1. I bas berngi ope lenga kematen Jesus, kai si ikuatirkenna?

 I BAS berngi ope lenga Jesus mate, itehna lanai ndekah itadingkenna me murid-muridna, janah kuatir ia kerna kalak e bas wari si pepagi. Nina man kalak e, “Kena lanai jadi bagin doni enda.” (Johanes 15:19) Dungna ertoto ia man Bapakna kerna murid-muridna, nina, “Kalak e labo bagin i bas doni enda, bali bagi aku labo bagin i bas doni enda nari.” (Johanes 17:15, 16) Kai maksud Jesus?

2. Kai maksudna “doni” si icakapken Jesus?

² “Doni” si imaksud i je, eme kerina kalak si la nandai Dibata janah nggeluh i bas doni si ikuasai Setan. (Johanes 14:30; Epesus 2:2; Jakup 4:4; 1 Johanes 5:19) Uga carana gelah kita ‘la jadi bagin i bas doni enda’? Carana eme: Tetap setia man Kerajan Dibata janah netral, maksudna la kita ikut i bas politik. Silawan pengaruh doni enda. Sijaga peruista ras penampilenta, janah arus benar perukurenta kerna sen. Sipake ka kerina perlengkapen perang si isikapken Dibata man banta. Sipelajari kari kerna si e i bas pelajaren enda.​—Nen Penjelasen Tambahen 16.

3. Kai si iukuri Jesus kerna politik?

³ Sanga Jesus i doni, idahna melala kel masalah manusia janah susah. Mekuah ate Jesus kalak e janah isampatina atena. Jadi peminpin politik nge ia? Lang. Itehna maka si iperluken kalak e eme Kerajan Dibata ntah pe pemerentahenNa. Jesus me si jadi Raja bas Kerajan e, janah si rusur iberitakenna eme kerna Kerajan e. (Daniel 7:13, 14; Lukas 4:43; 17:20, 21) Jesus la ikut bas politik, janah tetap ia netral. Sanga Jesus i lebe-lebe Gubernur Roma eme Pontius Pilatus, ngerana Jesus, “Kerajanku labo bagin i bas doni enda nari.” (Johanes 18:36) Murid-muridna pe netral ka. Lit sada buku kerna sejarah (On the Road to Civilization) si ngataken maka kalak Kristen si pertama “la ikut i bas urusen politik.” Gundari pe kalak Kristen tetap netral. Kita tetap setia ndukung Kerajan Dibata ras tetap netral i bas urusen politik doni enda.​—Matius 24:14.

4. Uga carana kalak Kristen situhu-tuhu ndukung Kerajan Dibata?

⁴ Utusen-utusen si jadi wakil sada negara i bas negara si deban, la ikut i bas politik i negara inganna iutus. Kalak si ipilih guna merentah ras Kristus i surga pe bali bagi utusen-utusen e. Itulisken Paulus kerna kalak Kristen si ipilih, nina, “Kami kap utusen-utusen si jadi wakil Kristus.” (2 Korinti 5:20) Kalak si ipilih e jadi wakil pemerentahen Dibata. Emaka, la kalak e ikut i bas politik ntah pe urusen pemerentahen i bas doni enda. (Pilipi 3:20) Tapi kalak si ipilih e, nampati jutan kalak erlajar  kerna pemerentahen Dibata. ‘Biri-biri si deban,’ si arapenna nggeluh si rasa lalap i doni si mbaru, ndukung kalak si ipilih e. Kalak e pe tetap netral. (Johanes 10:16; Matius 25:31-40) Jelas me, adi lit si ikut i bas urusen politik doni enda, ia labo kalak Kristen situhu-tuhu.​—Baca Jesaya 2:2-4.

5. Kai salah sada alasen kalak Kristen la ikut erperang?

⁵ Kalak Kristen situhu-tuhu seri akapna temanna sada kiniteken ras keluargana, janah ersada kalak e la soal ja nari negarana ntah pe daerah asalna. (1 Korinti 1:10) Adi ikut kita erperang, silawan me keluargata sendiri bage pe temanta sada kiniteken, padahal iperentahken Jesus gelah sikelengi kalak e. (Johanes 13:34, 35; 1 Johanes 3:10-12) Malahen,  isuruh Jesus gelah murid-muridna ngkelengi musuh-musuhna.​—Matius 5:44; 26:52.

6. Kai si arus ilakoken umat Jahwe man pemerentah?

⁶ Aminna pe kita tetap netral selaku kalak Kristen, siusahaken kel gelah tetap jadi warga negara si mehuli. Contohna, siergai pemerentah alu matuhi undang-undang ras sigalari pajak. Tapi lalap sipastiken gelah sibereken “man Dibata kai si memang jadi bagin Dibata.” (Markus 12:17; Roma 13:1-7; 1 Korinti 6:19, 20) “Bagin Dibata” eme sikelengi Ia, sipatuhi Ia, bage pe sisembah Ia. Padin siakap mate gelah tetap patuh man Jahwe.​—Lukas 4:8; 10:27; baca Perbahanen Rasul-Rasul 5:29; Roma 14:8.

7, 8. (a) Kai kin ‘perukuren doni enda’? (b) Kai pengaruh perukuren doni e man manusia?

⁷ Gelah la jadi bagin i bas doni si ikuasai Setan, ula sipediat “cara rukur si lit bas doni enda” ngatur kita. Perukuren doni eme cara rukur ras perbahanen si rehna arah Setan nari, janah si e icidahken kalak si la ngelayani Jahwe. Tapi kalak Kristen ilawanna pengaruh e, bagi si ikataken Paulus, “labo sialoken cara rukur si lit bas doni enda, tapi sialoken kesah si badia i bas Dibata nari.”​—1 Korinti 2:12; Epesus 2:2, 3; nen Penjelasen Tambahen 17.

⁸ Cara rukur doni enda erban kalak jadi sombong, tual, ras mberontak. Si e erban kalak e erpengakap maka la perlu ipatuhina Dibata. Ate Setan min manusia rate-ate ngelakoken kai pe janah la  perlu ngukuri akibatna. Iarapkenna ka gelah ‘sura-sura daging ras sura-sura mata’ jadi si pentingna akap manusia. (1 Johanes 2:16; 1 Timotius 6:9, 10) Terlebih man umat Jahwe, iusahaken Iblis kel erban kalak e papak janah itipuna kalak e gelah perukurenna seri bagi Iblis.​—Johanes 8:44; Perbahanen Rasul-Rasul 13:10; 1 Johanes 3:8.

9. Kai saja si banci mpengaruhi perukurenta?

⁹ Bagi udara si lit i japa pe, cara rukur doni pe lit i sekelilingta. Adi la kita erjuang ngelawansa, kita banci ipengaruhina. (Baca Kuan-kuanen 4:23.) Cara rukur doni e banci saja la jelas teridah, contohna, sipediat perukuren ras perbahanenta ipengaruhi kalak si la nembah Jahwe. (Kuan-kuanen 13:20; 1 Korinti 15:33) Kita pe banci ka ipengaruhi pornograpi, kalak murtad, ntah pe persaingen i bas olahraga.​—Nen Penjelasen Tambahen 18.

10. Uga kita banci ngelawan cara rukur doni enda?

¹⁰ Uga carana gelah ula kita ipengaruhi cara rukur doni enda? Kita arus tetap rembak ras Jahwe janah sipediat dirita itegu-teguNa. Kita arus terus ertoto mindo kesah si badiaNa janah sibuk ngelayani Ia. Jahwe kap Si Erkuasana i bas kerina. Tek kita maka banci isampatiNa kita ngelawan cara rukur doni enda.​—1 Johanes 4:4.

11. Kai pengaruh perukuren doni enda man peruis nterem jelma?

¹¹ Sibuktiken ka kita la ipengaruhi perukuren doni enda arah peruis ras penampilenta. Gundari, nterem kalak si cara peruisna erban kalak si deban  ngukuri perbahanen seks si salah, gelah ia saja atena iperdiateken, gelah teridah ia hebat, ntah pe ncidahken melala senna. Lit ka si la iperdiatekenna peruisna. Banci saja penampilenna murde ntah pe kotor. Ula min sipediat peruista ntah pe penampilenta ipengaruhi cara si bage.

12, 13. Patoken kai si banci nampati kita milih peruista?

¹² Selaku umat Jahwe, i japa pe lalap ateta peruista rapi, bersih, ntabeh ngidahsa, janah sopan. Peruista arusna “la lebihsa” janah teridah maka kita  ‘beluh rukur,’ si e mbuktiken maka kita “nembah Dibata.”​—1 Timotius 2:9, 10; Judas 21.

¹³ Cara peruista banci mpengaruhi pendapat kalak kerna Jahwe bage pe umatNa. Ateta min kai pe silakoken tujunna “guna kemulian Dibata.” (1 Korinti 10:31) Adi mehuli peruista, e buktina siergai perasan ras pendapat kalak si deban. Emaka sanga sitentuken ateta uga peruista ntah pe penampilenta, ingetlah maka pilihenta e erpengaruh man kalak si deban.​—1 Korinti 4:9; 2 Korinti 6:3, 4; 7:1.

14. Kai si arus siukuri kerna peruista sanga pulung ntah erberita?

¹⁴ Uga peruista sanga kita i bas perpulungen ntah pe erberita? Jadi cakap nge kita perban peruista e? Mela nge kalak si deban ngidah peruista? Urusenta saja nge siakap cara peruista? (Pilipi 4:5; 1 Petrus 5:6) Pastilah mejile min ateta kita itatap kalak, tapi si tuhu-tuhu erban kita mejile eme sipat-sipat Kristenta. Sipat-sipat e me si inen Jahwe sanga ngenen kita, eme ‘jile si rehna i bas pusuh nari, . . .  si meherga kel i lebe-lebe Dibata.’​—1 Petrus 3:3, 4.

15. Memang la itetapken Jahwe uga arusna peruista, tapi kai si iarapkenNa?

¹⁵ I belang-belang doni, peruis umat Jahwe la seri, tergantung kebiasan ras carana rukur. Janah perbedan e erban mejile. Memang labo lit ibereken Jahwe daptar peraturen kerna kai si banci ras si la banci sipake. Tapi iberekenNa patoken Pustaka si Badia si banci nampati kita erban pilihen si mehuli. (Heber 5:14) Kai pe keputusenta, si mbelin ntah pe si kitik, ate Jahwe siban min keputusen perban  keleng ateta Ia bage pe kalak si deban.​—Baca Markus 12:30, 31.

16. (a) Kai si iajarken doni enda kerna sen? Tapi kai si iajarken Jesus? (b) Penungkunen kai si arus sisungkuni man banta?

¹⁶ Ate Setan kerina kalak erpengakap maka sen ras erta banci erban ermeriah ukur. Tapi kalak si nembah Jahwe tehna si e labo tuhu. Tek kita man kai si ikataken Jesus, nina, “Aminna pe sekalak jelma melala ertana, kegeluhenna labo asil arah kai si lit i bas ia.” (Lukas 12:15) Sen la banci erban kita  tuhu-tuhu ermeriah ukur. E la banci mereken kita teman situhu-tuhu, kedamen, ntah pe kegeluhen si rasa lalap. Memang perlu nge kita sen guna keperlunta janah sikap ateta geluhta. Tapi gelah meriah ukurta, nina Jesus arus kita rembak ras Dibata, janah siban ibadatta man baNa jadi si pentingna i bas geluhta. (Matius 5:3; 6:22, cataten i teruh) Sungkun bandu: ‘Ipengaruhi cara rukur doni enda nge aku kerna sen? Sen saja nge si rusur kuukuri ras si kucakapken?’​—Lukas 6:45; 21:34-36; 2 Johanes 6.

17. Kai gunana adi itulakndu cara rukur doni enda kerna sen?

¹⁷ Adi tutus ateta ngelayani Jahwe janah situlak cara rukur doni enda kerna sen, geluhta banci reh ulina. (Matius 11:29, 30) Dame kel pusuh ras perukurenta. (Matius 6:31, 32; Roma 15:13) Lanai kita kuatir kerna sen. (Baca 1 Timotius 6:9, 10.) Meriah ukurta mere. (Perbahanen Rasul-Rasul 20:35) Reh buena waktuta ras kalak si keleng ateta. Selain si e, reh tabehna ka siakap medem.​—Pengerana 5:12.

18. Kai si ilakoken Setan man banta?

¹⁸ Iusahaken Setan gelah ceda pertemanenta ras Jahwe, emaka kai pe arus silakoken gelah ula ia berhasil. Arus kita erjuang sebap lawanta eme “malekat-malekat jahat.” (Epesus 6:12) Setan ras malekat-malekat jahatna la atena kita ermeriah ukur ntah pe nggeluh si rasa lalap. (1 Petrus 5:8) Musuh-musuh si megegeh enda erjuang ngelawan kita, tapi alu penampat Jahwe kita banci menang i bas perjuangen e!

19. Kai si ijelasken Epesus 6:14-18 kerna “perlengkapen perang” kalak Kristen?

 ¹⁹ Mbarenda, sekalak prajurit make perlengkapen perang guna ngelindungi dirina i bas peperangen. Bage ka me kita, arus sipake “perlengkapen perang” si ibereken Jahwe man banta. (Epesus 6:13) Perlengkapen e ngelindungi kita. Banci sibaca kerna perlengkapen perang e i bas Epesus 6:14-18, “Emaka, paguhlah kena tedis alu makeken ikat pinggang kebenaren, janah makeken pelindung tenten, eme perbahanen si benar. Selain si e, pakelah sepatu si jadi tanda maka kena nggo ersikap guna mberitaken berita si meriah kerna kedamen. Selain si e kerina, banlah kiniteken jadi ampang-ampang kena, gelah banci imateken kena kerina anak panah si gara i bas si jahat nari. Bage ka pe, alokenlah pelindung takal eme keselamaten ras pedang si ibereken kesah si badia eme kata Dibata. Janah teruslah ertoto alu bimbingen kesah si badia i bas tiap kesempaten alu erbage toto ras pemindon.”

20. Kai si arus silakoken gelah “perlengkapen perang” e lit gunana banta?

²⁰ Adi sekalak prajurit lupa maba sada perlengkapen perang janah e erban lit bagin dagingna si la terlindungi, i bas bagin e me iserang musuh. Adi ateta “perlengkapen perang” ngelindungi kita, ula siban tading sada bagin pe. Arus terus sipake kerina perlengkapen e janah sipastiken sikap keadan perlengkapenta e. Kita terus erperang seh asa Setan, pemerentahenna, bage pe malekat-malekat jahatna  imasapken arah doni enda. (Ketangkasen 12:17; 20:1-3) Emaka adi sangana kita erperang ngelawan sura-sura si salah ntah pe erjuang ngelawan kelemahenta, ula min kita nyerah!​—1 Korinti 9:27.

21. Uga carana gelah menang kita i bas peperangenta?

²¹ Aminna pe labo kita gegehen asangken Iblis, tapi alu penampat Jahwe banci kita menang! Gelah tetap setia, arus kita ertoto man Jahwe, sipelajari KataNa, janah rembak ras turang seninata. (Heber 10:24, 25) Si enda kerina banci nampati kita tetap setia man Dibata janah kinitekenta banci sijaga.

22, 23. (a) Guna njaga kinitekenta, kai penungkunen si perlu siukuri? (b) Kai kari sipelajari i bas pelajaren selanjutna?

²² Katawari pe arus sijaga kinitekenta. (Johanes 15:19) I bas piga-piga situasi, Saksi-Saksi Jahwe beda kel ras jelma si nterem. Sungkun bandu: ‘Tuhu-tuhu nge kuangkai ngkai maka kami arus beda ras jelma si nterem? Tuhu nge kuakap kai si ikataken Pustaka ras budak si setia janah pentar? Megah nge kuakap jadi sekalak Saksi Jahwe? (Masmur 34:3; Matius 10:32, 33) Banci nge kujelasken kinitekenku man kalak si deban?’​—Matius 24:45; Johanes 17:17; baca 1 Petrus 3:15.

²³ I bas melala situasi, menukah kel siakap erban keputusen gelah la ikut i bas bagin doni enda. Tapi mon-mon mesera siakap, sebap terus iban Setan erbage-bage cara guna njebak kita. Salah sada carana eme hiburen. Uga carata milih hiburen alu pentar? Mari sipelajari i bas pelajaren selanjutna.