Piga-piga dilaki rehna arah Timur nari. Kalak e ahli-ahli bintang, eme kalak si erlajar kerna letak bintang guna ngertiken kejadin-kejadin si terjadi i bas kegeluhen sekalak jelma. (Jesaya 47:13) Sanga kalak e bas kutana i Timur, idah kalak e sada “bintang” janah ikutken kalak e kira-kira ratusen kilometer ku Jerusalem, labo ku Betlehem.

Sanga ahli-ahli bintang seh i je, nungkun kalak e, “I ja kin raja kalak Jahudi si nggo lahir e? Idah kami bintangna paksa kami i Timur janah reh kami guna erjimpuh man bana.”​—Matius 2:​1, 2.

Merawa kel Raja Herodes megi si e. Emaka ilebuhna imam-imam kepala bage pe peminpin agama Jahudi, janah isungkunna kalak e i ja kin Kristus lahir. Ijawap kalak e menurut kai si itehna arah Kitap si Badia nari, nina, “I Betlehem.” (Matius 2:5; Miha 5:2) Emaka alu erbuni-buni ilebuh Herodes ahli-ahli bintang e janah nina, “Berkatlah, darami anak e alu megermet janah adi nggo jumpa kena, kataken man bangku gelah aku pe ku jah guna erjimpuh man bana.” (Matius 2:8) Situhuna, ibunuh Herodes atena anak si kitik e!

Kenca lawes ahli-ahli bintang e, terjadi me kejadin si luar biasa. “Bintang” si idah kalak e sanga i Timur denga ngelebei kalak e. Pastilah enda labo bintang si biasa, tapi bintang e sengaja iban guna mabai kalak e. Ikutken ahli-ahli bintang me “bintang” e seh asa ngadi “bintang” e pas i datas rumah Jusup ras Maria bage pe anakna si kitik denga.

Sanga ahli-ahli bintang e masuk ku rumah, idapeti kalak e Maria ras Jesus si kitik denga. Erjimpuh kalak e man Jesus janah ibereken kalak e hadiah man bana eme emas, kemenyan, ras mur. Kenca si e, paksa mulih ate kalak e ndahi Herodes, ipersingeti Dibata kalak e arah nipi gelah ula idahi kalak e ia. Emaka mulih kalak e ku negrina arah dalan si deban.

Menurutndu, ise nge si erban “bintang” si mabai ahli-ahli bintang e? Ingetlah, bintang e la minter mabai kalak e ku Betlehem ingan Jesus. Tapi, ibabaina kalak e ku Jerusalem, ingan Raja Herodes si ersura-sura munuh Jesus. Adi ipediat Dibata ahli-ahli bintang e ngataken man Herodes i ja Jesus lahir, pasti nggo ibunuhna Jesus. Jelas me, musuh Dibata eme Setan ersura-sura gelah Jesus ibunuh, janah igunakenna bintang e gelah seh sura-surana.