1, 2. (a) Kai nge si iarapken kalak si mbaru erjabu? (b) Penungkunen kai saja si ipelajari i bas pelajaren enda?

 LIT poto penganten dilaki ras diberu sanga perjabunna. Meriah kel iakap kalak e ngukuri masa depanna si dem alu rencana ras arapen. Iarapken kalak e perjabunna tahan rasa lalap ras ermeriah ukur.

² Tapi melala perjabun si tangtangna sikap dungna berubah. Gelah perjabun tahan rasa lalap janah ermeriah ukur, kalak si nggo erjabu perlu petunjuk Dibata. Emaka mari sipelajari jawapen arah Pustaka si Badia kerna penungkunen enda: Kai saja gunana erjabu? Adi erjabu atendu, uga carandu milih teman geluh si mehuli? Uga gelah kam jadi perbulangen ntah pe ndehara si mehuli? Kai si banci nampati gelah perjabun tahan rasa lalap?​—Baca Kuan-kuanen 3:5, 6.

3. Arus kin erjabu gelah ermeriah ukur? Jelasken.

³ Lit si erpengakap adi la erjabu la banci ermeriah ukur. Tapi e labo tuhu. Nina Jesus adi la erjabu  e sada pemere. (Matius 19:11, 12) Janah nina rasul Paulus pe lit gunana adi la erjabu. (1 Korinti 7:32-38) Tapi adi erjabu pe atendu, labo dalih. Ula min sempat kam erjabu erkiteken ipaksa temanndu, keluargandu, ntah pe adatndu.

4. Kai piga-piga untungna adi erjabu?

⁴ Ikataken Pustaka maka perjabun pe pemere arah Dibata janah lit piga-piga untungna. Nina Jahwe man dilaki si pertama eme Adam, ‘La mehuli adi manusia nggeluh sisada. Kubahanlah teman si cocok man bana, guna nampati ia.’ (Kejadin 2:18) Iciptaken Jahwe me Hawa jadi diberu Adam, janah kalak e me jadi keluarga si pertama. Adi kalak si nggo erjabu lit anakna, perjabunna e banci ingan si mehuli guna mpebelin anak e. Tapi, tujun perjabun labo saja gelah lit anak.​—Masmur 127:3; Epesus 6:1-4.

5, 6. Kai si arus ilakoken gelah perjabun reh paguhna?

⁵ Itulis Raja Salomo, ‘Ulin dua kalak asangken sekalak-sekalak, sebap adi dua kalak erdahin, mbelang bekasna. Adi sekalak guling, banci sekalak nari nampati. Tapi adi sisada ngenca, kenca guling ise nari si nampatisa? Tinali si ipiuh telu, mesera ngeretapkenca.’​—Pengerana 4:9-12.

⁶ Perjabun si ermeriah ukur banci erban dua kalak jadi teman si kompak kel si nggit sisampat-sampaten, siapul-apulen, janah ngelindungi sada ras si debanna. Ate keleng banci erban perjabun paguh, tapi gelah perjabun reh paguhna bagi “tinali si ipiuh telu,” perbulangen ras ndehara arus  ngelayani Jahwe. “Tinali si ipiuh telu,” eme telu nali si ipiuh alu mekeskes jadi sada. Nali si bage gegehen asangken dua nali si ipiuh. Emaka, perjabun banci reh paguhna adi ikut Jahwe i je.

7, 8. Kai nasehat Paulus kerna perjabun?

⁷ Kenca nggo erjabu, pasangen e banci erhubungen seks. (Kuan-kuanen 5:18) Tapi, adi sekalak jelma erjabu erkiteken e saja, banci saja la ia pentar milih teman geluh. E me sebapna ikataken Paulus bas Pustaka maka sekalak jelma cocok erjabu adi “nggo cukup umurna,” eme sanga lanai megegeh kel napsu seksna. (1 Korinti 7:36) Ulin adi itimai lebe lewat perasan e. Kenca e, banci ia beluh rukur janah erban pilihen si terulin.​—1 Korinti 7:9; Jakup 1:15.

⁸ Adi erjabu atendu, arus kam masuk akal janah sadar maka tiap perjabun lit tantangenna. Nina Paulus maka kalak si erjabu “inanamina me melala kesusahen.” (1 Korinti 7:28) Perjabun si ermeriah ukur pe lit ka nge kesusahenna. Emaka adi erjabu kin atendu, pastiken teman nggeluh si ipilihndu e tepat.

9, 10. Kai si banci terjadi adi erjabu kita ras kalak si la nembah Jahwe?

⁹ Enda me patoken Pustaka si perlu siinget sanga sipilih teman geluhta: “Ula kena teriket i bas sada pasangen.” (2 Korinti 6:14, cataten i teruh) Perumpaman  e ibuat arah perjuma-juma nari. Labo mungkin ipersada sekalak perjuma dua binatang si la seri galangna ntah pe gegehna i bas sada pasangen guna erdahin i juma. Si e la mehuli sebap erban duana binatang e tersiksa. Bage ka pe, adi kalak si nembah Jahwe erjabu ras kalak si la nembah Jahwe, banci turah melala masalah. Emaka ibereken Pustaka nasehat gelah erjabu asalken ras “pengikut Tuan.”​—1 Korinti 7:39.

¹⁰ Mon-mon, padin iakap sekalak Kristen erjabu ras kalak si la nembah Jahwe asangken lalap sisada. Tapi, adi la siikutken nasehat Pustaka, biasana sinanami kiniseran janah la ermeriah ukur. Selaku kalak si nembah Jahwe, si pentingna i bas geluhta eme ngelayani Ia. Uga nge perasanndu adi la banci icakapkenndu ras teman geluhndu kerna kai si pentingna iakapndu? Enterem kalak pangen kapna sisada asangken erjabu ras kalak si la ngkelengi ras la ngelayani Jahwe.​—Baca Masmur 32:8.

11. Adi milih teman geluh atendu, kai si perlu iukurindu?

¹¹ Tapi labo maksudna ise pe si nembah Jahwe banci jadi teman geluh si mehuli man bandu. Adi erjabu kin atendu, daramilah kalak si tuhu-tuhu ngena atendu janah cocok ras kam. Timailah ngayak jumpa kam ras kalak si seri sura-surana ras kam, janah ngelayani Dibata iakapna si pentingna. Banlah waktundu guna mbaca ras ngukuri nasehat kerna perjabun arah buku-buku si isikapken budak si setia.​—Baca Masmur 119:105.

12. Kai nina Pustaka kerna orang tua si milihken teman geluh man anakna?

 ¹² I bas piga-piga kebiasan, lit orang tua si milihken teman geluh man anakna. Si e ilakoken perban iteh orang tua ise si cocok man anakna. Si enda biasa terjadi bas jaman Pustaka. Emaka, adi keluargandu ngikutken kebiasan e, Pustaka banci nampati orang tuandu meteh sipat-sipat si cocok man bandu. Contohna, sanga ipilih Abraham ndehara man Isak, anakna, si pentingna iakapna labo sen ntah pe uga keluargana, tapi ikelengina Jahwe.​—Kejadin 24:3, 67; nen Penjelasen Tambahen 25.

13-15. (a) Kai saja si perlu isikapken sekalak dilaki si empo atena? (b) Kai saja si perlu isikapken sekalak diberu si sereh atena?

¹³ Adi erjabu kin atendu, pastiken maka kam nggo siap. Banci saja nggo siap kapndu bandu, tapi mari sipelajari kerna kai kin situhuna ertina siap guna erjabu. Jawapenna banci saja la isangkandu.

¹⁴ Ijelasken Pustaka maka perbulangen ras ndehara la seri tanggung jawapna i bas keluarga. E me sebapna beda si perlu isikapken sekalak dilaki bage pe diberu ope lenga erjabu. Adi lit dilaki si empo atena, perlu ipastikenna, nggo nge ia siap jadi kepala keluarga ntah lang. Iarapken Jahwe sekalak perbulangen ngkelengi ndeharana bage pe anak-anakna janah icukupina keperlun sehari-hari keluargana. Si pentingna, perbulangen arus minpin keluargana guna nembah Dibata. Ikataken Pustaka maka dilaki si la banci ngurus keluargana eme kalak si “jahaten asangken kalak si la erkiniteken.” (1 Timotius 5:8) Emaka adi kam sekalak dilaki si empo atendu, ukurilah uga ngelakoken patoken Pustaka enda, ‘Ola erjabu, ope denga lit jaminen ras pencarinndu.’ Ertina, ope lenga kam erjabu, pastiken dirindu banci jadi perbulangen si mehuli bagi si iarapken Jahwe.​—Kuan-kuanen 24:27.

¹⁵ Sekalak diberu si sereh atena perlu ipastikenna dirina, nggo nge siap ndalanken tanggung jawap selaku ndehara, ntah jadi pernanden. I bas Pustaka, melala iceritaken kerna ndehara si mehuli si  ngurus perbulangen ras anak-anakna. (Kuan-kuanen 31:10-31) Gundari nterem kalak si ngukuri kerna kai si banci idatna saja arah teman geluhna. Tapi, ate Jahwe siukuri min kai si banci silakoken man teman geluhta.

16, 17. Adi erjabu atendu, kai si arus iukurindu?

¹⁶ Ope lenga kam erjabu, ukurilah kai si ikataken Jahwe kerna perbulangen ras ndehara. Jadi kepala keluarga labo maksudna sekalak dilaki banci mekpeki ntah pe ceda ibanna ukur keluargana. Tapi kepala keluarga si mehuli ngusih Jesus, si terus ngkelengi janah mehuli man kalak si memang jadi tanggung jawapna. (Epesus 5:23) Sekalak diberu perlu ngukuri kai maksudna ndukung keputusen perbulangenna janah radu ras ngurus keluarga. (Roma 7:2) Perlu ipastikenna maka banci ia ermeriah ukur ras dilaki si la sempurna. Adi la ia banci, padin ia tetap sisada gundari.

¹⁷ Perbulangen ntah pe ndehara arus pentingen iakapna keriahen ukur teman geluhna asangken keriahen ukurna sendiri. (Baca Pilipi 2:4.) Nina Paulus, “Tiap perbulangen arus ngkelengi ndeharana bali bagi ngkelengi dirina, janah tiap ndehara arus tuhu-tuhu mehamat man perbulangenna.” (Epesus 5:21-33) Dilaki bage pe diberu perlu nggejapken kekelengen ras pengergan. Tapi gelah perjabun ermeriah ukur, sekalak dilaki perlu meteh maka diberuna e nghamati ia, janah sekalak diberu perlu itehna maka perbulangenna e ngkelengi ia.

18. Engkai perlu hati-hati sanga ngerondong?

 ¹⁸ Meriah min akap kalak si sangana ngerondong guna nandai terdauhen sada ras si debanna. Enda pe waktuna guna masuk akal ras jujur gelah banci iban kalak e keputusen guna erjabu ntah lang. Sedekah ngerondong, ipelajari kalak e carana ngerana sada ras si debanna bage pe meteh isi pusuhna. Sanga kalak e reh rembakna, wajar adi reh mesrana ate kalak e. Tapi arus ikuasaina perasanna ope lenga erjabu, gelah la ilakokenna perbahanen seks  si salah. Kekelengen situhu-tuhu nampati kalak e ngkuasai diri janah mpedauh kalak e arah perbahanen si ncedai hubungen kalak e bage pe ras Jahwe.​—1 Tesalonika 4:6.

19, 20. Uga perukuren kalak Kristen kerna perjabun?

¹⁹ Melala buku ras film si ceritana idungi alu perjabun si ermeriah ukur. Situhuna acara perjabun e bena-benana denga nge. Tujun Jahwe erban perjabun gelah tahan rasa lalap.​—Kejadin 2:24.

²⁰ Gundari, nterem kalak erpengakap maka perjabun e banci kentisik saja. Menukah iakap kalak erjabu ras cerai. Lit ka si erpengakap adi terjadi masalah, e me waktuna nadingken teman geluhna jenari cerai. Tapi ingetlah perumpaman Pustaka kerna tali si ipiuh telu si megegeh. Nali si bage la menukah retap aminna pe itarik alu megegeh. Adi sipindo penampat Jahwe, perjabunta banci tahan rasa lalap. Nina Jesus, “Kai si nggo ipersada Dibata, la banci isirangken manusia.”​—Matius 19:6.

21. Gelah perbulangen ras ndehara sikeleng-kelengen, kai si arus ilakokenna?

²¹ Kerina kita lit kelebihen ras kekurangenta. Menukah kel ngenen kekurangen kalak, apai ka teman geluhta. Tapi adi kekurangenna sinen, labo kita banci ermeriah ukur. Tapi, adi kelebihenna siperdiateken, perjabunta banci ermeriah ukur. Banci kin kelebihenna saja siperdiateken padahal ia la sempurna? Banci! Iteh Jahwe nge kita la sempurna,  tapi sipat-sipatta si mehuli nge si iperdiatekenNa. Cuba bayangken adi kekurangenta si rusur inenNa! Nina si nulis Masmur, “Adi ateNdu ertaktak kerna dosa kami, ise banci pulah i bas ukumenNdu nari?” (Masmur 130:3) Perbulangen ras ndehara banci ngusih Jahwe alu mperdiateken sipat-sipat si mehuli i bas teman geluhna janah nggit meter ngampuni.​—Baca Kolose 3:13.

22, 23. Engkai maka Abraham ras Sara jadi contoh si mehuli i bas perjabun?

 ²² Kenca ertahun-tahun, perjabun banci reh paguhna. Abraham ras Sara nggo ndekah erjabu janah meriah ukur kalak e. Sanga Abraham isuruh Jahwe nadingken rumahna i kota Ur, umur Sara kira-kira 60 tahun. Banci bayangkenndu uga serana akapna nadingken rumahna si sikap, jenari tading bas tenda-tenda. Tapi Sara jadi teman si mehuli man perbulangenna janah iergaina kel perbulangenna. Emaka idukungna keputusen Abraham janah isampatina ia gelah berhasil.​—Kejadin 18:12; 1 Petrus 3:6.

²³ Pastilah ndatken teman geluh si mehuli labo ertina perbulangen ntah pe ndehara sada kata i bas kai pe. Abraham pernah la setuju nandangi Sara. Tapi nina Jahwe man bana, ‘Banlah bagi si ikataken Sara man bandu.’ Emaka, ilakoken Abraham bage janah asilna mehuli. (Kejadin 21:9-13) Adi mon-mon la ersada arihndu ras teman geluhndu, ula kecewa. Si pentingna, aminna pe la kam setuju, arus kam tetap sikeleng-kelengen janah siergan.

24. Kai si arus silakoken gelah perjabunta mereken kepujin man Jahwe?

²⁴ I bas runggun Kristen, lit ribun keluarga si ermeriah ukur. Adi erjabu atendu, ingetlah maka milih teman geluh eme salah sada keputusen si pentingna. Si e erpengaruh ku segedang geluhndu, emaka daramilah petunjuk Jahwe. Kenca si e, banci kam milih teman geluhndu alu pentar, nikapken perjabunndu, janah erban iketen si megegeh ras perkeleng si mereken kepujin man Jahwe.