Gundari Maria nggo hamil empat bulan. Siteh maka sanga ia hamil nguda, ia tading ras kade-kadena eme Elisabet i uruk Judea i selatan. Tapi Maria nggo mulih ku Nasaret. Kentisik nari pasti iteh jelma si nterem ia nggo hamil. Cuba bayangkenndu uga gulutna ukur Maria!

Selain si e, ia nggo ka ertunangen ras tukang kayu si gelarna Jusup. Iteh Maria maka menurut Undang-Undang Dibata man kalak Israel, diberu si nggo ertunangen tapi erhubungen seks ras dilaki si deban, arus ibenteri alu batu seh ngayak mate. (Ulangen 22:​23, 24) Aminna pe Maria la ngelakoken perbahanen seks si salah, banci saja la itehna uga carana njelaskenca man Jusup maka ia nggo hamil janah kuatir kel ia kai kari si terjadi.

Enggo telu bulan dekahna Maria lawes, pasti tedeh kel ate Jusup. Sanga kalak e jumpa, banci saja ikataken Maria man Jusup maka ia nggo hamil. Iusahaken Maria kel erban Jusup tek maka ia hamil perban kesah si badia Dibata. Tapi, bali bagi si ibayangkenndu, pasti mesera kel kap Jusup tek ras ngangkaisa.

Iteh Jusup maka Maria diberu si mehuli janah itandai kalak pe mehuli. Ngena kel ate Jusup ia. Tapi, aminna pe nggo ibegina kai si ijelasken Maria, la mungkin iakap Jusup si Maria hamil adi la kin erhubungen seks ras dilaki si deban. Tapi la ka ate Jusup si Maria iukum mate ntah pe ipemelaken i lebe-lebe jelma si nterem, emaka iceraikenna atena Maria alu erbuni-buni. I bas jaman e, kalak si nggo ertunangen ianggap nggo erjabu. Emaka guna mbatalken pertunangen, arus cerai.

 Sanga iukuri Jusup denga kerna si e, terpedem ia. Reh malekat Jahwe i bas nipina janah nina, “Ula kam mbiar njadiken Maria diberundu. Sebap anak si i bas beltekna e lit erkiteken kesah si badia. Ilahirkenna pagi sekalak anak dilaki janah arus ibanndu gelarna Jesus, sebap ia me pagi si nelamatken kalak i bas dosa nari.”​—Matius 1:​20, 21.

Sanga medak Jusup, tenang kel ukurna perban kerinana nggo jelas gundari! Minter ipatuhina malekat e janah ibabana Maria ku rumahna. Si ilakokenna e seri ras acara perjabun, gelah iteh jelma si nterem maka Jusup ras Maria nggo sah erjabu. Tapi, la erhubungen seks Jusup ras Maria sedekah Maria hamil denga.

Piga-piga bulan kenca si e, arus ibaba Jusup si Maria si sangana hamil tua lawes arah rumah kalak e nari i Nasaret. Ku ja kalak e arus lawes paksa Maria nggo nandangi melahirken?