1, 2. (a) Petunjuk ise si arus siikutken? (b) Penungkunen kai kari sipelajari?

 SANGA kitik denga, pasti pernah kam isuruh orang tuandu ngelakoken si la kam merhat ngelakokenca. Keleng atendu orang tuandu janah itehndu arus ipatuhindu kalak e. Tapi banci saja labo atendu terus matuhi kalak e.

² Siteh Jahwe eme Bapakta si ngkelengi kita. IperdiatekenNa kita janah ipastikenNa kerina si iperluken kita gelah meriah siakap nggeluh. IberekenNa man banta petunjuk gelah kita berhasil. Mon-mon igunakenNa kalak si deban mereken petunjuk man banta. Arus sihamati Jahwe si erkuasa. (Kuan-kuanen 24:21) Tapi engkai mon-mon mesera siakap ngaloken petunjuk? Engkai isuruh Jahwe kita ngikutken petunjuk? Janah uga kita mbuktiken siergai kalak si minpin?​—Nen Penjelasen Tambahen 9.  

3, 4. Engkai manusia lanai sempurna? Engkai maun-maun mesera siakap ngaloken petunjuk arah kalak si deban?

³ Selaku manusia, menukah siakap mberontak. Enda terjadi mulai kin dilaki ras diberu pertama eme Adam ras Hawa erdosa. Aminna pe kalak e iciptaken sempurna, mberontak kalak e ngelawan kuasa Dibata. Dungna, kerina manusia si lahir la sempurna. Perban la sempurna, mesera siakap ngaloken petunjuk arah Jahwe bage pe arah manusia. Selain si e, kalak si igunaken Jahwe guna mereken petunjuk pe la sempurna.​—Kejadin 2:15-17; 3:1-7; Masmur 51:7; Roma 5:12.

⁴ Perban la sempurna, menukah kita jadi sombong. E erban mesera siakap ngaloken petunjuk. Contohna, i bas Israel mbarenda, ipilih Jahwe me Musa minpin bangsaNa, tapi la ia sombong, malahen ia kalak si meterukna rukur i bas jaman e. Lit ka sekalak dilaki gelarna Korah si nggo ndekah ngelayani Jahwe. Tapi dungna ia jadi sombong, la ihamatina Musa, janah la nggit ngaloken petunjuk arah Musa. Ipengaruhina jelma si nterem ngelawan Musa. Kai si terjadi? Kalak e ibunuh. (Bilangen 12:3; 16:1-3, 31-35) I bas Pustaka si Badia banci sidat melala contoh si ngajari kita uga bahayana jadi kalak sombong.​—2 Kronika 26:16-21; nen Penjelasen Tambahen 10.

5. Engkai piga-piga kalak isalahgunakenna kuasana?

⁵ Banci saja nggo pernah iukurindu kerna “kuasa si isalahgunaken.” Mbarenda nari pe nterem kalak  isalahgunakenna kuasana. (Baca Pengerana 8:9.) Contohna Saul. Sanga ipilih Jahwe ia jadi raja Israel, ia mehuli ras meteruk ukur. Tapi, ipediatna sipat sombong ras cemburu turah i bas pusuhna, emaka iusahakenna munuh Daud, kalak si bujur. (1 Samuel 9:20, 21; 10:20-22; 18:7-11) Dungna Daud jadi raja, janah ia me salah sada raja si mehulina i Israel. Tapi pernah isalahgunaken Daud kuasana. Erlua-lua ia ras Batseba eme diberu Uria, janah ibunikenna atena dosana e alu nuruh Uria erperang gelah mate ia i je.​—2 Samuel 11:1-17.

6, 7. (a) Perban sikelengi Jahwe, kai ateta silakoken? (b) Kai si nampati kita gelah patuh paksa mesera ngelakokenca?

⁶ Perban sikelengi Jahwe, siergai ateta petunjukNa. Perban keleng ateta Jahwe lebihen asangken kai pe ntah ise pe, meriah ateta siban ukurNa. (Baca Kuan-kuanen 27:11; Markus 12:29, 30.) Mulai kin pasangen manusia si pertama nggeluh i bas Taman Eden, ate Setan gelah sangsi manusia kerna hak Jahwe merentah. Ate Iblis gelah siakap la lit hak Jahwe nentuken si arus silakoken. Tapi siteh enda situhuna bual. Setuju kita nandangi kata-kata enda, “O Jahwe Dibata kami, Kam me si metunggung ngaloken kemulian, kehamaten, ras kuasa. Sebap Kam si njadikenca kerina si lit.”​—Ketangkasen 4:11.

⁷ Sanga kam kitik denga, banci saja kam iajari gelah tetap patuh man orang tuandu aminna pe la bagi ukurndu. Bage ka pe selaku umat Jahwe, banci  saja lit paksana mesera siakap patuh. Tapi keleng ateta Jahwe janah sihamati Ia, emaka silakoken kerina si banci silakoken guna matuhi Ia. Jesus jadi contoh man banta. Tetap ipatuhina Jahwe paksa mesera ngelakokenca. E me sebapna ikatakenna man Bapakna, “Labo peratenku, peratenNdulah si jadi.”​—Lukas 22:42; nen Penjelasen Tambahen 11.

8. Kai saja cara Jahwe mereken petunjuk man banta? (Nen kotak “ Begikenlah Nasehat.”)

⁸ Gundari, Jahwe mereken petunjuk man banta alu erbage-bage cara. Contohna, iberekenNa kita Pustaka. IberekenNa ka man banta pertua-pertua i runggun. Siergai hak Jahwe merentah alu nghamati kalak si ipakeNa guna mereken petunjuk man banta. Adi situlak penampat kalak e, berarti situlak Jahwe. Sanga itulak kalak Israel Musa, serius iakap Jahwe masalah e. IanggapNa kalak e nulak Ia.​—Bilangen 14:26, 27; nen Penjelasen Tambahen 12.

9. Kai si nampati kita ngikutken petunjuk? Jelasken.

⁹ Sanga siergai kalak si ibere Jahwe kuasa, e bukti maka keleng ateta turang seninata. Ukurilah kerna si enda: Sanga terjadi bencana alam, biasana kelompok si nampati arus erdahin ras-ras guna nelamatken nterem jelma. Gelah kelompok e ratur erdahin, perlu sekalak jelma ngaturkenca janah tiap anggota perlu ngikutken petunjuk. Tapi uga adi lit si la ngikutken petunjuk janah ate-atena saja? Aminna pe mehuli tujunna, perbahanenna e banci erban masalah man temanna sada kelompok, banci saja terjadi masalah si serius. Bage ka pe, adi la siikutken  petunjuk Jahwe janah la siikutken kalak si ibereNa kuasa, kalak si deban banci rate mesui. Tapi sanga sipatuhi Jahwe, e bukti sikelengi turang seninata janah sihamati pengaturen Jahwe.​—1 Korinti 12:14, 25, 26.

10, 11. Kai kari sipelajari?

¹⁰ Kai si ipindo Jahwe guna silakoken, kerina e guna banta. Adi siergai kalak si minpin i bas keluargata, mehuli pengaruhna i bas runggun bage pe pemerentah. Kerina ndatken manpaat.​—Ulangen 5:16; Roma 13:4; Epesus 6:2, 3; Heber 13:17.

¹¹ Adi siteh ngkai maka ipindo Jahwe kita ngergai kalak si deban, e banci nampati kita ngelakoken si e. Mari sipelajari terdauhen uga kita banci mbuktiken pengerganta i bas telu bagin kegeluhen.

12. Kai si arus ilakoken perbulangen?

¹² Iban Dibata keluarga janah iberekenNa man tiap anggota keluarga tanggung jawap. Adi tiap anggota keluarga ndalanken si ipindo Jahwe, kegeluhen kalak e banci mehuli janah kerina banci ndatken manpaatna. (1 Korinti 14:33) Enggo itentuken Jahwe perbulangen jadi kepala keluarga. Enda maksudna iarapken Jahwe ia ngurus ras ngelindungi diberuna bage pe anak-anakna. Emaka sekalak perbulangen arus ertanggung jawap man Jahwe i bas ngurus keluargana. Perbulangen Kristen arus mehuli, perkeleng, janah perbahanenna man anggota keluargana bali bagi perbahanen Jesus man anggota runggun. Adi ilakoken perbulangen  si e, iergaina Jahwe.​—Epesus 5:23; nen Penjelasen Tambahen 13.

13. Uga sekalak ndehara banci ngergai perbulangenna?

¹³ Sekalak ndehara Kristen pe lit tanggung jawapna si penting ras mehamat. Idukungna dilakina si kerja keras guna minpin keluarga gelah mehuli. Radu ras dilakina, ertanggung jawap ia ngajari anak-anakna. Arah usihen si iberekenna, banci iajarina anak-anakna carana ngergai kalak si lit kuasana. (Kuan-kuanen 1:8) Iergaina dilakina janah idukungna keputusenna. Aminna pe la ia setuju nandangi keputusen dilakina, alu cara si mehuli janah mehamat banci ikatakenna uga perasanna. Adi lit diberu Kristen si dilakina labo Saksi, lain ka tantangenna. Tapi, adi ndehara e tetap mehamat ras ngkelengi perbulangenna, banci saja i bas sada wari pagi perbulangen e nggit meteh kerna Jahwe ras nembah Ia.​—Baca 1 Petrus 3:1.

14. Uga anak-anak banci ngergai orang tuana?

¹⁴ Meherga iakap Jahwe anak-anak. Anak-anak perlu perlindungen ras petunjuk. Sanga ipatuhi anak-anak orang tuana, meriah ukur orang tuana. Si pentingna, adi patuh kalak e, iergaina kap Jahwe janah ibanna meriah ukur Jahwe. (Kuan-kuanen 10:1) I bas melala keluarga, anak-anak ipebelin sekalak orang tua ngenca. Enda situasi si mesera kel man orang tua bage pe man anak-anak. Tapi adi ipatuhi anak-anak janah idukungna mamakna ntah pe bapakna, keluarga banci reh ulina. Uga pe keadanna, labo lit keluarga si sempurna. Tapi adi tiap anggota  keluarga ngikutken petunjuk Jahwe, reh riahna ukur keluarga e. Si e maba kemulian man Jahwe, Si Njadiken kerina keluarga.​—Epesus 3:14, 15.

15. Uga kita ngergai kalak si minpin i bas runggun?

¹⁵ Jahwe ngatur kita arah runggun Kristen janah iberekenNa kuasa man Jesus guna ngaturkenca. (Kolose 1:18) Jesus mereken “budak si setia janah pentar” tanggung jawap guna ngurus umat Dibata i doni. (Matius 24:45-47) Gundari “budak si setia janah pentar” eme Badan Pinpinen. Isikapken Badan Pinpinen keperlunta i bas waktu si tepat guna nampati kinitekenta tetap paguh. Pertua, si nampati runggun, bage pe pertua keliling ndukung runggun i belang-belang doni janah ngaloken petunjuk arah Badan Pinpinen nari. Kerina turang seninata si dilaki e ertanggung jawap ngurus kita. Ertanggung jawap kalak e man Jahwe kerna si e. Emaka sanga siergai kalak e, siergai ka Jahwe.​—Baca 1 Tesalonika 5:12; Heber 13:17; nen Penjelasen Tambahen 14.

16. Engkai kita tek adi pertua ras si nampati runggun ipilih alu kesah si badia?

¹⁶ Pertua ras si nampati runggun, nampati runggun tetap setia ras ersada. Memang kalak e manusia si la sempurna bali bagi kita. Jadi uga carana kalak e ipilih? Kalak e arus ncukupi syarat si lit i bas Pustaka. (1 Timotius 3:1-7, 12; Titus 1:5-9) Igunaken Jahwe kesah si badiaNa nampati si nulis Pustaka njelasken syarat-syarat e. Sanga icakapken pertua-pertua kerna ise si cocok jadi pertua ntah si nampati  runggun, ertoto lebe kalak e man Jahwe mindo kesah si badia. Jelas me Jesus ras Jahwe si negu-negu runggun. (Perbahanen Rasul-Rasul 20:28) Dilaki si ipilih guna ndukung ras ngurus kita eme pemere arah Dibata nari.​—Epesus 4:8.

17. Uga carana turang senina si diberu ngergai pengaturen Jahwe?

¹⁷ Mon-mon lit runggun si la lit pertuana ntah pe si nampati runggun guna ngaturken tanggung jawap i je. Biasana, sekalak dilaki si nggo iperidiken banci nampati, tapi adi la lit, sekalak diberu banci ngelakoken dahin sekalak dilaki si nggo iperidiken. Adi bage keadanna, arus ipakena penutup takal, mungkin selendang ntah pe topi. (1 Korinti 11:3-10) Alu bage, iergaina pengaturen Jahwe kerna kalak si ipilihNa guna minpin keluarga bage pe runggun.​—Nen Penjelasen Tambahen 15.

18, 19. (a) Kai si banci sipelajari arah Roma 13:1-7? (b) Uga carata ngergai pemerentah?

¹⁸ Gundari ipediat Jahwe pemerentah erkuasa i bas piga-piga bagin, emaka arus siergai kalak e. Iaturkenna negarana, janah ibanna erbage-bage organisasi guna ncukupi keperlun rakyatna. Kalak Kristen matuhi petunjuk si lit i bas Roma 13:1-7. (Baca.) Siergai “pemerentah si erkuasa” janah patuh man undang-undang i bas negarata ntah pe peraturen i bas inganta tading. Undang-undang e banci erpengaruh man keluargata, pendahinta, ntah pe erta-ertata. Contohna, sigalari pajak janah siurus surat-surat si ipindo pemerentah. Tapi kai si arus silakoken adi ipindo pemerentah  kita ngelakoken si la cocok ras undang-undang Dibata? Nina rasul Paulus, “Kami arus lebih patuh man Dibata selaku penguasa asangken man manusia.”​—Perbahanen Rasul-Rasul 5:28, 29.

¹⁹ Adi arus kita erurusen ras pemerentah, contohna hakim ntah pe polisi, kita arus tetap mehamat. Anak muda Kristen arus mehamat man guru bage pe man si erdahin bas sekolahna. I bas inganta erdahin, arus sihamati bosta aminna pe temanta erdahin la nghamati ia. Alu bage, siusih rasul Paulus, si nghamati pemerentah aminna pe mon-mon mesera. (Perbahanen Rasul-Rasul 26:2, 25) Aminna pe la mehuli perbahanen kalak man banta, kita tetap mehamat.​—Baca Roma 12:17, 18; 1 Petrus 3:15.

20, 21. Kai gunana adi sihamati kalak si deban?

²⁰ I belang-belang doni, nterem kalak reh kurangna pengerganna man kalak si deban. Tapi umat Jahwe la seri ras kalak e. Kerina kalak sihamati. Siikutken petunjuk si itulis rasul Paulus, “Hamatilah erbage-bage jelma.” (1 Petrus 2:17) Sanga sihamati kalak si deban, iperdiatekenna kita. Nina Jesus man banta, “Ersinarlah ban terang kena i lebe-lebe jelma si nterem, gelah banci idahna perbahanen kena si mehuli janah imuliakenna Bapak.”​—Matius 5:16.

²¹ Adi mehamat kita i bas keluargata, i bas runggunta, bage pe i bas daerah inganta tading, perbahanen si mehuli e banci ngiahken kalak gelah nggit erlajar kerna Jahwe. Adi mehamat kita man kalak si deban, sihamati kap Dibata Jahwe. Enda erban Jahwe ermeriah ukur janah sibuktiken keleng ateta Ia.