​16, 20) Paginna, sanga ciger wari, ibunuh me Jesus. Meriah kel ukur peminpin-peminpin agama, tapi murid-murid Jesus erceda ate. Tapi sanga Jesus ipekeke, ceda ate e jadi keriahen ukur! Reh riahna ukur kalak e sanga ibereken Dibata kesahNa si badia.

Ipeseri Jesus kai si terjadi man rasul-rasul e ras kai si terjadi man sekalak diberu si nandangi melahirken, nina, “Mesui kel iakap sekalak diberu adi nggo seh waktuna melahirken, tapi kenca nggo lahir anakna e, lanai ingetna kiniseranna e. Meriah ukurna perban nggo lahir sekalak manusia ku doni enda.” Isemangati Jesus rasul-rasulna, nina, “Gundari ceda ate kena, tapi paksa kuidah pagi kena mulihi, meriah me ukur kena. Janah la lit ise pe si muat keriahen ukur e i bas kena nari.”​—Johanes 16:​21, 22.

 Rasul-rasul Jesus lenga pernah ertoto i bas gelar Jesus. Gundari nina Jesus, “I bas wari e pagi, mindo kena man Bapak i bas gelarku.” Engkai maka arus bage? Situhuna labo perban la nggit Bapak njawap pertoton kalak e. Nina Jesus, “Keleng ate Bapak nandangi kena perban nggo ikelengi kena aku . . . jadi wakil Dibata.”​—Johanes 16:​26, 27.

Kata-kata Jesus erban rasul-rasul jadi semangat. Banci saja enda sebapna ikataken kalak e, “Erkiteken si e me maka kami tek kam reh i bas Dibata nari.” Tapi kiniteken kalak e nandangi iuji. Nina Jesus, “Reh me paksana, janah nggo seh, merap me kena kerina ku rumah kena sekalak-sekalak janah itadingken kena me aku sisada.” Tapi nina Jesus ka, “Kukataken enda man kena, gelah erkiteken aku lit kedamen i bas kena. Ula kena mbiar! Enggo kap kutaluken doni enda.” (Johanes 16:​30-​33) Labo pernah itadingken Jesus kalak e. Tek Jesus maka amin pe iserang Setan murid-muridna e, banci kalak e tetap setia bali bagi ia. Adi terus ilakoken kalak e peraten Dibata, banci italuken kalak e doni enda.