1-3. (a) Kai si banci sipelajari arah Kuan-kuanen 13:20? (b) Engkai maka sipilih teman si ngkelengi Dibata?

 PERNAH nge idahndu sekalak anak-anak mperdiateken orang tuana? Aminna pe lenga banci ngerana, iperdiatekenna kerina si idahna ras si ibegina. Sanga ia reh galangna, la isadarina mulai iusihna orang tuana. Emaka labo man kemamangen adi kalak si dewasa pe banci mulai seri carana rukur ras perbahanenna bagi kalak si rembak ras ia.

² Banci kita erlajar arah Kuan-kuanen 13:20 nina, “Adi kam erteman ras kalak pentar kam pe ikut jadi pentar.” I bas ayat enda, “erteman ras” sekalak jelma maksudna rusur kita ras ia, labo terjeng i deherna saja. Nina sekalak ahli Pustaka, erteman ras sekalak jelma ertina ngkelengi ia janah rembak siakap ras ia. Biasana kita terpengaruh ras kalak si rusur rembak ras kita. Apai ka adi nggo meriah siakap ras ia.

³ Teman-temanta banci mpengaruhi kita ngelakoken si mehuli ras si la mehuli. Ikataken i bas  Kuan-kuanen 13:20, “Adi kalak bodoh temanindu, kam pe ikut jadi bodoh.” Jelas me, teman-teman si ngkelengi Dibata nampati kita gelah tetap setia man Dibata. Guna nampati kita milih teman alu pentar, mari sipelajari kalak si uga nge si ipilih Jahwe jadi temanNa.

4. Engkai maka kehamaten si mbelin jadi teman Dibata? Engkai maka ikataken Jahwe maka Abraham “temanKu”?

⁴ Jahwe Si Madakuasa mereken kesempaten man banta gelah jadi temanNa. Enda sada kehamaten si mbelin. Jahwe milih temanNa alu hati-hati. IpilihNa kalak si ngkelengi Ia janah si erkiniteken man baNa. Ukuri kerna Abraham. Nggit ia ngelakoken kai pe man Dibata. Rusur ibuktiken Abraham ia setia ras patuh. Ngkorbanken anakna pe eme Isak, nggit ia. Erkiniteken Abraham maka “ngasup Dibata mpekeke anakna i bas si mate nari.” (Heber 11:17-19; Kejadin 22:1, 2, 9-13) Abraham setia ras patuh, emaka ikataken Jahwe ia “temanKu.”​—Jesaya 41:8; Jakup 2:21-23.

5. Adi sekalak jelma setia man Jahwe, uga perasan Jahwe?

⁵ Merga kel iakap Jahwe temanNa sebap pentingen iakap kalak e setia man Jahwe asangken kai pe. (Baca 2 Samuel 22:26.) Kalak e setia ras patuh perban keleng ate kalak e Ia. Ikataken Pustaka maka Dibata “erteman rembak ras kalak si ngelakoken kai si benar,” e me kalak si patuh man baNa. (Kuan-kuanen 3:32, Terjemahan Dunia Baru  [NW]) Iundang Jahwe teman-temanNa jadi tamu si istimewa i rumahNa. IundangNa kalak e guna nembah Ia janah ertoto man baNa katawari pe.​—Masmur 15:1-5.  

6. Kai si arus silakoken adi keleng ateta Jesus?

⁶ Nina Jesus, “Ise pe si ngkelengi aku, ipatuhina nge kataku. Bapakku pe ngkelengi ia.” (Johanes 14:23) Emaka gelah jadi teman Jahwe, arus ka sikelengi Jesus janah silakoken kai si iajarkenna. Contohna, sipatuhi perentah Jesus guna mberitaken berita si meriah janah njadiken murid. (Matius 28:19, 20; Johanes 14:15, 21) Perban keleng ateta Jesus, siikutken “dalan-dalanna alu megermet.” (1 Petrus 2:21) Meriah ukur Jahwe adi silakoken si mehulina guna ngusih AnakNa i bas rananta bage pe perbahanenta.

7. Engkai maka kita arus erteman ras teman Jahwe?

⁷ Teman Jahwe eme kalak si setia, patuh, ras si ngkelengi AnakNa. Bagi cara Jahwe nge kita milih teman? Adi temanta ngusih Jesus janah sibuk ngajari kalak si deban kerna Kerajan Dibata, teman si bage banci nampati kita gelah reh ulina janah tetap setia man Jahwe.

8. Kai kapndu si menarik arah pertemanen Rut ras Naomi?

⁸ I bas Pustaka, lit melala cerita kerna pertemanen. Contohna, Rut ras bibi simetuana, eme Naomi. Kegeluhen ras kuta kalak e la seri, janah ndauh  tuan Naomi asangken Rut. Tapi kalak e banci jadi teman si rembak perban ras-ras ngkelengi Jahwe. Sanga itadingken Naomi atena Moap guna lawes ku Israel, ‘ikutken Rut bibina.’ Ikatakenna man Naomi, ‘Bangsandu jadi bangsaku, janah Dibatandu jadi Dibataku.’ (Rut 1:14, 16) Mehuli kel Rut man Naomi. Sanga seh kalak e i bas Israel, kerja keras kel Rut guna nampati Naomi. Keleng kel ate Naomi si Rut, janah iberena nasehat si mejile man Rut. Ibegiken Rut me Naomi, janah dungna ialoken kalak e melala pasu-pasu.​—Rut 3:6.

9. Kai si erban kam tertarik kerna pertemanen Daud ras Jonatan?

⁹ Contoh si mehuli si deban eme Daud ras Jonatan. Duana kalak e setia man Jahwe. Jonatan me si jadi calon raja i bas Israel, janah umurna 30 tahun tuan asangken Daud. (1 Samuel 17:33; 31:2; 2 Samuel 5:4) Sanga itehna maka Daud si ipilih Jahwe jadi raja, Jonatan la cemburu ntah pe nganggap Daud saingenna. Tapi kai pe ilakoken Jonatan guna ndukung Daud. Contohna, sanga Daud i bas bahaya, isampati Jonatan ia, “ipetetapna ukurna alu pengarapen kerna pengkawali Dibata.” Kesahna pe ipertaruhkenna guna Daud. (1 Samuel 23:16, 17) Daud pe teman si setia ka. Erjanji ia ngelindungi keluarga Jonatan, janah janjina e itepatina aminna pe Jonatan nggo mate.​—1 Samuel 18:1; 20:15-17, 30-34; 2 Samuel 9:1-7.

10. Kai si ipelajarindu kerna pertemanen arah telu kalak Heber?

¹⁰ Saderah, Mesah, Abednego eme telu anak muda Heber si erteman. Sanga anak-anak denga,  kalak e ibaba ndauh arah rumahna. Aminna pe ndauh arah keluargana, teluna kalak e sisampat-sampaten gelah tetap setia man Jahwe. Kenca kalak e dewasa, kiniteken kalak e iuji sanga iperentahken Raja Nebukadnesar kalak e nembah patung emas. Itulak Saderah, Mesah, ras Abednego nembah patung e janah ning kalak e, “La kami nggit nembah dibatandu, janah la kami nggit nembah mungkuk kempak gana-gana emas si enggo ipajekkenndu e.” Sanga kiniteken kalak e iuji, teluna kalak e tetap setia man Dibatana.​—Daniel 1:1-17; 3:12, 16-28.

11. Ja nari siteh Paulus ras Timotius erteman rembak?

¹¹ Sanga rasul Paulus jumpa ras Timotius si nguda denga, idahna Timotius ngkelengi Jahwe janah ermediate kel man runggun. Emaka ilatih Paulus me Timotius nampati turang senina i bas melala daerah. (Perbahanen Rasul-Rasul 16:1-8; 17:10-14) Tutus kel ate Timotius erdahin emaka nina Paulus, “Ia jadi budak ras aku guna mberitaken berita si meriah.” Iteh Paulus maka Timotius “tuhu-tuhu ermediate kel” man turang senina. Erkiteken kalak e radu ras erdahin alu tutus ngelayani Jahwe, Paulus ras Timotius pe dungna rembak.​—Pilipi 2:20-22; 1 Korinti 4:17.

12, 13. (a) Engkai i bas runggun pe arus hati-hati milih teman rembak? (b) Engkai ibereken Paulus penginget i bas 1 Korinti 15:33?

¹² I bas runggun banci kita erlajar arah turang seninata janah sisampat-sampaten gelah tetap setia.  (Baca Roma 1:11, 12.) Tapi, i bas runggun pe arus kita hati-hati milih teman rembakta. La seri kerina kebiasan ras daerah asal turang seninata. Lit si mbaru denga bas runggun, lit ka si nggo ertahun-tahun ngelayani Jahwe. Iperluken waktu gelah reh rembakna ras Jahwe, bali bagi buah-buahen merluken waktu gelah banci tasak. Emaka perlu kita sabar,  sikeleng-kelengen, janah tetaplah sipilih temanta alu pentar.​—Roma 14:1; 15:1; Heber 5:12–6:3.

¹³ Mon-mon terjadi situasi si mesera i bas runggun janah arus kita hati-hati. Banci saja lit sekalak turang seninata ngelakoken si salah menurut Pustaka. Ntah pe lit ka si perbahanenna nggit mandangi janah si e banci ncedai runggun. Labo ateta mamang, perban i bas abad si pertama pe mon-mon lit masalah i bas runggun. Emaka dungna ibere rasul Paulus penginget man kalak Kristen, nina, “Ula kam nggit itipu. Pergaulen si la mehuli ncedai kebiasan si mehuli.” (1 Korinti 15:12, 33) Paulus pe ngingetken Timotius gelah hati-hati milih teman rembak. Kita pe gundari arusna bage.​—Baca 2 Timotius 2:20-22.

14. Uga carata njaga pertemanenta ras Jahwe?

¹⁴ Pertemanenta ras Jahwe arus sijaga. E me pertemanenta si mehergana. Emaka ula kita nggit rembak ras ise pe si erban kinitekenta jadi lemah ntah pe si erban lanai kita rembak ras Jahwe. Bali bagi busa si imasukken ku bas lau si melket, la mungkin siarapken busa e dem alu lau si bersih. Bage ka pe, adi erteman kita ras kalak si ngelakoken si salah, la mungkin siarapken menukah siakap ngelakoken si benar. Kita perlu hati-hati milih temanta si rembak.​—1 Korinti 5:6; 2 Tesalonika 3:6, 7, 14.

15. Kai si banci silakoken gelah sidat teman si mehuli bas runggun?

¹⁵ I bas runggun banci kam jumpa ras kalak si tuhu-tuhu ngkelengi Jahwe. Kalak e banci jadi  teman rembakndu. (Masmur 133:1) Ula daramindu teman si seri umurna ras kam saja ntah pe si bali bagi kam. Ingetlah Jonatan si ndauh tuan asangken Daud, janah Rut si ndauh ngudan asangken Naomi. Siikutken ateta nasehat Pustaka si ngataken, ‘Pebelinlah kekelengenta.’ (2 Korinti 6:13; baca 1 Petrus 2:17.) Reh buena sipat-sipat Jahwe si iusihndu, kalak si deban pe reh merhatna jadi temanndu.

16, 17. Adi lit si erban kecewa bas runggun, kai arusna silakoken?

¹⁶ I bas tiap keluarga, labo seri kerina sipat-sipatna, perukurenna, bage pe perbahanenna. Bage ka pe i bas runggun. Perbedan e erban meriah siakap nggeluh, janah melala si banci sipelajari arah sada ras si debanna. Tapi mon-mon perbedan e erban kita la siangkan ras turang seninata, dungna nembeh ateta kalak e. Mon-mon sangkut ukurta ntah pe kitik ukurta. (Kuan-kuanen 12:18) Bicara terjadi si bage, lanai nge kita semangat? Ntah, reh dauhna nge kita arah runggun?

¹⁷ Lang. Aminna pe lit si erban kita kecewa, ula min kita ndauh arah runggun nari. Labo Jahwe si erban kita kecewa. Emaka patut sikelengi Ia janah setia man baNa. (Ketangkasen 4:11) Runggun eme hadiah arah Jahwe nari si nampati kita gelah tetap paguh kinitekenta. (Heber 13:17) Aminna pe lit si erban kita kecewa, ndigan pe la kita nggit nulak hadiahNa e.​—Baca Masmur 119:165.

18. (a) Kai si banci nampati kita gelah tetap rembak ras turang seninata? (b) Engkai arus siampuni kalak si deban?

 ¹⁸ Keleng ateta turang seninata janah rembak ateta ras kalak e. Labo iarapken Jahwe ise pe jadi sempurna, kita pe arusna bage. (Kuan-kuanen 17:9; 1 Petrus 4:8) Kerina kita erban salah, tapi kekelengen nampati kita gelah tetap ‘ngampuni sada ras si debanna.’ (Kolose 3:13) Aminna pe lit masalah si kitik perban la siangkan, la sipebelin si e erkiteken kekelengen. Memang sanga lit si erban kita kecewa, mesera siakap ngelupakenca. Nukahen siakap merawa ras balas dendam. Si e erban kita la ermeriah ukur janah ceda ukurta. Tapi, adi siampuni kalak si erban kita kecewa, perukurenta jadi dame, runggun jadi ersada, janah si pentingna kita tetap rembak ras Jahwe.​—Matius 6:14, 15; Lukas 17:3, 4; Roma 14:19.

19. Ndigan nge kita lanai erteman ras sekalak jelma si lit i bas runggun?

¹⁹ I bas keluarga, tiap anggota arus ngelakoken baginna gelah si deban pe ermeriah ukur. Tapi bayangken adi lit sekalak si ngelawan. Kerina anggota keluarga e terus erusaha nampati ia, tapi la ia nggit isampati. Banci saja itadingkenna rumah ntah pe isuruh kepala keluarga ia nadingken rumah. Si e pe banci ka terjadi i bas runggun. Sekalak jelma banci saja ipilihna terus ngelakoken kai si erban Jahwe la senang janah ncedai runggun.  La ia nggit isampati janah teridah arah perbahanenna lanai atena jadi anggota runggun. Banci saja ipilihna nadingken runggun, ntah pe ipecat arah runggun. Adi e si terjadi, alu terus terang isuruh Pustaka kita ‘lanai erteman’ ras ia. (Baca 1 Korinti 5:11-13; 2 Johanes 9-11) Enda pasti mesera kel ndalankenca adi si ipecat e temanta ntah pe anggota keluargata. Tapi i bas si e, arus kita lebih setia man Jahwe asangken man ise pe.​—Nen Penjelasen Tambahen 8.

20, 21. (a) Engkai pengaturen kerna pemecaten mbuktiken kekelengen? (b) Engkai penting milih teman alu pentar?

²⁰ Pengaturen kerna pemecaten mbuktiken kekelengen Jahwe. E erban runggun tetap aman arah kalak si la diatena patoken Jahwe. (1 Korinti 5:7; Heber 12:15, 16) E nampati kita mbuktiken kekelengenta man Jahwe, man gelarNa si badia, bage pe man patokenNa si meganjang. (1 Petrus 1:15, 16) Selain si e, pemecaten bukti keleng ate Jahwe man kalak si ipecat e. Disiplin si tegas e banci nampati ia gelah sadar maka kai si ilakokenna e salah, janah tersuruh ukurna robah. Enterem kalak si pernah ipecat dungna mulihken ku Jahwe janah meriah ukur runggun ngalo-ngalosa.​—Heber 12:11.

²¹ Ugapa pe, teman-temanta mereken pengaruh man banta. Emaka penting kel hati-hati milih teman. Adi sikelengi kalak si ngkelengi Jahwe, kalak e banci nampati kita gelah tetap setia man baNa seh rasa lalap.