1-3. (a) Engkai maka ipastiken sekalak pernanden gelah anakna bersih? (b) Engkai maka bersih ate Jahwe umatNa?

 BAYANGKEN sekalak pernanden si mehuli sangana nikapken anakna guna lawes ku sekolah. Ipastikenna anakna nggo ridi, sikap peruisna, janah bersih. Alu bage, anak e tetap sehat janah icidahkenna man kalak maka orang tuana ngurus ia alu mehuli.

² Bapakta Jahwe merhat gelah kita bersih ras badia. (Masmur 18:27) ItehNa adi bersih kita, si e erguna  man banta janah mereken kemulian man gelarNa.​—Esekiel 36:22; baca 1 Petrus 2:12.

³ Kai ertina bersih? Janah ngkai maka si e erguna man banta? I bas pelajaren enda siteh kari jawapenna, alu bage siteh kai saja si perlu man pesikapen i bas dirita.

4, 5. (a) Engkai kita perlu bersih? (b) Arah ciptan Jahwe, kai si banci sipelajari kerna perukuren Jahwe i bas kebersihen?

⁴ Arah usihen Jahwe, erlajar kita gelah bersih janah badia. (Imamat 11:44, 45) Emaka bersih ateta kita gelah kita jadi “kalak si ngusih Dibata.”​—Epesus 5:1.

⁵ Arah ciptan Jahwe banci siteh perukurenNa kerna kebersihen. Iban Jahwe udara ras lau gelah tetap bersih. (Jeremia 10:12) Aminna pe doni e nggo ikotori manusia, tapi banci ibersihkenna bana alu melala cara. Contohna, iciptaken Jahwe bakteri si erguna. Bakteri e kitik kel janah iperluken alat guna ngenenca. Banci iubah bakteri e racun jadi lanai bahaya. Enda cara si luar biasa. Bakteri e pe banci mbersihken lau ras udara.​—Roma 1:20.

6, 7. Arah Undang-Undang Musa, kai si arus ilakoken umat Jahwe?

⁶ Banci ka siteh uga pentingna kebersihen arah Undang-Undang Musa si ibereken Jahwe man bangsa Israel. Contohna, arus ibersihken kalak e dagingna gelah ialoken Jahwe ibadatna. I bas Wari Pendamen, imam si mbelin arus ridi dua kali. (Imamat 16:4, 23, 24) Janah sope lenga imam-imam  si deban mpersembahken korban, arus icuci kalak e lebe tan ras nahena. (Keluaren 30:17-21; 2 Kronika 4:6) I bas piga-piga situasi, adi la ipatuhi kalak e undang-undang kerna kebersihen, kalak e banci mate.​—Imamat 15:31; Bilangen 19:17-20.

⁷ Uga adi gundari? Banci melala siteh kerna patoken Jahwe arah Undang-Undang Musa. (Maleaki 3:6) Si e jelas-jelas mbuktiken maka umat Jahwe arus bersih. Patoken Jahwe la berubah. Gundari pe iarapkenNa denga umatNa bersih janah badia.​—Jakup 1:27.

8. I bas kai saja kita arus bersih?

⁸ Menurut Jahwe, bersih maksudna labo saja njaga dagingta, uista, bage pe rumahta tetap bersih. Tapi kerinana arus bersih, e termasuk ibadatta, perbahanenta, bage pe perukurenta. Jelas me, gelah bersih kita iakap Jahwe, arus bersih ras badia siban kerina si lit bas geluhta.

9, 10. Kai maksudna ibadatta arus bersih?

⁹ Ibadat si badia. Ibadatta la banci ersada ras ibadat palsu bas kai pe. Sanga bangsa Israel itaban i Babilon, kalak e ikelilingi bangsa si ibadatna ngelakoken perbahanen seks si salah. Enggo ikataken Jesaya maka bangsa Israel mulih pagi ku rumahna i Israel janah ibangun kalak e mulihi ibadat si badia. Nina Jahwe, ‘Tadingkenlah kuta Babil. Ola jemak barang si pantang, pebadiaken bandu.’ Ibadat kalak e man Dibata la banci ersada ras pengajaren,  kebiasan, ntah pe adat si lit bas agama palsu i Babilon.​—Jesaya 52:11.

¹⁰ Gundari pe kalak Kristen situhu-tuhu arus ndauh arah agama palsu nari. (Baca 1 Korinti 10:21.) I belang-belang doni, melala adat, kebiasan, bage pe agama si terkenal si rehna arah ibadat palsu. Contohna, i bas melala adat, nterem kalak tek maka adi kita nggo mate, lit denga bagin dagingta si nggeluh denga, janah dungna lit melala kebiasan si ilakoken erkiteken tek nandangi si e. (Pengerana 9:5, 6, 10) Arus itulak kalak Kristen kebiasan e. Banci saja ipaksa keluargata kita ngikutken kebiasan e. Tapi la kita nggit ngelakokensa perban bersih ateta i lebe-lebe Jahwe.​—Perbahanen Rasul-Rasul 5:29.

11. Kai maksudna perbahanenta arus badia?

¹¹ Perbahanen si badia. Gelah badia iakap Jahwe, arus kita ndauh arah perbahanen seks si salah, la soal jenis si apai pe. (Baca Epesus 5:5.) I bas Pustaka si Badia, ikataken Jahwe man banta gelah ‘minter situlak perbahanen seks si salah.’ IkatakenNa ka alu jelas maka ise si ngelakoken perbahanen seks si salah janah la ertobat, ‘la pagi iwarisina Kerajan Dibata.’​—1 Korinti 6:9, 10, 18; nen Penjelasen Tambahen 22.

12, 13. Engkai perukurenta arus badia?

¹² Perukuren si badia. Biasana, perbahanenta rehna arah ukurta nari. (Matius 5:28; 15:18, 19) Perukuren si badia erban perbahanenta pe badia. Memang kita la sempurna, emaka perukurenta  banci saja rusur salah. Paksa turah perukuren si bage, minterlah situlak. Adi la situlak, dungna ukurta lanai badia. Banci saja silakoken ateta kai si terus siukuri. Emaka, teruslah siukuri kai si badia. (Baca Pilipi 4:8.) Arus sipedauh kai pe si lit hubungenna ras perbahanen seks si salah bage pe hiburen kekerasen. Arus ka kita hati-hati milih bacanta, tontonenta, bage pe kai si man cakapenken.​—Masmur 19:9, 10.

¹³ Gelah tetap kita ikelengi Dibata, arus sijaga ibadatta, perbahanenta, bage pe perukurenta tetap bersih. Tapi penting ka iakap Jahwe gelah dagingta pe bersih.

14. Engkai penting njaga dagingta bersih?

¹⁴ Adi bersih siban dagingta ras sekelilingta, e erguna man banta ras kalak si deban. Entabeh siakap janah kalak pe meriah kapna ras kita. Tapi lit alasen si lebih penting, eme perban simuliaken ateta Jahwe. Ukuri kerna si enda: Adi idahndu anak-anak si lalap kotor, banci saja ipandangindu orang tuana. Bage ka me, adi la kita bersih, kalak pe banci mandangi Jahwe. Nina Paulus, “I bas kai pe, la ate kami erban kalak tertuktuk, gelah pelayanen kami la banci isalahken kalak. Tapi, i bas kai pe icidahken kami maka kami pelayan Dibata.”​—2 Korinti 6:3, 4.

15, 16. Kai si banci silakoken gelah kita tetap bersih?

¹⁵ Dagingta ras uista. Tiap wari arus sijaga dirita  tetap bersih. Contohna, adi banci tiap wari kita ridi. Sicuci tanta alu sabun ras lau, terlebih ka ope lenga kita erdakan, nikapken pangan, bage pe kenca dung make kamar mandi ntah pe ndadap si kotor. Banci saja sepele siakap cuci tan e, tapi enda erban kita la menukah kena pinakit ras kuman, janah kita pe tetap sehat. Adi la lit kamar mandita, banci siban cara si deban gelah tetap bersih. I bas bangsa Israel mbarenda la lit kamar mandina, emaka itanemna kotorenna i bas taneh si ndauh arah rumahna bage pe arah lau.​—Ulangen 23:12, 13.

¹⁶ Uista labo arus mejile kel, merga, ntah pe mode si gundari. Tapi uista arus sikap ras bersih. (Baca 1 Timotius 2:9, 10.) Lalap min ateta  penampilenta mereken kepujin man Jahwe.​—Titus 2:10.

17. Engkai rumahta ras sekelilingna arus bersih?

¹⁷ Rumahta ras sekelilingna. I japa pe kita tading, arus bersih rumahta. Arus sipastiken motorta, kretata, sepedata, ntah kai pe si debanna tetap bersih. Terlebih ka sanga kita lawes ku perpulungen ntah pe erberita, sebap sanga erberita sicakapken kerna kegeluhen si bersih i bas pardis i doni. (Lukas 23:43; Ketangkasen 11:18) Keadan rumahta ras sekelilingna banci mbuktiken maka kita nggo ersikap guna nggeluh i bas doni si mbaru si bersih.

18. Engkai ingan ibadatta arus bersih?

¹⁸ Ingan ibadatta. Sibuktiken penting siakap kebersihen alu njaga ingan ibadatta tetap bersih, contohna Bale Kerajan ntah pe ingan kebaktin. Sanga tangtangna kalak reh ku Bale Kerajan, biasana bersih kel akap kalak e Bale Kerajan e. Enda mereken kepujin man Jahwe. Selaku anggota runggun, kerina kita dat kesempaten mbersihken ntah pe ngurus Bale Kerajan gelah tetap mejile.​—2 Kronika 34:10.

19. Kai si perlu sipedauh?

¹⁹ Aminna pe Pustaka la njelasken kerina kebiasan najis si arus sipedauh, tapi i je lit patoken si nampati kita ngangkai perasan Jahwe kerna si e. La ateNa kita ngisap, ntah make narkoba, ntah pe mabuk. Adi kita teman Dibata, sipedauhlah si e kerina. Engkai? Perban merga kel siakap kegeluhen si iberekenNa. Tapi kebiasan ndai banci erban gendek  umurta, erban pinakit, bage pe erban kalak si lit i deherta banci sakit. Enterem kalak icubakenna ngadi arah kebiasan e gelah sehat. Tapi, selaku teman Jahwe, lit alasenta si tepat kel guna mpedauh kebiasan e, eme perban keleng ateta Dibata. Sekalak diberu si nguda denga ngataken, “Alu penampat Jahwe, geluhku jadi bersih janah lanai aku candu. . . . La mungkin banci kulakoken perubahen enda alu gegehku sendiri.” Mari sipelajari lima patoken Pustaka si nampati kita mpengadi kebiasan si najis.

20, 21. Ate Jahwe, kebiasan kai si arus sitadingken?

²⁰ “Turang senina si ikelengi kami, erkiteken nggo sidat janji-janji e, mari sibersihken dirita ras perukurenta arah kai pe si banci erban kita najis, gelah badia kita alu sempurna perban mbiar man Dibata.” (2 Korinti 7:1) Ate Jahwe gelah sitadingken kebiasan si najis si ncedai perukuren ras dagingta.

²¹ Alasen si pentingna gelah “sibersihken dirita ras perukurenta arah kai pe si banci erban kita najis” lit i bas 2 Korinti 6:17, 18. Nina Jahwe, “Ula nai kuit kai si najis.” Kenca si e erjanji Ia, “Kualoken me kena. Aku me jadi Bapak kena, janah kena me jadi anak-anakKu si dilaki ras si diberu.” Jelas me, adi sipedauh kai pe si erban kita najis ntah pe la bersih, pasti ikelengi Jahwe kita bagi sekalak bapak si ngkelengi anakna.

22-25. Kai patoken Pustaka si nampati kita mpedauh kebiasan si la mehuli?

²² “Arus ikelengindu Jahwe Dibatandu alu  kerina kegeluhenndu, pusuhndu, ras perukurenndu.” (Matius 22:37) Enda me perentah si pentingna. (Matius 22:38) Iarapken Jahwe gelah sikelengi Ia alu bulat ukur. Tapi labo mungkin sikelengi Ia alu bulat ukur adi silakoken kai si erban umurta reh gendekna ntah pe si erban ceda sarap otakta. Emaka, silakokenlah kai pe guna ngergai kegeluhen si iberekenNa.

²³ “[Jahwe] me si mereken kegeluhen, kesah, ras kerinana man manusia.” (Perbahanen Rasul-Rasul 17:24, 25) Adi ibereken temanndu kam hadiah si istimewa, iambekkenndu nge hadiah e ntah icedaindu? Kegeluhen eme hadiah si meherga kel arah Jahwe nari. Siergai kel hadiah e. Emaka simuliakenlah Ia arah cara geluhta.​—Masmur 36:10.

²⁴ “Arus ikelengindu kalak si deban bagi kam ngkelengi dirindu.” (Matius 22:39) Adi lit kebiasanta si najis, labo kita saja si kena akibatna, tapi kalak si ndeher ras kita pe, biasana kalak si ateta keleng. Contohna, sekalak jelma si sada rumah ras kalak si ngisap, ia banci kena penakit si mekelek perban asap isap e. Tapi, adi sipengadi kebiasan si najis e, sibuktiken maka keleng ateta kalak si lit i deherta.​—1 Johanes 4:20, 21.

²⁵ “Teruslah ingetken kalak e gelah patuh man pemerentah, bage pe man penguasa-penguasa.” (Titus 3:1) I bas melala negri, ilarang undang-undangna rakyatna muniken narkoba ntah pe makesa. Iperentahken Jahwe kita gelah sihamati pemerentah ras undang-undangna.​—Roma 13:1.

26. (a) Kai si arus silakoken gelah ialoken Jahwe ibadatta? (b) Engkai maka bersih i lebe-lebe Dibata eme cara nggeluh si mehulina?

 ²⁶ Adi jadi teman Jahwe ateta, banci saja lit siakap si man perubahen. Adi bage mislah silakoken. Labo menukah mpengadi kebiasan si najis, tapi banci nge silakoken! Erjanji Jahwe nampati kita, nina, ‘Aku kap Jahwe Dibatandu. Aku ngajari kam guna kiniulinndu, janah naruhken kam ku bas dalan si man dalanenndu.’ (Jesaya 48:17) Sanga silakoken asa ngasupta gelah tetap bersih ras badia, nggo sipuji kap Dibatata.