Penguasa Romawi eme Kaisar Agustus, iperentahkenna gelah kerina kalak ndaptarken diri. Emaka Jusup ras Maria arus mulih ku kuta kemulihen Jusup, eme kota Betlehem si lit i selatan Jerusalem.

Erkiteken nterem kel jelma si ndaptarken diri i Betlehem, kandang kelede ngenca ingan si banci igunaken Jusup ras Maria guna erberngi, kandang e pe ingan binatang si debanna ka. I je me ingan Jesus lahir. Ibaluti Maria ia alu uis janah ipepedemna i datas pelangkah, eme ingan binatang man.

Jelas me Dibata si ngaturkenca gelah iban Kaisar Agustus undang-undang pendaptaren e. Alu bage, banci Jesus lahir i Betlehem, kuta kemulihen bulangna, Raja Daud. Enggo ndekah ipebetehken Kitap si Badia maka Betlehem si jadi kota ingan Penguasa si ijanjiken e lahir.​—Miha 5:2.

Enda pasti berngi si penting kel! I darat, terang ersinar ku sekeliling permakan-permakan si sangana pulung. E kemulian Jahwe kap! Ngerana sada malekat Dibata man permakan-permakan e, “Ula mbiar! Kupeseh man kena berita si meriah kerna keriahen si mbelin, kerina kalak pagi nggejapkensa. Sebap bas wari enda nggo lahir man kena i kota Daud sekalak juru selamat, ia me Kristus ras Tuan. Enda me tanda man kena: Idapeti kena kari sekalak anak si ibaluti alu uis janah itama i bas pelangkah.” Rempet reh malekat-malekat si deban, janah nina, “Imuliaken me Dibata i bas ingan si meganjangna, bage pe dame i doni man kalak si ngena ateNa.”​—Lukas 2:​10-​14.

Sanga lawes malekat-malekat e, ngerana permakan-permakan e, “Ota kita lawes ku Betlehem janah sinen kai si nggo terjadi, bagi si nggo ipebetehken Jahwe man banta.” (Lukas 2:15) Merudu-rudu kalak e lawes janah idapetina Jesus si mbaru lahir pas i bas ingan si ikataken malekat e. Sanga iceritaken permakan-permakan kerna kai si ikataken malekat ndai, kerina si megi jadi jengang. Ibuniken Maria kerina e i bas pusuhna janah iukurina ertina.

Gundari nterem kalak tek Jesus lahir i bas tanggal 25 Desember. Tapi i bas bulan Desember i daerah Betlehem biasana mbergeh, rusur udan, janah mon-mon nusur salju. Emaka i bas bulan e la mungkin permakan-permakan bage pe biri-birina, lit i darat paksa berngi wari. Selain si e, la mungkin ipindoken kaisar Romawi rakyatna erdalan erwari-wari i bas musim mbergeh guna ndaptarken diri, sebap paksa si e segat ate rakyat nandangi ia. Jadi, mbelin kemungkinenna Jesus lahir kira-kira i bas bulan Oktober.