Kenca ipebetehken malekat Gabriel man Maria maka ilahirkenna pagi anak dilaki si igelari Jesus, janah anak e pagi jadi Raja seh rasa lalap, nungkun Maria, “Uga enda banci terjadi? Aku me singuda-nguda denga.”​—Lukas 1:​34.

Ijawap Gabriel, “Nusur pagi kesah si badia ku datasndu, kuasa Dibata Si Meganjangna nutupi kam pagi. Erkiteken si e, anak si lahir e pagi igelari badia, Anak Dibata.”​—Lukas 1:​35.

Gelah tek Maria man berita e, nina Gabriel ka, “Janah nen! Kade-kadendu Elisabet pe si igelari kalak diberu si la banci melahirken janah nggo metua, gundari nggo enem bulan ia hamil, anak si i bas beltekna e dilaki. Sebap kerina si ikataken Dibata pasti terjadi.”​—Lukas 1:​36, 37.

Tek Maria man kata-kata Gabriel e, nina ngaloi, “Nenlah! Aku budak Jahwe si diberu! Terjadilah man bangku bagi si nggo ikatakenndu e.”​—Lukas 1:​38.

Kenca Gabriel lawes, ersikap Maria ndahi Elisabet bage pe dilakina Sakaria, kalak e tading i uruk Judea deher Jerusalem. Arah kuta Maria nari eme Nasaret, perlu telu ntah pe empat wari dekahna i bas perdalanen gelah seh.

Dungna seh me Maria i rumah Sakaria. Sanga ia masuk, ikatakenna mejuah-juah man Elisabet. Asum si e, Elisabet dem alu kesah si badia janah nina man Maria, “Ipasu-pasu me kam i bas kerina diberu, janah ipasu-pasu me anak si lit i bas beltekndu! Sada kinihamaten man bangku banci aku idahi nande Tuanku! Sebap nen! Kenca kubegi sorandu, minter kemuit anak si lit i bas beltekku alu meriah ukur.”​—Lukas 1:​42-​44.

Jenari, ngata bujur kel Maria, nina, “Kumuliaken Jahwe, janah seh kel riahna ukurku erkiteken Dibata Juru Selamatku, sebap nggo iperdiatekenNa budakNa si diberu si meteruk enda. Nen! Mulai gundari nari kerina kalak ngataken aku ermeriah ukur, erkiteken Dibata si erkuasa nggo ngelakoken melala perbahanen si mbelin man bangku.” Aminna pe ngena ate Dibata nandangi Maria, tapi Maria la sombong, malahen ipujina Dibata, nina, “Badia me gelarNa, janah seh rasa lalap icidahkenNa perkuah ateNa man kalak si mbiar man baNa.”​—Lukas 1:​46-​50.

Terus ipuji Maria Dibata alu kata-kata nubuat enda, nina, “IcidahkenNa kuasaNa alu tanNa. ImerapkenNa kalak si meganjang ukurna. IpesusurNa kalak si erkuasa i bas tahtana nari janah ipeganjangNa kalak si meteruk. IbesuriNa kel kalak si melihe alu kai si mehuli janah ipelawesNa kalak si bayak alu la maba kai pe. IsampatiNa suruh-suruhenNa eme Israel, erkiteken ingetNa janjiNa guna ncidahken perkuah ate, bagi si nggo ikatakenNa man nini bulangta nai, man Abraham ras man kesusurenna, seh rasa lalap.”​—Lukas 1:​51-​55.

Kira-kira telu bulan dekahna Maria tading ras Elisabet, mungkin guna nampati Elisabet perban ia nggo hamil tua. Duana diberu enda hamil perban penampat Dibata, janah paksa si e banci kalak e sisampat-sampaten.

Jelas me, Jesus ihamati ope lenga ia lahir. Ikataken Elisabet ia “Tuanku,” janah sanga seh Maria, “meriah ukur” anak si lit i bas beltek Elisabet. Beda kel pagi perbahanen kalak man Maria ras anakna. Si e sipelajari kari i bas pasal-pasal seterusna.