Selaku manusia si sempurna, la inanami Jesus melala kususahen bagi si inanami manusia. Tapi ia perkuah ate, janah iangkaina perasan kalak si deban. Emaka isampatina manusia, janah penampat si iberekenna e lebihen asangken si iperluken. Ukurilah alu mbages usihen si iberekenna i bas Pelajaren 32, 37, 57, 99.

La icidahken Jesus dirina tempa-tempa kalak si penting si seh kel sibukna. Emaka kerina kalak si metua ras si nguda pang ndeheri Jesus. Meriah akap kalak rembak ras Jesus perban banci igejapken kalak e Jesus ermediate. Bacalah kerna si e i bas Pelajaren 25, 27, 95.

Rusur Jesus ertoto man Bapakna sanga ia sisada ntah pe sanga ras jelma si nterem. Jesus ertoto i bas melala kesempaten, labo ngenca sanga muat man. Ertoto ia man Bapakna guna ngata bujur, muji Ia, janah mindo petunjuk ope lenga erban keputusen si penting. Perdiateken usihen si iberekenna i bas Pelajaren 24, 34, 91, 122, 123.

La iutamaken Jesus kepentingenna. Nggit ia erkorban nampati kalak, aminna pe ia sangana latih janah perlu istirahat. I bas si enda pe Jesus jadi usihen si mejile si banci siikutken. Pelajarilah uga carana ngelakoken si e i bas Pelajaren 19, 41, 52.

Jesus labo saja ngajari kalak gelah nggit ngampuni. Tapi ia pe nggit ngampuni murid-muridna bage pe kalak si deban. Ukurilah usihen si iberekenna si lit i bas Pelajaren 26, 40, 64, 85, 131.

Enggo ikataken maka itulak kalak Jahudi pagi Mesias janah ibunuh musuhna pagi ia. Jadi perban si e, banci saja Jesus nampati kalak si deban gelah nggo saja. Tapi la bage iban Jesus. Malahen, semangat kel ia erberita ras mbela ibadat situhu-tuhu. Enda usihen si mejile kel man kerina pengikutna si itulak ras iserang. Bacalah i bas Pelajaren 16, 72, 103.

Jesus ndauh kel beluhen ras pentaren i bas kai pe asangken manusia si la sempurna. Kengasupen dagingna ras perukurenna pe ndauh ulin asangken kalak si lit i sekelilingna. Tapi ilayanina kalak si deban alu meteruk ukur. Pelajarindulah usihen e i bas Pelajaren 10, 62, 66, 94, 116.

Jesus tetap sabar man rasul-rasulna bage pe man kalak si deban, aminna pe kalak e gagal i bas ngusih contoh si iberekenna ntah pe ngelakoken kai si ikatakenna. Alu sabar iulihina ka ngajari kerna kai si iperluken kalak e gelah reh rembakna kalak e ras Jahwe. Pelajarilah usihen kesabaren Jesus si lit bas Pelajaren 74, 98, 118, 135.