Tek kita maka kerina isi Pustaka si Badia eme pesan arah Dibata nari. Buku e isikapken Bapakta si i surga jadi petunjuk man banta. Perdiatekenlah dua pesan si penting si ipeseh 2.000 tahun si lewat. Pesan e ipeseh sada malekat si gelarna Gabriel “si cinder i lebe-lebe Dibata.” (Lukas 1:​19) Uga keadan paksa si e sanga ipeseh malekat pesan si penting enda?

Paksa si e tahun 3 SM. I ja tangtangna ipeseh Gabriel pesan e? I bas uruk Judea, la ndauh arah Jerusalem nari, i je lit sekalak imam Jahwe si gelarna Sakaria. Ia ras diberuna, Elisabet, nggo metua janah la lit anak kalak e. Paksa si e, giliren Sakaria ngelayani selaku imam i rumah pertoton Dibata i Jerusalem. Sanga Sakaria i bas rumah pertoton, rempet reh Gabriel ku deher batar-batar persembahen kemenyan.

Wajar Sakaria jadi mbiar. Tapi ipetenang malekat e Sakaria, nina, “Ula kam mbiar Sakaria, sebap pemindonndu nggo ibegiken. Lahir me pagi sekalak anak dilaki arah diberundu Elisabet, banlah gelarna Johanes.” Ikataken Gabriel e ka maka Johanes “jadi kalak si penting pagi i lebe-lebe Jahwe” janah isikapkenna pagi sada umat si ‘nggo metunggung ngelayani Jahwe.’​—Lukas 1:​13-​17.

Menurut Sakaria, enda la terteki. Engkai? Perban ia bage pe diberuna Elisabet nggo metua. Emaka nina Gabriel man bana, “Erkiteken la kam tek man kata-kataku si terjadi pagi bas waktu si nggo itentuken, emaka bisu me kam.”​—Lukas 1:​20.

Kemamangen kalak si lit i darat, ngkai maka ndekah kel Sakaria i bas. Dungna, ndarat Sakaria tapi lanai ia banci ngerana. Alu tanna ngenca ia banci ngerana. Enda mbuktiken maka nggo idahna kai si luar biasa sanga ia i bas rumah pertoton.

Kenca dung Sakaria ngelayani i rumah pertoton, mulih ia ku rumahna. Minter kenca si e, hamil Elisabet! Sanga nimai anakna lahir, lima bulan dekahna Elisabet i rumah saja janah la ia jumpa ras jelma si nterem.

Reh me Gabriel pedua kaliken. Ise si idahina? Sekalak singuda-nguda si lenga sereh, gelarna Maria. Ia tading i utara Jerusalem, i daerah Galilea bas kota Nasaret. Kai si ipebetehken malekat e man Maria? Nina, “Jadi kel ate Dibata nandangi kam.” Nina Gabriel ka man Maria, “Nenlah! Hamil pagi kam janah ilahirkenndu sekalak anak dilaki, banlah gelarna Jesus.” Nina Gabriel ka, “Jadi kalak si penting pagi ia janah igelari Anak Dibata Si Meganjangna . . . jadi Raja pagi ia nandangi kesusuren Jakup seh rasa lalap, janah Kerajanna la erkeri-kerin.”​—Lukas 1:​30-​33.

Pasti iangkaindu maka kehamaten si mbelin kel iakap Gabriel mpeseh dua pesan enda. Sanga sibaca kari terdauhen kerna Johanes ras Jesus, siteh kari alu jelas ngkai maka pesan si rehna arah surga enda seh kel pentingna.