Imedaki Jusup Maria guna ngataken berita si penting. Edenga malekat Jahwe reh i bas nipina, janah ngataken, “Medakken, baba anak si kitik e ras mamakna janah kiamlah ku Mesir. Tadinglah kam i jah seh asa aku erkata man bandu, sebap idarami Herodes atena anak e guna munuh ia.”​—Matius 2:​13.

Jusup, Maria, bage pe anak kalak e minter kiam i bas berngi e. Kai si ilakoken kalak e tepat waktu, perban nggo iteh Herodes maka ahli-ahli bintang nggo nipu ia. Enggo isuruhna gelah ngelapor kalak e man bana, tapi la ilaporken kalak e janah itadingkenna negri e. Emaka merawa kel Herodes. Perban ibunuhna atena Jesus, iperentahkenna gelah kerina anak-anak dilaki si lit i Betlehem ras i sekelilingna, si umurna dua tahun ku teruh ibunuh. Iperkiraken Herodes umur e arah kai si itehna i bas ahli-ahli bintang si reh arah Timur nari.

Ngeri kel pemunuhen e! La siteh asa teremna anak dilaki si ibunuh, tapi terbegi sora nande-nande si tangis ras ngandung, sue ras nubuat Nabi Jeremia si lit i bas Pustaka si Badia.​—Jeremia 31:15.

Paksa si e, Jusup ras keluargana nggo kiam ku Mesir janah terus kalak e tading i je. Kenca si e, i bas sada berngi reh ka malekat Jahwe i bas nipi Jusup, nina, “Medakken, baba anak si kitik e ras mamakna ku negri Israel, perban kalak si ndarami anak e guna munuhsa nggo mate.” (Matius 2:​20) Emaka gundari nggo banci ibaba Jusup keluargana mulih ku kuta kemulihenna. Alu bage, terjadi me kai si ikataken Pustaka si Badia​—Anak Dibata idilo i Mesir nari.​—Hosea 11:1.

Kepeken tading ate Jusup bage pe keluargana i Judea, kira-kira i deher kota Betlehem, ingan kalak e tading ope lenga kiam ku Mesir. Tapi itehna maka anak Herodes si jahat eme Arkelaus si gundari jadi raja i Judea. I bas nipi si deban, Jusup ipersingeti Dibata kerna sada bahaya. Emaka lawes Jusup ras keluargana ku utara janah tading i Nasaret i daerah Galilea, ndauh arah pusat agama Jahudi. I je Jesus ipebelin, emaka terjadi kai si ikataken ayat enda, “Igelari pagi ia kalak Nasaret.”​—Matius 2:​23.