Elisabet nandangi melahirken. Enggo telu bulan ia itemani Maria. Gundari, mulih Maria janah ndauh kel perdalanenna arah uruk Judea nari ku kutana Nasaret. Kira-kira enem bulan nari, Maria pe melahirken anak dilaki ka.

La ndekah kenca Maria lawes, melahirken Elisabet. Ia bage pe anakna sehat. Meriah kel ukur Elisabet ras Sakaria! Sanga icidahken Elisabet anakna si kitik denga man tetanggana ras kade-kadena, meriah kel ukur kalak e.

Menurut Undang-Undang Dibata man kalak Israel, anak dilaki arus isunat janah iban gelarna paksa umur anak e waluh wari. (Imamat 12:​2, 3) Piga-piga kalak erpengakap maka gelar anak e arus seri ras bapakna, eme Sakaria. Tapi, nina Elisabet, “Ula! Johanes ban gelarna.” (Lukas 1:​60) Gelar e seri ras si ikataken malekat Gabriel.

Tetangga bage pe keluargana la setuju, nina, “La kap lit sada pe gelar kade-kadendu bagena.” (Lukas 1:​61) Ngerana kalak e alu tanna, isungkunna Sakaria kai atena ibanna gelar anakna. Ipindo Sakaria papan janah itulisna, “Johanes gelarna.”​—Lukas 1:​63.

Paksa si e minter Sakaria banci ngerana mulihi. Banci saja ingetndu denga ngkai maka sempat Sakaria lanai banci ngerana, eme perban la ia tek kata-kata malekat kerna Elisabet si nandangi hamil. Emaka sanga Sakaria banci ngerana mulihken, luar biasa kel iakap tetangga-tetanggana. Tersungkun-sungkun i bas pusuh kalak e, “Jadi kai nge ndia pagi anak e?” (Lukas 1:​66) Iangkai kalak e me maka ikut campur Dibata erban gelar Johanes.

Jenari, Sakaria dem alu kesah si badia janah nina, “Terpujilah Jahwe, Dibata Israel, erkiteken nggo iperdiatekenNa umatNa janah ibebaskenNa kalak e. Enggo ibereNa man banta juru  selamat si mbisa arah kesusuren Daud pelayanNa.” (Lukas 1:​68, 69) “Juru selamat,” si imaksud eme Tuan Jesus si nandangi lahir. Kerna ia, nina Sakaria, “Kenca Dibata nelamatken kita i bas tan musuh nari, iberekenNa man banta kinihamaten guna mereken pelayanen si badia man baNa alu la lit kebiaren, alu kesetian ras perbahanen si benar i lebe-lebeNa segedang geluhta.”​—Lukas 1:​74, 75.

Kerna anakna, ipebetehken Sakaria, “Kam, o anakku, igelari me kam pagi nabi Dibata Si Meganjangna, sebap kam pagi ngelebei Jahwe guna nikapken dalan man baNa, guna mere pemeteh kerna keselamaten man umatNa arah pengampunen dosa-dosa kalak e, erkiteken perkuah ate si lembut i bas Dibatata nari. Alu perkuah ate enda me sinar matawari reh ndahi kita arah ingan si meganjang, guna nerangi kalak si kundul bas kegelapen bage pe bas bayangen kematen janah mabai naheta i bas dalan kedamen.” (Lukas 1:76-79) Tuhu-tuhu mpegegehi kel nubuat si ipebetehken Sakaria e!

Paksa si e, Maria nggo seh i Nasaret. Kai nge si terjadi adi iteh kalak maka ia nggo hamil padahal lenga sereh?