Tentu nggo iusahakenndu alu cara si mehulina gelah perjabun ras keluargandu ermeriah ukur. Tapi, hal-hal si la iarap banci saja terjadi si erban keriahen ukurndu bene. (Pengerana 9:11) Guna ngadapisa, Dibata alu perkeleng nikapken penampat man banta. Adi dalankenndu prinsip-prinsip Pustaka si Badia si lit i teruh enda, kam ras keluargandu ngasup ngatasi musibah, amin gia bas situasi si seh kal serana.

KAI NINA PUSTAKA SI BADIA: ”Ampekenlah kerina kearun atendu man Dibata, sabab ia kap si mperdiateken kam.” (1 Petrus 5:7) Teruslah inget maka mara si nialamindu labo rehna arah Dibata nari. (Jakup 1:13) Adi ngerembakken diri kam man BaNa, Ia pasti nampati alu cara si mehulina. (Jesaya 41:10) ”Turiken isi pusuhndu man BaNa.”​—Masmur 62:9.

Kam pe terapul alu ngoge ras mpelajari Pustaka si Badia tiap wari. Hasilna, kam nggejapken pengapul arah Jahwe i bas kerina kiniseranndu. (2 Korintus 1:3, 4; Roma 15:4) Ia erjanji guna mereken man bandu ’kemalemen ate si la terukuri manusia’.​—Pilipi 4:6, 7, 13.

SI BANCI ILAKOKENNDU:

• Ertotolah mindo penampat man Jahwe gelah banci tetap tenang janah rukur alu mehuli

• Pertimbangken kerina cara si lit guna ngatasisa janah pilihlah apai si mehulina

KAI NINA PUSTAKA SI BADIA: ”Kalak si lit pemetehna, lalap ia merincuh pemeteh, kalak pentar gelgel atena erlajar.” (Kuan-kuanen 18:15) Pepulung kerina keterangen. Pergermetken kai si iperluken tiap anggota keluarga. Cakap-cakaplah ras ia janah begiken ia.​—Kuan-kuanen 20:5.

Uga adi sekalak si ikelengindu mate? Ula mehangke nuriken perasanndu. Ingetlah, Jesus pe ”tangis”. (Johanes 11:35; Pengerana 3:4) Cukup istirahat ras medem pe penting. (Pengerana 4:6) Alu bage, reh nukahna akap kena ngadapi situasi si sulit.

SI BANCI ILAKOKENNDU:

• Rusurlah turiken isi pusuhndu man keluarga. Emaka, paksa lit mara, keluarga pe banci ngerana man bandu alu bebas

• Turikenlah man kalak si deban si pernah ngadapi situasi si bage rupana

KAI NINA PUSTAKA SI BADIA: ”Teman tetap encidahken ate keleng, kai gunana sekalak senina adi labo ikut i bas nggejapken kiniseran?” (Kuan-kuanen 17:17) Teman-temanndu merhat nampati kam, tapi banci saja la ietehna kai si perlu ilakokenna. Ula kam mehangke mpebetehken man bana kai si iperlukenndu. (Kuan-kuanen 12:25) Janah, darami penampat rohani arah kalak si ngantusi Pustaka si Badia. Kalak e banci mereken bimbingen si erpalasken Pustaka si Badia guna nampati kam.​—Jakup 5:14.

Kam banci ipegegehi adi ratur ergaul ras kalak si nteguh kinitekenna ras si tek man janji-janji Dibata. Kam pe banci terapul alu mpebelin ukur kalak si deban si paksa merlukenca. Turikenlah kinitekenndu ras janji-janji Jahwe man kalak e. Isilah waktundu tep-tep wari alu nampati kalak si paksa susah, janah ula pedauh dirindu arah kalak si ngkelengi ras si mperdiateken kam.​—Kuan-kuanen 18:1; 1 Korinti 15:58.

SI BANCI ILAKOKENNDU:

• Cakapkenlah man temanndu janah aloken penampatna

• Alu terus terang, kataken kai situhuna si iperlukenndu