Jahwe, si Nepa keluarga mere tugas man orang tua guna mpebelin anak-anak. (Kolose 3:20) Selaku orang tua, kena arus ngajar anak kena gelah ngkelengi Jahwe ras jadi kalak si ertanggung jabap. (2 Timotius 1:5; 3:15) Kena pe arus mpelajari uga isi pusuh anak kena. Tentu, usihen si ibahan kena seh kal pentingna. Kena banci ngajarken Kata Dibata kempak anak-anak alu mehuli, adi Pedah Jahwe nggo lit i bas pusuh kena sekalak-sekalak.​—Masmur 40:8.

KAI NINA PUSTAKA SI BADIA: ”Arus metinggel, tapi ola minter ngerana.” (Jakup 1:19) Pasti kena senang adi anak-anak nuriken kai pe man kena. Emaka, anak-anak arus meteh maka kena nggit ngerana paksa ia perlu ngerana ras kena. Banlah keadan i rumah dem alu dame gelah kalak e mesukah nuriken isi pusuhna. (Jakup 3:18) Adi anak-anak erpengakap maka kena mis merawa ras nalahken, banci saja kalak e lanai nggit erterus terang man kena. Emaka, sabarlah nandangi anak-anak kena. Rusurlah cidahken maka kena tuhu-tuhu ngkelengi ia.​—Matius 3:17; 1 Korinti 8:1.

SI BANCI ILAKOKENNDU:

• Teruslah nggit megiken paksa ngerana ate anak-anakndu

• Rusurlah ngerana-ngerana ras anak kena, ula paksa lit masalahna saja

KAI NINA PUSTAKA SI BADIA: ”Perdiatekenlah pedah gelah jumpa si mehuli.” (Kuan-kuanen 16:20) Maun-maun, sekedar megiken kai si ikataken anak kena la bias guna banci ngatusi uga situhuna perasanna. Biasana anak-anak nggit ngelebih-lebihken ntah pe ngataken si la i bas ukurna. ”Dengkehken lebe ope denga njabap, adi la bage ibahanndu, bodoh dingen ihinandu kalak.” (Kuan-kuanen 18:13) Ula meter nembeh.​—Kuan-kuanen 19:11.

SI BANCI ILAKOKENNDU:

• Kai pe si ikataken anak kena, ula mis potong rananna ntah pe itanggapindu alu erlebihen

• Cubalah inget mulihi paksa umur kena bagi ia mbarenda, uga perasan kena ras kai si penting man kena paksa si e

KAI NINA PUSTAKA SI BADIA: ”O anakku, perdiatekenlah kai si ikataken nande bapandu man bandu.” (Kuan-kuanen 1:8) Jahwe mereken hak man orang tua guna ndalanken wewenang nandangi anakna. Kena arus ngajar anak kena gelah mehamat ras patuh man kena. (Epesus 6:1-3) Banci igejapken anak-anak adi la ’ersada ukur’ orang tuana. (1 Korinti 1:10) I bas sada waktu, adi la ersada arih kena, usahaken ula ban idah anak-anak. Enda banci ngkurangi kinihamatenna man kena selaku orang tua.

SI BANCI ILAKOKENNDU:

• Cakapken ras persada arih kena kerna cara ndisiplin anak kena

• Adi la seri pendapatndu ras teman geluhndu i bas cara ndidik anak, cubalah angkai uga cara rukur kena sekalak-sekalak

KAI NINA PUSTAKA SI BADIA: ”Ajarkenlah anak-anak uga kearusen nggeluh.” (Kuan-kuanen 22:6) Berhasil i bas ngajar anak la mesukah. Perlu irencanaken cara kena ndidik anak-anak, termasuk cara ndisiplin ia. (Masmur 127:4; Kuan-kuanen 29:17) Mereken disiplin la sekedar mere ukumen, tapi nampati anak ngangkai engkai maka aturen e iban. (Kuan-kuanen 28:7) Janah, ajari ia engkelengi Pedah Jahwe ras ngantusi prinsip-prinsipna. (Masmur 1:2) Alu bage, ia banci ngembangken pusuh peraten si mehuli.​—Heber 5:14.

SI BANCI ILAKOKENNDU:

• Pastiken anak kena ngenehen Jahwe selaku Pribadi si tuhu-tuhu lit janah banci itekina

• Sampati ia gelah banci meteh ras nilahi kerina si banci erbahan ceda lagu langkahna, bagi si lit i bas internet ras jejaring sosial. Ajarlah ia uga carana gelah la kena siding pemangsa seksual