Kira-kira nggo lewat 17 tahun dekahna paksa Jesus si umurna 12 tahun nungkuni guru-guru i bas rumah pertoton. Gundari tahun 29 M. Enterem kalak ncakapken kerna Johanes, kade-kade Jesus, si erberita bas kerina negri i sebelah barat Lau Jordan.

Johanes sekalak dilaki si beda kel ras si debanna, i bas penampilen bage pe pengeranana. Bajuna iban arah mbulu unta nari janah ikat pinggangna arah kulit nari. Panganna labang ras tengguli kerangen. Kai si iberitakenna? “Ertobatlah, erkiteken Kerajan surga nggo ndeher.”​—Matius 3:2.

Enterem kalak reh megiken Johanes. Enterem kalak sadar maka perlu ertobat eme jera dingen robah arah perbahanen ras lagu langkahna si gel-gel. Kalak si rehen e arah “Jerusalem bage pe arah kerina daerah Judea ras daerah i sekeliling Lau Jordan.” (Matius 3:5) Enterem kalak si reh ndahi Johanes ertobat. Iperidikenna kalak e alu cara igedapkenna ku bas Lau Jordan. Engkai?

Iperidikenna kalak e jadi tanda ntah pe bukti maka kalak e tuhu-tuhu ertobat arah dosa-dosana nari si ngelanggar perjanjin Undang-Undang Dibata. (Perbahanen Rasul-Rasul 19:4) Labo kerina ncukupi syarat. Sanga reh piga-piga kalak Parisi ras kalak Saduki, igelari Johanes kalak e “kesusuren nipe si erbisa.” Nina, “Asilkenlah buah tanda kena ertobat. Ula iakap kena maka banci ikataken kena bas pusuh kena, ‘Bapak kami kap Abraham.’ Kukataken man kena maka Dibata ngasup njadiken batu-batu enda jadi kesusuren Abraham. Kapak nggo itama i teruh batang kayu. Tiap batang kayu si la mejile buahna pasti itabah janah ibenterken ku api.”​—Matius 3:​7-​10.

Erkuasa kel berita si ipeseh Johanes, iperidikenna nterem jelma, janah nterem kel kalak mperdiateken ia, emaka isuruh kalak Jahudi me imam-imam ras kalak Lewi nungkun man Johanes, “Ise kin kam?”

Ijawap Johanes, “Aku labo Kristus.”

Nungkun ka kalak e, “Adi bage, ise kam? Kam kin Elia?”

Ngaloi ia, “Lang.”

Isungkun kalak e ka, “Kam kin Nabi e?” Maksudna Nabi si mbelin si nandangi reh bagi si ikataken Musa.​—Ulangen 18:​15, 18.

Ngaloi ka ia, “Lang!”

Lalap iasak kalak e, “Kataken dage ise kin kam situhuna, gelah iteh kami ngerana man kalak si nuruh kami. Ceritakenlah kerna dirindu.” Ijawap Johanes, “Aku kap si erlebuh i taneh mesawang nari, ‘Pepinterlah dalan man Jahwe,’ bagi si ikataken nabi Jesaya.”​—Johanes 1:​19-​23.

Isungkun kalak e, “Adi labo kam Kristus, Elia, ntah pe Nabi, nce ngkai maka iperidikenndu kalak?” Ijawap Johanes, “Aku mperidiken alu lau. Tapi i bas tengah-tengah kena nari lit sekalak si la itandai kena si reh pudin asangken aku.”​—Johanes 1:​25-​27.

Iteh Johanes maka ia sangana nikapken dalan. Enda ngertiken: Isampatina kalak gelah ertobat janah nggit ngaloken Mesias si inubuatken si jadi Raja pagi. Kerna ia, nina Johanes, “Kalak si nandangi reh kenca aku, belinen kuasana asangken aku janah mbuka selopna pe la aku cocok.” (Matius 3:​11) Ikataken Johanes ka, “Kalak si pudin reh asangken aku, nggo ngelebei aku, perban ia nggo lit sope aku lit.”​—Johanes 1:​15.

Berita si ipeseh Johanes cocok kel, “Ertobatlah, erkiteken Kerajan surga nggo ndeher.” (Matius 3:2) Enterem kalak mperdiateken pelayanen Raja si ilantik Jahwe eme Jesus Kristus si nandangi ibenaken.