1, 2. Kai si perlu siteh kerna Setan ras malekat-malekat jahat?

 NGGELUH i bas doni si mbaru si ijanjiken Jahwe pasti luar biasa kel. I je kita nggeluh menurut sura-sura Dibata. Tapi gundari kita nggeluh bas doni si ikuasai Setan ras malekat-malekat jahatna. (2 Korinti 4:4) Aminna pe la banci siidah Setan ras malekat-malekat jahatna, kalak e tuhu-tuhu lit janah megegeh kel.

² I bas pelajaren enda, sipelajari kari carana tetap rembak ras Jahwe bage pe carana ngelindungi diri arah Setan. Erjanji Jahwe pasti isampatiNa kita. Tapi perlu siteh cara Setan ras malekat-malekat jahatna nipu ras ngelawan kita.

3. Kai ate Iblis si ilakokenna?

³ Ituduh Setan maka manusia nggit nembah Jahwe adi runtung saja ngenca, tapi adi nggo susah kel geluhna, lanai kalak e nggit ngelayani Jahwe. (Baca Jop 2:4, 5.) Iperdiateken Setan ras malekat-malekat jahatna kalak si sangana erlajar kerna Jahwe, janah iusahakenna mpengadisa. Merawa kel Setan ras malekat jahatna adi lit kalak si iperidiken. Ipeseri  Pustaka si Badia Iblis ras “singa si erngaung ndarami si man jerngemenna.” (1 Petrus 5:8) Ate Setan ceda min pertemanenta ras Jahwe.​—Masmur 7:2, 3; 2 Timotius 3:12.

4, 5. (a) Kai si la banci ilakoken Setan? (b) Uga carata ‘ngelawan Iblis’?

⁴ La perlu kita mbiar man Setan ras malekat-malekat jahatna, perban labo ipediat Jahwe kalak e bebas ngelakoken kerinana. Erjanji Jahwe maka iselamatkenNa pagi kalak Kristen situhu-tuhu, eme  “kelompok jelma si nterem,” arah “kiniseran si mbelin” nari. (Ketangkasen 7:9, 14) La lit si banci ilakoken Iblis mpengadi si e, sebap ilindungi Jahwe kap umatNa.

⁵ Adi tetap kita rembak ras Jahwe, la banci icedai Setan pertemanenta e. Ibereken Kata Dibata jaminen, ‘Adi kita ras Jahwe, emaka Ia pe ras kita.’ (2 Kronika 15:2; baca 1 Korinti 10:13.) Enterem umat Dibata si setia berhasil ngelawan Iblis perban rembak ras Jahwe. Contohna: Abil, Enoh, Nuah, Sara, bage pe Musa. (Heber 11:4-40) Kita pe banci bage. Adi silawan Iblis, nina Pustaka, ‘Kiam me Iblis e i bas kita nari.’​—Jakup 4:7.

6. Uga Setan nerang kita?

⁶ Memang ipediat Jahwe nge Setan erkuasa tapi la ibere Jahwe ia rate-ate man manusia, emaka icubaken Setan kerina cara gelah lanai kita erteman ras Dibata. Gundari, Iblis nerang alu erbage-bage cara, janah cara e nggo ipakena sedekah ribun tahun. Kai saja e?

7. Engkai maka iserang Setan umat Dibata?

⁷ Nina rasul Johanes, “Kerina doni enda lit i bas kuasa si jahat.” (1 Johanes 5:19) Setan si erkuasa i bas doni si jahat enda, janah ikuasaina atena umat Jahwe. (Miha 4:1; Johanes 15:19; Ketangkasen 12:12, 17) Iteh Iblis waktuna lanai ndekah, emaka iusahakenna kel nerang kita sekalak-sekalak gelah la setia man Dibata. Mon-mon langsung kita iserangna, tapi mon-mon erbuni-buni ia nerang kita.

8. Kai si perlu isadari kalak Kristen?

 ⁸ I bas Epesus 6:12 ikataken, ‘Perjuangenta ngelawan malekat-malekat jahat si lit i deher surga.’ Emaka, tiap kalak Kristen si nggo iperidiken arus ikut erjuang ngelawan Iblis ras malekat-malekat si jahat. I bas surat rasul Paulus man kalak Kristen i Epesus, telu kali inasehatina kalak e gelah “tedis alu nteguh.”​—Epesus 6:11, 13, 14.

9. Kai ate Setan ras malekat-malekat jahatna ilakokenna man kita?

⁹ Iusahaken Setan ras malekat-malekat jahatna nipu kita alu erbage-bage cara. Adi nggo berhasil kita ngelawan Setan i bas sada cara, labo ertina nggo pasti kita berhasil ngadapi cara si deban. Idarami Iblis kelemahenta gelah ipakena cara si cocok naluken kita. Tapi kita banci menang, perban nggo ijelasken Pustaka man banta cara-cara Iblis nerang kita. (2 Korinti 2:11; nen Penjelasen Tambahen 31.) Salah sada carana eme si lit hubungenna ras ilmu sihir.

10. (a) Kai kin perbahanen si lit hubungenna ras malekat jahat? (b) Uga perukuren Jahwe kerna perbahanen si lit hubungenna ras malekat jahat?

¹⁰ Contoh perbahanen si lit hubungenna ras malekat jahat, eme ramalen, sihir, tabas-tabas, ntah pe ngerana ras kalak si nggo mate. Ikataken Pustaka perbahanen si lit hubungenna ras malekat jahat eme “perbahanen si mbau,” janah la banci sipersada perbahanen e ras ibadatta man Jahwe. (Ulangen 18:10-12; Ketangkasen 21:8) Kalak Kristen arus tuhu-tuhu ndauh arah kerina perbahanen si lit hubungenna ras malekat jahat.​—Roma 12:9.

11. Kai akibatna adi merhat kel kita meteh ilmu sihir?

 ¹¹ Adi merhat kita meteh ilmu sihir, menukah akap Setan erban kita ikut i bas perbahanen si lit hubungenna ras malekat jahat. Kerina perbahanen e banci erban ceda pertemanenta ras Jahwe.

12. Kai cara si ipake Setan mpengaruhi kita?

¹² Iban Setan gelah bingung kerina kalak. Alu manjar-anjar ibanna kalak ragu, dungna iakap kalak e ‘kejahaten mehuli janah si mehuli jahat.’ (Jesaya 5:20) Iban Iblis kita erpengakap nasehat Pustaka e la erguna janah ikatakenna maka riahen ukurta adi la siikutken patoken Dibata.

13. Ban contohna uga cara Setan erban kalak ragu.

¹³ Cara Setan si mantapna eme erban kalak ragu. Mbarenda nari cara e nggo ipakena. I bas Taman Eden, ibanna Hawa jadi ragu alu nungkun, “Tuhu kin ikataken Dibata man bandu maka la banci ipanndu sada pe buah batang kayu si i bas peken enda?” (Kejadin 3:1) Kenca si e, sanga jaman Jop, isungkuni Setan me Jahwe i lebe-lebe malekat-malekat, “Nggit kin iakapNdu Jop nembah Kam adi la ia rulih?” (Jop 1:9) Kenca Jesus iperidiken, itentang Setan ia, nina, “Adi anak Dibata kin kam, suruh dage batu-batu enda jadi roti.”​—Matius 4:3.

14. Uga cara Setan erban kalak ragu kerna bahayana perbahanen si lit hubungenna ras malekat jahat?

¹⁴ Gundari pe terus iusahaken Setan erban kalak ragu. Gelah la iakap kalak salah perbahanen si lit hubungenna ras malekat jahat, iban Setan perbahanen e tempa-tempa la bahaya. Piga-piga kalak  Kristen pe la isadarina bahaya e. (2 Korinti 11:3) Jadi uga carata ngelindungi dirita? Uga carata mastiken maka la kita itipu Setan? Mari sipelajari cara si ipake Setan guna nipu kita, eme arah hiburen ras ertambar.

15. Engkai maka banci kita la sadar nggo ikut bas hiburen si lit hubungenna ras malekat jahat?

¹⁵ Gundari, melala film, video, acara TV, permainen bas komputer, bage pe bas Internet lit hubungenna ras malekat jahat, sihir bage pe begu-begu. Banci ka arah ramalen, contohna ramalen bintang, garis tan, kartu, ras bola kristal. Enterem kalak meriah kel iakapna si e janah la kapna bahaya, sebap ibuniken Iblis bahayana, malahen ibanna tempa-tempa menarik, meriah, janah dungna merhat kel kita metehsa. Banci saja lit si erpengakap labo lit bahayana nonton acara si lit ilmu sihirna asalken la ilakoken. Perukuren si bage bahaya kel, ngkai?​—1 Korinti 10:12.

16. Ja nari iteh Setan sura-surata ras cara rukurta? Jelasken.

¹⁶ Setan bage pe malekat-malekat jahat la banci itehna perukurenta. Tapi banci itehna sura-surata ras carata rukur arah pilihenta man banta bage pe man keluargata. Adi sipilih film, musik, ntah pe buku kerna dukun, tabas-tabas, kalak si kerasuken, tukang sihir, pampir, ntah pe si debanna, iteh Setan maka merhat kita meteh kerna si bage. Jenari ibanna kita reh merhatna meteh kerna kai pe si lit hubungenna ras malekat jahat.​—Baca Galati 6:7.

17. Engkai kita perlu hati-hati milih pertambarta?

 ¹⁷ Pastilah merhat kita sehat, tapi gundari melala kel kalak sakit. Lit si nggo icubakenna erbage-bage tambar tapi la malem-malem. Emaka igunaken Setan keadan e. (Markus 5:25, 26) Banci saja putus asa kalak e, dungna nggit ngelakoken kai pe gelah malem. Tapi selaku kalak Kristen, arus kita hati-hati gelah ula sipilih pertambar si make tabas-tabas.​—Jesaya 1:13.

18. Pertambar si uga si la banci ipake kalak Kristen?

¹⁸ I bas jaman Israel mbarenda, lit si make tabas-tabas. Nina Jahwe man kalak e, ‘Adi iangkatndu tanndu ertoto, mis Kupudiken. Aminna uga gia buena  pertotonndu, la Aku nggit megikenca.’ (Jesaya 1:15) Cuba siukuri: La nggit Jahwe megiken toto kalak e! Pasti la kita nggit ngelakoken kai pe si banci ncedai pertemanenta ras Jahwe, ntah pe siban Ia lanai nggit nampati kita, apai ka sanga kita sakit. (Masmur 41:4) Emaka ope lenga ertambar, arus siukuri lit ntah lang tabas-tabasna. (Matius 6:13) Adi tambar e lit tabas-tabasna, ula kita nggit ertambar ku je.​—Nen Penjelasen Tambahen 32.

19. Engkai maka nterem kalak mbiar man Iblis?

¹⁹ Enterem kalak erpengakap Iblis bage pe malekat-malekat jahat labo tuhu-tuhu lit, tapi si debanna tek maka kalak e lit sebap nggo pernah langsung igejapkenna. Engkai banci igejapken kalak e? Sebap Iblis bage pe malekat-malekat jahatna ngganggui jelma si nterem. Kai tujunna? Gelah idarami kalak e penampat si dungna erban kalak e arus ngikutken kebiasan si lit hubungenna ras ilmu sihir. Selain si e, ipebiar-biarna ka jelma si nterem alu cerita kerna begu-begu si banci erban manusia cilaka. Biasana meriah kap kalak cerita-cerita si bage janah meriah ka akapna nceritakenca man kalak si deban. Dungna nterem kalak mbiar man Iblis.

20. Engkai la cocok adi rusur siceritaken kerna begu-begu?

²⁰ Cuba ukuri: Ate Setan mbiar min kalak man bana. (2 Tesalonika 2:9, 10) Ibualina jelma si nterem janah ipengaruhina kalak gelah tertarik man perbahanen si lit hubungenna ras malekat jahat, dungna tek jelma si nterem man kai si lenga tentu benar.  Banci saja lit kalak si nceritaken man kalak si deban kerna kai si iakapna nggo pernah idahna ras ibegina kerna begu-begu. Adi rusur iceritakenna man kalak si deban kerna cerita si lenga tentu benar e, dungna nterem jelma meteh cerita e. Pasti la kita nggit nampati Setan gelah reh biarna kalak man bana alu rusur nceritaken kerna begu-begu.​—Johanes 8:44; 2 Timotius 2:16.

21. Kai si arusna siceritaken?

²¹ Adi lit sekalak umat Jahwe si mbarenda pernah lit hubungenna ras begu-begu, padin la iceritakenna man kalak si deban, aminna pe tujunna gelah meriah akap kalak. Umat Jahwe la perlu mbiar kerna kai si banci ilakoken Iblis ntah pe malekat-malekat jahatna. Tapi teruslah siukuri kerna Jesus ras kuasa si nggo ibereken Jahwe bana. (Heber 12:2) Labo pernah iceritaken Jesus kerna begu-begu man murid-muridna gelah meriah kap kalak e. Tapi si rusur iceritakenna eme kerna berita Kerajan ras “perbahanen Dibata si luar biasa.”​—Perbahanen Rasul-Rasul 2:11; Lukas 8:1; Roma 1:11, 12.

22. Kai si perlu siusahaken?

²² Ula kita lupa tujun Setan eme ncedai pertemanenta ras Jahwe. Kerina cara iusahakenna gelah ceda pertemanenta. Tapi siteh nge cara-cara si ipake Iblis janah siusahaken ka ngelawan kerina perbahanen si lit hubungenna ras malekat-malekat jahat. Pasti la ‘sibere kesempaten man Iblis’ erban kita nyerah. (Baca Epesus 4:27.) Jelas me, adi silawan Iblis, la kita banci isidingina janah aman kita i bas perlindungen Jahwe.​—Epesus 6:11.