Enggo seh waktuna man keluarga Jusup, teman-temanna, bage pe kade-kadena guna lawes ku Jerusalem. Si enda ilakoken kalak e tiap tahun guna ngerayaken Paskah bagi si iperentahken Undang-Undang Musa. (Ulangen 16:16) Arah Nasaret nari ku Jerusalem dauhna lit kira-kira 120 kilometer. Sibuk kel kalak e tapi meriah kel akapna. Gundari umur Jesus 12 tahun, itimaina kel perayan e janah lanai ia sabar ndahi mulihi rumah pertoton.

Labo sada wari ngenca irayaken Jesus ras keluargana Paskah. Kenca dung wari Paskah, imulai me Perayan Roti si La Itama Ragi si dekahna pitu wari. (Markus 14:1) E pe ianggap bagin i bas Paskah. Iperluken waktu kira-kira dua minggu guna perdalanen kalak e arah rumahna i Nasaret nari, tading i Jerusalem, janah mulihken ka ku rumah kalak e. Tapi i bas tahun enda perlu waktu terdekahen, perban lit masalah si iban Jesus. Masalah e tereteh i bas perdalanen paksa kalak e mulih arah Jerusalem nari.

Sanga bas perdalanen, iakap Jusup ras Maria maka Jesus lit i bas rombongen kade-kade bage pe teman-temanna. Tapi sanga kalak e ngadi guna erberngi, la idahna Jesus. Emaka idarami kalak e ia i rombongen e tapi la idahna. I ja pa pe ia la idah! Mulih me Jusup ras Maria ku Jerusalem guna ndarami ia.

Sada warin idarami kalak e ia tapi la idah kalak e. I bas wari peduaken pe lenga idah kalak e. Dungna i bas wari peteluken, idah kalak e ia i bas sada ruangen i rumah pertoton. Idah kalak e Jesus sangana kundul i tengah-tengah guru-guru Jahudi guna megiken ras nungkuni guru-guru e. Jengang guru-guru e nandangi pengangkan Jesus.

Nungkun Maria, “Nakku, ngkai maka bage perbahanenndu man kami? Enggo latih kel kuakap ras bapandu ndarami kam.”​—Lukas 2:​48.

Mamang ate Jesus ngkai maka la iteh kalak e i ja ia arusna. Nungkun Jesus, “Engkai kin maka darami kena aku? La kin iteh kena maka aku arus i rumah Bapakku?”​—Lukas 2:​49.

Gundari nggo jumpa kalak e. Mulih me Jesus ras Jusup bage pe Maria ku rumahna i Nasaret, janah terus ipatuhi Jesus kalak e. Reh pentarna me Jesus janah reh belinna. Aminna pe ia nguda denga, ngena ate Dibata bage pe manusia nandangi ia. Jelas me, mulai kitik-kitikna nari ibereken Jesus usihen, labo ngenca ndarami pemeteh kerna Dibata tapi pe jadi usihen i bas matuhi orang tuana.