1, 2. Kai si banci silakoken gelah tetap ikelengi Dibata?

 KERINA kita merhat sehat ras megegeh. Emaka siusahaken man pangan si sehat, rajin olahraga, janah sijaga kesehatenta. Aminna pe mesera ngelakokenca, la kita nggit nyerah perban siteh gunana. Tapi perlu ka kita megegeh ras sehat i bas bagin si deban.

² Banci saja nggo sitandai Jahwe, tapi perlu terus siban pertemanenta ras Ia reh paguhna. Sanga inasehati Judas kalak Kristen gelah ‘tetap ikelengi Dibata,’ ijelaskenna uga cara ngelakokenca. Nina, “Bangunlah kiniteken kena si badia e.” (Judas 20, 21) Jadi, uga carata mbangun kiniteken si paguh?

3-5. (a) Uga ate Setan perukurenta kerna patoken Jahwe? (b) Uga perasanndu kerna undang-undang ras patoken Jahwe?

³ Penting kel gelah kita sendiri tek patoken Jahwe e si mehulina. Ate Setan meserasa min siakap matuhi patoken Dibata, janah atena min riahen siakap adi kita si nentukenca kerna si benar ras si salah.  Mulai kin Taman Eden nari, nggo iusahaken Setan erban perukuren kalak bage. (Kejadin 3:1-6) Gundari pe terus denga ilakokenna bage.

⁴ Benar kin Setan e? Tuhu kin patoken Jahwe erban kita la bebas? Lang. Perumpamanna: Cuba bayangken kam sangana erdalan bas taman si mejile. Nce lit idahndu tembok si meganjang kel i bas taman e. Banci saja rukur kam, ‘Engkai maka iban tembokna?’ Tapi mis ibegindu singa erngaung arah balik tembok e. Uga gundari akapndu kerna tembok e? Pasti cocok kel iakapndu iban i je tembok, alu bage la kam ipan singa! Patoken Jahwe bali ras tembok e, janah Iblis bali ras singa e. Kata Dibata mpersingeti kita, “Jagalah perukuren kena janah tetaplah erjaga-jaga! Sebap musuh kena, Iblis, erdalan ku jah ku je bagi singa si erngaung ndarami si man jerngemenna.”​—1 Petrus 5:8.

⁵ Ate Jahwe sikap min geluhta. La ateNa kita itipu Setan. E me sebapna ibereNa kita undang-undang bage pe patokenNa guna ngelindungi kita janah erban kita ermeriah ukur. (Epesus 6:11) Nina Jakup, “Kalak si iperdiatekenna undang-undang si sempurna, si maba kebebasen, janah terus ilakokenna, . . . ermeriah ukur me ia.”​—Jakup 1:25.

6. Engkai maka banci kita tek dalan Dibata si mehulina?

⁶ Sanga siikutken nasehat Jahwe, reh ulina geluhta janah reh rembakna kita ras Ia. Contohna, sigejapken manpaatna sanga rusur kita ertoto man baNa. (Matius 6:5-8; 1 Tesalonika 5:17) Meriah ukurta sanga sipatuhi perentah Jahwe gelah pulung  nembah Ia janah mpegegehi sada ras si debanna. Meriah ka ukurta sanga ikut erberita janah ngajar. (Matius 28:19, 20; Galati 6:2; Heber 10:24, 25) Adi terus siukuri e kerina, kinitekenta tetap paguh janah reh tekna kita maka dalan Jahwe e kap si mehulina.

7, 8. Kai si nampati kita gelah ula kuatir kerna percuban si nandangi reh?

⁷ Banci saja kuatir kita adi kinitekenta icubai pagi, janah mesera kel siakap. Adi pernah bage perasanndu, ingetlah kata-kata Jahwe enda, ‘Aku kap Jahwe Dibatandu; Aku ngajari kam guna kiniulinndu, janah naruhken kam ku bas dalan si man dalanenndu. Bicara patuh kam man perentahKu, tentu maler man bandu kemalemen ate bagi lau; janah  pasti reh kemenangen ku kam, bagi galumbang si ergalun ku tepi lawit.’​—Jesaya 48:17, 18.

⁸ Sanga sipatuhi Jahwe, dame siakap bali bagi lau maler si la pernah kerah, janah perbahanenta si benar bali bagi galumbang lawit si terus reh ku tepi pantai. La soal kai si terjadi i bas geluhta, kita banci tetap setia. Ijanjiken Pustaka si Badia, ‘Ambekkenlah kekuatirenndu man Jahwe, gelah kam ipegegehiNa. Sebap la pernah ipediatNa kalak bujur italuken.’​—Masmur 55:23.

9, 10. Kai maksudna jadi dewasa?

⁹ Adi reh rembakna kita ras Jahwe, kita ‘jadi kalak si dewasa.’ (Heber 6:1) Kai ertina jadi kalak dewasa?

¹⁰ Aminna pe umurta ertambahna, kita labo langsung jadi kalak Kristen si dewasa. Gelah jadi dewasa, arus siban Jahwe jadi Temanta si rembakna janah seri siban perukurenta ras perukurenNa. (Johanes 4:23) Nina Paulus, “Kalak si ngikutken sura-sura daging, lalap iukurina sura-sura dagingna e, tapi kalak si ngikutken kesah si badia, lalap iukurina kai si sue ras kesah si badia e.” (Roma 8:5) Kalak si dewasa la ngutamaken kesenangenna ntah pe erta i bas geluhna tapi iutamakenna Jahwe janah ibanna keputusen si pentar. (Kuan-kuanen 27:11; baca Jakup 1:2, 3.) La ipediatna dirina ipengaruhi kai pe si erban ia ngelakoken si salah. Kalak si dewasa itehna kai si benar janah iusahakenna kel ngelakokenca.

11, 12. (a) Kai si ikataken Paulus kerna ‘kengasupen rukur’ kalak Kristen? (b) Uga kalak Kristen si dewasa ipeseri ras atlit?

 ¹¹ Perlu usaha gelah banci jadi kalak dewasa. Itulisken rasul Paulus, “Pangan si keras eme pangan man kalak si dewasa, si kengasupen rukurna rusur ipakena, alu bage terlatih ia i bas mbedaken kai si benar ras kai si salah.” (Heber 5:14) Kata “terlatih” banci ngingetken kita man atlit si rusur latihen.

¹² Sanga sinen atlit si beluh paksana tanding, siteh pasti nggo ndekah ia latihen gelah reh beluhna ia. Ia lahir labo mis jadi atlit. Sanga lit anak si lahir, labo kel itehna cara make tan ras nahena. Tapi dungna, erlajar ia carana njemak barang ras cara erdalan. Alu latihen, dungna ia banci jadi atlit. Bage ka pe, gelah jadi kalak Kristen si dewasa, siperluken waktu ras latihen.

13. Kai si nampati kita gelah seri perukurenta ras perukuren Jahwe?

¹³ I bas buku enda, nggo sipelajari uga gelah perukurenta bali bagi perukuren Jahwe. Emaka siergai ras sikelengi patoken Jahwe. Sanga siban keputusen, sisungkun banta: ‘Kai si ikataken undang-undang ntah patoken Pustaka kerna keadan e? Uga carana kuikutken kata Pustaka? Kai ate Jahwe si kulakoken?’​—Baca Kuan-kuanen 3:5, 6; Jakup 1:5.

14. Kai si arus silakoken gelah paguh kinitekenta?

¹⁴ Terus sipebelin kinitekenta man Jahwe. Bali bagi man pangan si ergizi gelah sehat ras megegeh dagingta, mpelajari kerna Jahwe erban kinitekenta reh paguhna. Sanga mulai sipelajari Pustaka, sipelajari kebenaren dasar kerna Jahwe ras dalan-dalanNa.  Tapi reh dekahna, arus siangkai terbagesen. E me si imaksud Paulus sanga ikatakenna, “Pangan si keras eme pangan man kalak si dewasa.” Alu ndalanken kai si kita pelajari, pentar me kita. Ikataken Pustaka man banta, “Si pentingna si la banci lang ilakokenndu e me kap ndatken kepentaren.”​—Kuan-kuanen 4:5-7; 1 Petrus 2:2.

15. Engkai penting kel ngkelengi Jahwe bage pe turang seninata?

¹⁵ Banci saja sekalak jelma megegeh ras sehat, tapi gelah tetap bage, itehna maka arus terus iperdiatekenna kesehatenna. Bage ka pe, kalak dewasa itehna maka arus iusahakenna kel gelah tetap rembak ras Jahwe. Ingetken Paulus kita, “Teruslah periksa diri kena, erkiniteken denga kin kena ntah lang? Teruslah pastiken uga kin kena situhuna.” (2 Korinti 13:5) La bias terjeng kiniteken si paguh, tapi arus lebih asa si e. Terus min reh kelengna ateta Jahwe ras turang seninata. Nina Paulus, ‘Adi lit bas aku pemeteh, janah paguh kel kinitekenku si erbanca banci kupindahken deleng, tapi la lit kekelengenku, e labo lit ertina.’​—1 Korinti 13:1-3.

16. Uga ate Setan perasanta?

¹⁶ Ate Setan gelah la siakap kita ngasup erban Jahwe senang. Atena kitik min ukurta janah la lit siakap jalan keluar i bas masalahta. Atena min gelah la kita tek man teman sada kinitekenta janah la atena kita ermeriah ukur. (Epesus 2:2) Iteh Setan maka perukuren si bage banci ncedai persadanta janah  lanai kita rembak ras Jahwe. Tapi ibereken Jahwe kita penampat guna ngelawan perukuren si bage, eme arapen.

17. Kai gunana arapenta?

¹⁷ I bas 1 Tesalonika 5:8, ipeseri Pustaka arapenta ras topi si ngelindungi takal sekalak prajurit i bas perang, topi e ikataken jadi “arapen keselamaten.” Janji Jahwe jadi arapen si ngelindungi perukurenta janah nampati kita ngelawan perukuren si la mejile.

18, 19. Kai si erban Jesus tetap setia?

¹⁸ Arapen erban Jesus megegeh. I bas berngi kematenna, inanamina piga-piga situasi si mesera kel. Ihianati teman rembakna ia. Si debanna mersoken ia. Si debanna ka nadingken ia janah kiam. Bangsana pe ngelawan ia, janah merhat kalak e gelah Jesus isiksa seh asa mate. Kai si nampati ia tetap setia aminna  pe ngenanami kiniseran? “Erkiteken keriahen ukur si itama i lebe-lebena, ngasup ia megenggeng i tiang siksan, la kapna mela, janah gundari kundul ia i sebelah kanan tahta Dibata.”​—Heber 12:2.

¹⁹ Iteh Jesus maka adi setia ia, imuliakenna Bapakna janah ibuktikenna maka Setan e perbual. Meriah kel ukurna perban arapen e. Itehna ka maka lanai ndekah jumpa ka ia mulihi ras Bapakna i surga. Arapen e nampati ia setia. Bali bagi Jesus, arus terus siukuri arapenta. Arapen nampati kita tetap setia la soal kai pe si terjadi.

20. Kai si perlu ilakokenndu adi nggo menam bene arapenndu?

²⁰ Inen Jahwe kinitekenta ras kesetianta. (Jesaya 30:18; baca Maleaki 3:10.) Erjanji Ia erban ‘sura-surata seh.’ (Masmur 37:4) Emaka teruslah ukuri  arapenta. Ate Setan bene min arapenta janah la kita tek janji Jahwe e terjadi. Ula min bage perukurenta! Adi menam bene siakap arapenta, pindo penampat Jahwe. Inget ayat si lit bas Pilipi 4:6, 7, “Ula kena kuatir kerna kai pe, tapi i bas kerinana pesehlah pemindon kena man Dibata i bas toto janah pindolah alu ngataken bujur. Alu bage kedamen i bas Dibata nari si banci naluken perukuren kai pe, ngarak-ngarak pusuh ras perukuren kena erkelangken Kristus Jesus.”

21, 22. (a) Kai tujun Jahwe man doni enda? (b) Kai atendu ilakokenndu?

²¹ Teruslah ukuri arapen kerna masa depan si seh kel riahna. Lanai ndekah, kerina kalak nembah Jahwe. (Ketangkasen 7:9, 14) Bayangkenlah kegeluhen i bas doni si mbaru. E pasti ndauh kel ulin asangken si banci sibayangken. Lanai lit Setan, malekat-malekat jahat, ras erbage-bage kejahaten. Lanai kita sakit ntah pe mate. Tapi, medak kita tiap wari alu semangat ras dem gegeh. Kerina kalak erdahin ras-ras erban doni jadi Pardis. Kerina kalak man pangan si ntabeh, janah tading i bas ingan si aman. Lanai lit kalak si jahat ntah kasar, tapi kerina ermediate. Dungna, kerina kalak bas doni “ngenanami kebebasen si mulia si bali bagi si inanami anak-anak Dibata.”​—Roma 8:21.

²² Ate Jahwe gelah siban Ia jadi Temanta si rembakna. Emaka, silakokenlah si mehulina guna matuhi Jahwe janah reh rembakna ras Ia tiap wari. Mbera kerina kita tetap ikelengi Dibata seh rasa lalap!​—Judas 21.