Turang Senina si Ikelengi Kami:

Perban keleng ateta Dibata ras kalak si deban, siusahaken erban kalak arah kerina bangsa jadi murid Jesus janah sisampati kalak e gelah banci iperidiken. (Mat. 28:​19, 20; Mrk. 12:​28-31) Kekelengen si enggo sicidahken mbelin kel pengaruhna man kalak si deban. Si e banci kena kel ku kalak si “pusuh ras perbahanenna ngaloken kebenaren guna kegeluhen si rasa lalap.”—Perb. 13:48.

Mbarenda, sanga kita erberita fokus kita ngapal kata pengantar ras mbagiken publikasi. Tapi, gundari perlu siusahaken gelah reh beluhna ercakap-cakap ras kalak si deban. Sicidahken ateta kekelengen man kalak alu ndarami topik si menarik akap kalak e. E ertina perlu siukuri kai si penting ras si menarik akap tiap kalak janah sisesuaiken topik percakapenta. Uga carana?

Bas brosur enda, lit 12 pelajaren si mbahas kerna sipat-sipat si iperluken gelah banci sicidahken kekelengen ras erban murid. Bas tiap pelajaren, sibahas kari usihen arah Jesus ntah pe arah kalak Kristen bas abad pertama. Tujunna eme gelah sanga erberita labo terjeng sihapal kai ateta sikataken, tapi banci sicidahken kekelengen man kalak alu erbage cara. Memang kerina sipat si nandangi sibahas iperluken bas tiap kegiaten pelayanenta. Tapi bas brosur enda, sibahas kari uga sipat tertentu iperluken terlebih sanga kita mbenaken percakapen, ndahi mulihi, ras mandu pelajaren Pustaka.

Sanga mbahas tiap pelajaren, ukurilah uga kam banci ncidahken sipat si sangana ibahas, paksa ngerana kam kari ras kalak bas daerahndu. Usahakenlah mpebelin kekelengenndu man Jahwe ras kalak si deban. Ingetlah, kekelengen ndauh pentingen asangken cara kai pe bas erberita janah e me si banci nampati kam berhasil erban murid.

Meriah kel kap kami banci kerja sama ras kam bas ngelayani Jahwe. (Sep. 3:9) Mbera-mbera, terus ipasu-pasu Jahwe usahandu guna engkelengi kalak si deban ras njadiken murid!