Undang-undang Dibata rehna arah patokenNa. PatokenNa eme kai si benar janah si e lit bas Pustaka. Patoken e nampati kita meteh perasan ras perukuren Dibata, erban keputusen si mehuli janah ngelakoken si benar, terlebih ka adi situasina la jelas kel ipebetehken undang-undang Dibata.

▸ Pelajaren 1, paragrap 8

Patuh man Jahwe ertina silakoken kai si isuruhNa. Ate Jahwe sipatuhi min Ia perban keleng ateta Ia. (1 Johanes 5:3) Adi sikelengi Dibata janah tek kita man baNa, siikutken nasehatNa i bas situasi kai pe. Sipatuhi Ia aminna pe mesera siakap, janah si e erguna kel sebap kai si iajarken Jahwe erban sikap geluhta gundari, janah i bas wari si pepagi pe ijanjikenNa melala pasu-pasu banta.​—Jesaya 48:17.

▸ Pelajaren 1, paragrap 10

Kita iciptaken Jahwe labo bagi robot. Tapi tiap kalak ibereken Jahwe kebebasen, ntah pe bebas erban keputusen. (Ulangen 30:19; Josua 24:15) Banci siban keputusen si mehuli, tapi adi la hati-hati, banci siban keputusen si la mehuli. Selain si e, bebas ka kita nentuken sendiri guna setia man Jahwe ntah lang, janah sikelengi Ia ntah lang.

▸ Pelajaren 1, paragrap 12

Enggo itetapken Jahwe patoken ntah pe petunjuk kerna perbahanenta. Banci sipelajari bas Pustaka kerna patoken e gelah  sikap geluhta. (Kuan-kuanen 6:16-19; 1 Korinti 6:9-11) Petunjuk e pe nampati kita meteh perukuren Dibata kerna si benar ras si salah, ngajari kita cara ngkelengi, erban keputusen si mehuli, ras carana mehuli man kalak si deban. Aminna pe nterem kalak si lagu langkahna reh cedana, tapi patoken Jahwe la robah. (Ulangen 32:4-6; Maleaki 3:6) Adi siikutken patoken Jahwe, meriah ukurta janah kita pe sehat.

▸ Pelajaren 1, paragrap 17

Pusuh peraten eme perasan si banci sigejapken kerna kai si benar ras si salah. Tiap kalak ibereken Jahwe pusuh peraten. (Roma 2:14, 15) Gelah pusuh peraten erpungsi alu mehuli, perlu silatih alu patoken Jahwe. Pusuh peratenta nampati kita erban keputusen si erban Dibata senang. (1 Petrus 3:16) Pusuh peratenta banci mpersingeti kita sanga siban ateta keputusen si la mehuli, banci ka erban latih ukurta kenca ngelakoken si salah. Pusuh peraten banci lanai erpungsi alu mehuli, tapi alu penampat Jahwe banci ka siban mulihi erpungsi alu mehuli. Adi pusuh peratenta mehuli, merga siakap banta janah dame siakap.

▸ Pelajaren 2, paragrap 3

Adi mbiar kita man Dibata, pasti sikelengi ras sihamati Ia, la silakoken kai pe si erban Dibata la senang, tapi silakoken kai si mehuli janah situlak si la mehuli. (Masmur 111:10) Perban mbiar, sibegiken kerina kataNa alu megermet, janah sitepati janjita man baNa. Mbiar man Dibata mpengaruhi carata rukur, perbahanenta, ras keputusenta tiap wari.

▸ Pelajaren 2, paragrap 9

Ertobat ertina kita tuhu-tuhu nyesal perban kesalahenta. Adi keleng ateta Dibata, pasti nyesal kel kita perban sisadari kai si nggo silakoken la cocok ras patoken Jahwe. Adi nggo silakoken si salah, perlu sipindo pengampunen Jahwe alu dasar korban tebusen Jesus Kristus. (Matius 26:28; 1 Johanes 2:1, 2) Adi tuhu-tuhu kita ertobat janah lanai silakoken kai si salah, teklah maka iampuni Jahwe nge kita. Lanai perlu salah siakap banta erkiteken salahta si mbarenda. (Masmur 103:10-14; 1 Johanes 1:9; 3:19-22) Arus erjuang kel kita gelah erlajar arah kesalahenta, siubah perukurenta si salah, janah nggeluh bagi patoken Jahwe.

▸ Pelajaren 2, paragrap 18

Adi lit sekalak jelma si ngelakoken dosa si serius, la nggit ertobat, janah itulakna ngikutken patoken Jahwe, ia lanai banci jadi anggota runggun. Perban terus la ikutkenna patoken Dibata, ia arus ipecat. Adi sekalak jelma ipecat, lanai kita banci erurusen bage pe ngerana ras ia. (1 Korinti 5:11; 2 Johanes 9-11) Pengaturen pemecaten e ngelindungi gelar Jahwe ras runggun. (1 Korinti 5:6) Pemecaten eme disiplin si banci nampati sekalak jelma si erdosa, gelah isadarina maka arus ia ertobat janah alu bage banci mulihken ku Jahwe.​—Lukas 15:17.

▸ Pelajaren 3, paragrap 19

Keleng ate Jahwe kita janah nggit Ia nampati kita. E me sebapna ibereNa kita si negu-negu, petunjuk, ras nasehat arah Pustaka bage pe arah kalak si ngkelengi Dibata. Perban la sempurna, kita perlu penampat. (Jeremia 17:9) Adi sihamati ras sibegiken  kalak si ipake Jahwe, e ertina sihamati janah sipatuhi Jahwe.​—Heber 13:7.

▸ Pelajaren 4, paragrap 2

Perban erdosa, menukah siakap mentingken bana ras sombong. Tapi iarapken Jahwe kita meteruk ukur. Sanga sibandingken dirita ras Jahwe, sisadari labo japahna pe kita, i je me kita mulai meteruk ukur. (Jop 38:1-4) Kalak si meteruk ukur itehna kelebihen ras kekurangenna, la ia mbiar ngaku salah, mindo maap, janah nggit ia ngaloken nasehat. Kalak si meteruk ukur tek man Jahwe janah ikutkenna petunjukNa. Kalak si meteruk ukur iukurina kalak si deban, pentingen kapna kalak asangken dirina. Tapi kalak si sombong pentingen akapna dirina asangken kalak si deban.​—1 Petrus 5:5.

▸ Pelajaren 4, paragrap 4

Kalak si erkuasa eme kalak si banci mereken perentah ras erban keputusen. Jahwe kap Penguasa si meganjangna i surga bage pe i doni. Erkiteken Ia si nciptaken kerinana, Ia kap si erkuasana i bas kerinana. KuasaNa e ipakeNa guna kepentingen kalak. Ibereken Jahwe tanggung jawap man piga-piga kalak guna ngurus kita, contohna: orang tua, pertua i runggun, bage pe pemerentah. Ate Jahwe patuh kita man kalak e. (Roma 13:1-5; 1 Timotius 5:17) Tapi adi undang-undang manusia la cocok ras undang-undang Dibata, sipatuhilah undang-undang Dibata. (Perbahanen Rasul-Rasul 5:29) Adi sipatuhi kalak si ipake Jahwe, sihamati kap keputusen Jahwe.

▸ Pelajaren 4, paragrap 7

Ipake Jahwe pertua eme turang senina si dilaki si erpengalamen guna ngurus runggun. (Ulangen 1:13; Perbahanen Rasul-Rasul 20:28) Isampati pertua kita gelah tetap rembak ras Jahwe, janah banci eribadat alu meriah ukur ras teratur. (1 Korinti 14:33, 40) Arus icukupi kalak e syarat si lit bas Pustaka, alu bage kalak e ipilih alu kesah si badia. (1 Timotius 3:1-7; Titus 1:5-9; 1 Petrus 5:2, 3) Tek kita janah sidukung organisasi Dibata, emaka meriah siakap erdahin ras pertua.​—Masmur 138:6; Heber 13:17.

▸ Pelajaren 4, paragrap 8

Ibereken Jahwe orang tua tanggung jawap guna ngurus anak-anakna ras keluargana. Tapi, ijelasken Pustaka perbulangen kap kepala keluarga. Adi lanai lit bapak i bas keluarga, mamak si jadi kepala keluarga. Tanggung jawap kepala keluarga eme mereken pangan, paken, bage pe ingan tading. Janah si pentingna, arus ipinpinna keluargana nembah Jahwe. Contohna, ipastikenna keluargana ratur reh ku perpulungen, erberita, janah radu ras erlajar Pustaka. Kepala keluarga pe arus erban keputusen. Bali bagi Jesus, iusahakenna ka min mehuli ras masuk akal, labo kejam ntah pe keras. Si e kerina erban anggota keluarga sikeleng-kelengen, alu bage banci aman iakap keluarga janah reh rembakna ras Jahwe.

▸ Pelajaren 4, paragrap 12

Badan Pinpinen eme sekelompok dilaki si erpengarapen nggeluh i surga si ipake Dibata ngaturken umatNa. I bas abad pertama, ipake Jahwe badan pinpinen negu-negu runggun kalak Kristen si pertama guna eribadat ras erberita. (Perbahanen  Rasul-Rasul 15:2) Gundari, kelompok dilaki si ngelayani selaku Badan Pinpinen, eme si negu-negu, mere petunjuk, ras ngelindungi umat Dibata. Sanga iban kalak e keputusen, ikutken kalak e Kata Dibata ras kesah si badia. Ikataken Jesus maka kelompok si ipilih e me si jadi “budak si setia janah pentar.”​—Matius 24:45-47.

▸ Pelajaren 4, paragrap 15

Mon-mon sekalak turang senina si diberu ipindo ngelakoken dahin runggun si biasana ilakoken sekalak dilaki. Adi bage, ipakena me penutup takal guna nghamati aturen Jahwe. Si e i bas situasi tertentu saja. Misalna, ipake sekalak diberu tutup takal adi sangana iajarina kalak si deban kerna Pustaka, janah paksa si e lit i je dilakina ntah turang senina si dilaki si nggo iperidiken.​—1 Korinti 11:11-15.

▸ Pelajaren 4, paragrap 17

Adi kita netral, la kita ikut-ikuten i bas urusen politik. (Johanes 17:16) Umat Jahwe ndukung Kerajan Dibata. Siusih Jesus alu tetap netral bas urusen doni.

Isuruh Jahwe kita gelah “patuh man pemerentah, bage pe man penguasa-penguasa.” (Titus 3:1, 2; Roma 13:1-7) Tapi undang-undang Dibata pe ngataken kita la banci munuh. Emaka pusuh peraten kalak Kristen la mpediat ia ikut i bas perang. Adi tugas militer banci igantiken alu tugas si deban, arus iukuri kalak Kristen kai nina pusuh peratenna.

Jahwe ngenca sisembah sebap Ia Si Nciptaken kita. Emaka la perlu siangkat tanta guna nghormati bendera ntah pe ngendeken lagu kebangsan. (Jesaya 43:11; Daniel 3:1-30; 1 Korinti 10:14) Erkiteken nggo ipilih umat Jahwe pemerentahen Dibata,  kalak e la ikut milih partai politik si apai pe bage pe la ndukung kalak si icalonkenna.​—Matius 22:21; Johanes 15:19; 18:36.

▸ Pelajaren 5, paragrap 2

Doni enda dem alu perukuren Setan. Perukuren si bage nggo biasa i tengah-tengah kalak si la ngkelengi ras ngusih Jahwe janah la ngikutken patokenNa. (1 Johanes 5:19) Perukuren ras perbahanen si bage ncidahken perukuren doni enda. (Epesus 2:2) Iusahaken umat Jahwe kel gelah la ipengaruhi perukuren doni enda. (Epesus 6:10-18) Dungna, sikelengi perentah Jahwe janah siusahaken kel gelah cara rukurta bali bagi Ia.

▸ Pelajaren 5, paragrap 7

Murtad eme ngelawan kebenaren Pustaka. Kalak si murtad eme kalak si ngelawan Jahwe, bage pe Jesus si nggo ipilih jadi Raja i bas Kerajan Dibata, janah ipengaruhina kalak si deban gelah ikut ngelawan. (Roma 1:25) Iban kalak e tiap jelma ragu nembah Jahwe. Piga-piga kalak Kristen i bas runggun si pertama jadi murtad, janah kalak si bage lit ngayak gundari. (2 Tesalonika 2:3) Kalak si setia man Jahwe la nggit erteman ras kalak si murtad. La sipediat ise pe mpengaruhi kita gelah merhat mbaca ras megiken ajaren kalak murtad. Tetap kita setia man Jahwe janah Ia saja sisembah.

▸ Pelajaren 5, paragrap 9

I bas Undang-Undang Musa, ipindo bangsa Israel man Jahwe gelah iampuni Jahwe dosa-dosa kalak e. Ibaba kalak e persembahen eme gandum, minak, ras binatang ku rumah pertoton.  Cara si bage ngingetken bangsa Israel kerna Jahwe si nggit ngampuni dosa selaku sada bangsa, bage pe sekalak-sekalak. Dungna, kenca mate Jesus guna nebus dosata, korban pendamen lanai iperluken. Ipersembahken Jesus korban si sempurna “sekali seh rasa lalap.”​—Heber 10:1, 4, 10.

▸ Pelajaren 7, paragrap 6

I bas Undang-Undang Musa, banci ipan manusia daging binatang. Kalak e pe iperentahken ka gelah ipersembahkenna korban binatang. (Imamat 1:5, 6) Tapi la pernah ipediat Dibata umatNa kejam man binatang. (Kuan-kuanen 12:10) Situhuna, Undang-Undang Musa ngelindungi binatang arah perbahanen si kejam. Kalak Israel iperentahken ngurus binatang si lit bas kalak e.​—Ulangen 22:6, 7.

▸ Pelajaren 7, paragrap 6

Bagin-bagin dareh. Lit empat bagin utama dareh eme dareh merah, dareh putih, trombosit, ras plasma dareh. Empatna bagin utama dareh enda adi ibagi-bagi ka jadi bagin si terkitiken, e igelari bagin-bagin dareh. *

Kalak Kristen la nggit adi empat bagin utama dareh imasukken ku dagingna. Tapi banci kin imasukken kalak e bagin-bagin dareh si terkitiken ku dagingna? La lit petunjuk si jelas kel kerna si e. Emaka, kalak Kristen arus erban keputusen menurut pusuh peratenna si nggo iajari Pustaka.

Lit kalak Kristen si itulakna kerina bagin-bagin dareh si terkitiken. Banci saja ipeseri kalak e keadanna ras kalak Israel si isuruh  Undang-Undang Musa gelah kerina dareh binatang si nggo ipedarat arus ‘iamburken ku taneh.’​—Ulangen 12:22-24.

Si deban lain ka keputusenna. Banci saja pusuh peratenna ngaloken bagin-bagin dareh si terkitiken. Banci saja menurut kalak e bagin-bagin dareh si terkitiken e lanai seri ras kesah.

Sanga erban keputusen kerna bagin-bagin dareh si terkitiken, ukurilah:

• Adi kutulak kerina bagin-bagin dareh si terkitiken, ertina kutulak piga-piga pertambar si nambari pinakitku ntah pe si mpengadi pendarahen. Sadar nge aku kerna si e?

• Sanga lit bagin-bagin dareh si terkitiken si kutulak ntah pe kualoken, uga caraku njelaskenca man dokter?

Cara ertambar. Selaku kalak Kristen, la sidonorken darehta, ntah pe sisimpan darehta guna keperlun operasi. Tapi lit cara si deban  si make dareh pasien sendiri. Tiap kalak Kristen arus iputuskenna sendiri uga darehna e igunaken sanga proses operasi, tes kesehaten, ntah pe terapi. Sanga ngelakoken cara pertambar e, dareh pasien banci saja tuhu-tuhu ipedarat arah dagingna i bas piga-piga waktu.​—Guna ndatken keterangen terbuen, nen Menara Pengawal 15 Oktober 2000, halamen 30-31.

Contohna ngencerken dareh (hemodilusi). La ndekah sope operasi, dareh pasien ipedarat janah imasukken me cairen ku daging pasien si nggantiken dareh si nggo ipedarat ndai. Kenca si e, sanga operasi ntah pe la ndekah kenca operasi, darehna e iulihken ka mulihi ku daging pasien.

Pertambar si deban eme nelamatken sel (cell salvage). Sanga operasi, ipepulung me dareh pasien si bene, ibersihken, janah iulihken ka ku pasien e paksa operasi ilakoken ntah pe la ndekah kenca operasi.

Banci saja lit sitik bedana cara tiap dokter. Emaka, ope lenga milih cara ertambar bagi operasi, meriksa kesehaten, ntah pe terapi, perlu iteh kalak Kristen lebe alu jelas kai kari si ilakoken dokter e man darehna.

Sanga erban keputusen kerna pertambar si make dareh, ukurilah penungkunen enda:

• Adi lit dareh si arus ipedarat arah dagingku nari, janah banci saja rempet ngadi kentisik prosesna, kai nina pusuh peratenku?  Bagin arah dagingku denga nge kuakap dareh e? La kin kuakap dareh e arus ‘iamburken ku taneh’?​—Ulangen 12:23, 24.

• Adi i bas cara ertambar e lit darehku si ibuat, janah iubah jenari iulihken ka ku dagingku, cocok kin iakap pusuh peratenku si ilatih Pustaka?

• Sadar nge aku adi kutulak kerina pertambar si termasuk make darehku sendiri ertina la kualoken tes dareh, cuci dareh, ntah pe make mesin si nggantiken pungsi paru-paru ntah pe jantung?

Ope lenga erban keputusen kerna bagin-bagin dareh si terkitiken ras pertambar si make darehta sendiri, arus kita ertoto lebe mindo penampat Jahwe janah arus siangkai alu jelas kerna si e. (Jakup 1:5, 6) Kenca si e, arus sipake pusuh peratenta si ilatih Pustaka guna erban keputusen. La man sungkunen kalak si deban kerna kai si arus silakoken bicara ia arah kita, ntah pe la sipediat kalak si deban mpengaruhi keputusenta.​—Roma 14:12; Galati 6:5.

▸ Pelajaren 7, paragrap 11

Perbahanen si bersih maksudna bersih i lebe-lebe Dibata. Enda termasuk perukuren, rananta, ras perbahanenta. Iperentahken Jahwe kita gelah mpedauh kerina jenis perbahanen seks si salah. (Kuan-kuanen 1:10; 3:1) Arus siban keputusen maka siikutken patoken Jahwe kerna perbahanen si bersih, termasuk ope lenga kita lit bas situasi si banci erban kita ngelakoken kai si salah. Kita perlu terus ertoto mindo penampat Dibata gelah banci sijaga perukurenta tetap bersih janah situlak godan si banci erban kita ngelakoken perbahanen seks si salah.​—1 Korinti 6:9, 10, 18; Epesus 5:5.

▸ Pelajaren 8, paragrap 11

Perbahanen si la meteh mela termasuk perbahanen ras ranan si tuhu-tuhu la cocok ras patoken Dibata. Kalak si ngelakoken e la ngergai undang-undang Dibata. Sanga sekalak jelma ersalah perban ngelakoken perbahanen si la meteh mela, panitia pengadilen si ngurussa. Perbahanen si najis termasuk erbage-bage perbahanen si salah. Tergantung uga kelekna masalahna, piga-piga perbahanen si la meteh mela ras si najis banci saja panitia pengadilen bas runggun si ngurussa.​—Galati 5:19-21; Epesus 4:19; guna ndatken keterangen terbuen, nen “Pertanyaan Pembaca” si lit bas Menara Pengawal 15 Juli 2006.

▸ Pelajaren 9, paragrap 7; Pelajaren 12, paragrap 10

Ate Jahwe perbulangen ras ndehara ngenca si banci ngelakoken hubungen seks. Tapi adi lit si njemak-njemak alat kelaminna seh asa puas napsu seksna, e ertina ipuaskenna seksna alu cara si najis. Kebiasan e banci ncedai pertemanenna ras Jahwe, reh belinna sura-sura seksna si salah, janah perukurenna kerna seks jadi salah. (Kolose 3:5) Kalak si biasa ngelakoken si e janah mesera akapna mpengadisa, ula min ia nyerah. (Masmur 86:5; 1 Johanes 3:20) Adi bage keadanndu, ertotolah man Jahwe mindo penampatNa. Pedauhlah kai pe si banci erban pikirenndu kotor, contohna pornograpi. Cakapkenlah man orang tua Kristen ntah pe man teman rembakndu si ngergai undang-undang Jahwe. (Kuan-kuanen 1:8, 9; 1 Tesalonika 5:14; Titus 2:3-5) Teklah kam pasti idah Jahwe janah iergaiNa kel usahandu gelah tetap bersih.​—Masmur 51:19; Jesaya 1:18.

▸ Pelajaren 9, paragrap 9

Adi la sada ngenca teman geluhna, e ikataken poligami. Perjabun si iban Jahwe eme sada dilaki ras sada diberu. I bas jaman Israel mbarenda, ipediat Jahwe sekalak perbulangen lebih arah sada ndeharana, tapi situhuna labo bage tangtangna sura-sura Jahwe. Gundari, lanai ipediat Jahwe poligami. Sada perbulangen sada ngenca banci ndeharana, janah sada ndehara sada ngenca banci perbulangenna.​—Matius 19:9; 1 Timotius 3:2.

▸ Pelajaren 10, paragrap 12

Ate Jahwe gelah perbulangen ras ndehara ersada sedekah kalak e nggeluh. (Kejadin 2:24; Maleaki 2:15, 16; Matius 19:3-6; 1 Korinti 7:39) Ipediat Jahwe kalak e sirang adi lit si erlua-lua. Adi bage terjadi, ipediat Jahwe teman geluh si la ersalah erban keputusen cerai ntah lang.​—Matius 19:9.

Mon-mon, ersada arih pasangen Kristen guna ranggung aminna pe la lit si ngelakoken perbahanen seks si salah. (1 Korinti 7:11) Kai si jadi alasenna ranggung?

• Alu sengaja la icukupi perbulangen keperlun keluargana seh asa lanai lit sen keluargana ntah pe panganna.​—1 Timotius 5:8.

• Isiksa alu kejam. Maksudna, kesehaten ras kesah teman geluhna jadi bahaya.​—Galati 5:19-21.

• Hubungenna ras Jahwe jadi bahaya. E maksudna, sekalak perbulangen ntah ndehara erban teman geluhna lanai banci nembah Jahwe.​—Perbahanen Rasul-Rasul 5:29.

▸ Pelajaren 11, paragrap 19

Kerina kita perlu ipuji ras isemangati. (Kuan-kuanen 12:25; 16:24) Banci sipegegehi sada ras si debanna janah siapul-apulen alu  ranan si mehuli janah lembut. Enda banci nampati turang seninata gelah setia janah terus ngelayani Jahwe aminna pe ngenanami kiniseran si seh kel susahna. (Kuan-kuanen 12:18; Pilipi 2:1-4) Adi lit si lanai semangat, perlu sibegiken ia alu mehuli janah sepenggejapen kita. Alu bage siteh ranan ras perbahanen si cocok guna nampati ia. (Jakup 1:19) Usahakenlah nandai turang seninata alu mehuli gelah tuhu-tuhu siangkai keperlunna. Jenari, banci sisampati ia gelah ndeher mulihi ras Jahwe, eme Sumber pengapul ras gegeh si erban kalak e semangat mulihi.​—2 Korinti 1:3, 4; 1 Tesalonika 5:11.

▸ Pelajaren 12, paragrap 16

La iaturken Pustaka kel alu jelas kerna acara pesta perjabun. Tiap daerah la seri kebiasan acara perjabunna. (Kejadin 24:67; Matius 1:24; 25:10; Lukas 14:8) Si pentingna kel i bas acara perjabun eme janji si ibelasken i lebe-lebe Jahwe. Enterem kalak si erjabu si ngundang keluarga ras temanna sanga kalak e erjanji i lebe-lebe Jahwe, janah lit sekalak pertua mpeseh kotbah arah Pustaka. Banci ipilih kalak e erban pesta ntah lang janah pesta si uga si ibanna. (Lukas 14:28; Johanes 2:1-11) Keputusen kai pe si iban kalak e arus ipastikenna acara perjabunna nghamati Jahwe. (Kejadin 2:18-24; Matius 19:5, 6) Patoken Pustaka nampati kalak e erban keputusen si mehuli. (1 Johanes 2:16, 17) Adi lit i je inemen si lit alkoholna, perlu ipastiken kalak e la lit si mabuk. (Kuan-kuanen 20:1; Epesus 5:18) Adi lit acara musik ntah hiburenna, perlu ipastiken kalak e maka acarana nghamati Jahwe. Arus iutamaken pasangen Kristen pertemanenna ras Dibata bage pe ras kalak si deban asangken acara pesta perjabunna.​—Kuan-kuanen 18:22; guna ndatken keterangen terbuen, nen Menara Pengawal 15 Oktober 2006, halamen 18-20, 21-27, 28-31.

▸ Pelajaren 13, paragrap 18

Siban ateta keputusen si mehuli alu patoken Pustaka. Misalna, lit sekalak Kristen si iajak teman geluhna si labo Saksi Jahwe man-man ras keluargana sanga wari raya tertentu. Kai si ilakokenna? Adi ipediat pusuh peratenna ia ikut, janah adi lit i bas acara e bagin si la banci ikutina perban lit hubungenna ras kebiasan agama palsu, ijelaskenna min man teman geluhna kerna si e. Arus ka iukurina pusuh peraten kalak si deban.​—1 Korinti 8:9; 10:23, 24.

Uga adi lit bosndu si mere bonus sanga wari perayan tertentu? Itulakndu nge? Ntah ialokenndu? Ialokenndu ntah lang, e tergantung alasen bosndu mereken bonus e. Bagin arah perayan nge akapna bonus e? Ntah guna ngergai dahinndu saja? Ukurilah kerna si e ras si debanna guna erban keputusen.

I bas situasi si deban, banci saja lit si mere kam hadiah sanga perayan tertentu janah nina, “Kuteh nge la irayakenndu, tapi kubere ateku hadiah e bandu.” Alokenndu ntah lang? Ukurilah alasenna merekenca. Perban mehuli nge ia? Ntah, ijebakna nge kam gelah ikut ngerayakenca? Kenca ngukuri si e, banlah keputusenndu. Kai pe keputusenta, ateta min tetap bersih pusuh peratenta janah tetap setia man Jahwe.​—Perbahanen Rasul-Rasul 23:1.

▸ Pelajaren 13, paragrap 22

I bas melala situasi, adi masalah mis idungi alu dame, biasana labo reh belinna. (Matius 5:23-26) Si pentingna iakap kerina kalak Kristen eme muji Jahwe janah njaga runggun tetap ersada.​—Johanes 13:34, 35; 1 Korinti 13:4, 5.

Adi lit kalak Kristen si ermasalah ras teman sada kiniteken kerna bisnis, kalak e sajalah si ndungisa, janah la perlu ibabana ku pengadilen. Kerna si e, lit nasehat rasul Paulus i bas 1 Korinti  6:1-8. Adi sibaba temanta sada kiniteken ku pengadilen, e banci mere pengaruh si la mejile man gelar Jahwe ras runggun. I bas Matius 18:15-17, lit telu cara si perlu ilakoken kalak Kristen guna ndungi masalah si mbelin, contohna pitnah ras kena tipu: (1) Idungi kalak e saja masalahna radu ras. (2) Adi la dung, pindo penampat man sada ntah dua anggota runggun si paguh kinitekenna. (3) Adi perlu, banci ipindo kalak e penampat pertua bas runggun. Ipake pertua kari patoken Pustaka gelah nampati kerina kalak si lit bas masalah e gelah idungi alu dame. Adi lit si la nggit ngikutkenca, banci saja perlu iban pertua panitia pengadilen.

Lit piga-piga situasi si banci saja arus idungi alu pengadilen. Contohna cerai, pengadilen banci ngaturken kerna hak asuh anak, bage pe ise si ncukupi keperlun geluh. Contoh si debanna pengadilen banci nentuken kerna ise si nggalari ganti rugi, ntah mastiken kerna sah ntah lang surat wasiat si nggo lit. Adi si e ilakoken kalak Kristen i bas pengadilen alu dame, labo ilanggarna nasehat Paulus.

Adi lit kejahaten si serius bagi pemerkosan, pelecehen seks man anak-anak, niksa, nangko, ntah pemunuhen, janah ilaporken kalak Kristen perbahanen si bage man pemerentah, e labo ngelanggar nasehat Paulus.

▸ Pelajaren 14, paragrap 14

Mulai kin Taman Eden nari, nggo iusahaken Setan nipu manusia. (Kejadin 3:1-6; Ketangkasen 12:9) Iteh Setan adi banci ipengaruhina perukurenta, dungna banci silakoken si la mehuli. (2 Korinti 4:4; Jakup 1:14, 15) Ipakena politik, agama, perdagangen, hiburen, sekolah, ras si debanna si ngikutken carana rukur si tempa-tempa mehuli.​—Johanes 14:30; 1 Johanes 5:19.

Ieteh Setan lanai mbue waktuna nipu manusia. Emaka ilakokenna kerina cara gelah reh teremna kalak tertipu, terutama umat  Jahwe. (Ketangkasen 12:12) Adi la kita hati-hati, alu manjar-anjar banci ipengaruhi Iblis perukurenta. (1 Korinti 10:12) Contohna, ate Jahwe perjabunta tahan rasa lalap. (Matius 19:5, 6, 9) Gundari nterem si erpengakap perjabun e hubungen biasa si menukah idungi alu cerai, janah melala acara TV si setuju kerna si e. Emaka, arus sipastiken kita la terpengaruh.

Cara si deban eme gelah la nggit kita iatur. (2 Timotius 3:4) Adi la kita hati-hati, banci lanai siergai kalak si ipilih Jahwe. Contohna, sekalak turang senina si dilaki banci saja mulai nulak petunjuk pertua i runggun. (Heber 12:5) Ntah sekalak turang senina si diberu mulai sangsi man peraturen si iban Jahwe kerna si minpin keluarga.​—1 Korinti 11:3.

Arus siusahaken kel gelah la ipengaruhi Iblis carata rukur. Janah, siusihlah cara rukur Jahwe ras ‘terus siukuri kerna kai si lit i datas.’​—Kolose 3:2; 2 Korinti 2:11.

▸ Pelajaren 16, paragrap 9

Kerina kita merhat sehat. Adi kita sakit, sikap min ateta pertambarta. (Jesaya 38:21; Markus 5:25, 26; Lukas 10:34) Gundari, melala kel cara ertambar arah dokter nari bage pe si debanna. Sanga sipilih ateta pertambarta, penting kel siikutken patoken Pustaka. Siingetlah i bas Kerajan Dibata nge pagi maka kita tuhu-tuhu sehat. Ula perban ngukuri kesehatenta, silupaken ibadatta man Jahwe.​—Jesaya 33:24; 1 Timotius 4:16.

Ula kita nggit ertambar ku ingan si lit hubungenna ras malekat jahat. (Ulangen 18:10-12; Jesaya 1:13) Jadi ope lenga kita ertambar, perlu sidarami asa bancita kerna ja nari ras uga tambar e iban. (Kuan-kuanen 14:15) Ula kita lupa maka Setan terus iusahakenna nipu kita gelah ikut i bas perbahanen si lit hubungenna ras malekat jahat. Adi lit siakap tabas-tabasna tambar e, ula kita nggit makesa.​—1 Petrus 5:8.

▸ Pelajaren 16, paragrap 18