Paksa kena mulai nggeluh ersada selaku perbulangen ras ndehara, erbage persoalen banci reh. Enda terjadi perban cara rukur, perasan, cara kena ipebelin la seri. Masalah pe banci reh arah pihak si deban bage pe arah hal-hal si la niarap.

Kita banci saja tergoda guna nadingken persoalen si lit, tapi Pustaka si Badia mere pedah gelah si adapi min persoalenta. (Matius 5:23, 24) Pasti igejapkenndu maka cara si mehulina guna ndungi persoalen kap alu ndalanken prinsip-prinsip Pustaka si Badia.

KAI NINA PUSTAKA SI BADIA: ”Lit . . . paksa ngerana.” (Pengerana 3:1, 6, 7) Kam arus nyediaken waktu guna mbahas persoalenna. Turiken perasan ras pendapatndu kerna persoalen e alu jujur. Teruslah ’turiken si tuhu-tuhu’ kempak teman geluhndu. (Epesus 4:25) Adi perasan negatif reh, lawanlah e gelah ula rubat. Jabapen si tenang dingen mehuli banci erban la surung rubat erkiteken cakap si sepele.​—Kuan-kuanen 15:4; 26:20.

Aminna pe la kam sada kata, tetaplah perbahanenndu mehuli alu terus ngkelengi ras nghamati teman geluhndu. (Kolose 4:6) Mislah dungi persoalenna, ras ula kam lanai siperkuanen.​—Epesus 4:26.

SI BANCI ILAKOKENNDU:

• Pilihlah waktu si cocok guna ncakapken persoalenna

• Adi gilirenndu si megiken, lawanlah perukuren guna motong ranan. Lit nge gilirenndu ngerana

KAI NINA PUSTAKA SI BADIA: ”Sikeleng-kelengenlah kam bagi si ersenina. Silebe-lebenlah kam i bas mpehaga teman.” (Roma 12:10) Carandu mbegiken seh kal pentingna. Cubalah angkai cara rukur teman geluhndu alu ’sepenggejapen . . . ras meteruk rukur’. (1 Petrus 3:8; Jakup 1:19) Ula pekulah-kulah saja mbegiken ia. Adi banci, pengadi kai si paksana idahikenndu janah bereken perhatin si bulat ukur kempak teman geluhndu. Ntah pe pindolah gelah kari icakapken. Adi iakapndu teman geluhndu sada tim labo imbang, labo mesukah kam megelut ntah pe ”pedas-pedassa das darehndu”.​—Pengerana 7:9.

SI BANCI ILAKOKENNDU:

• Terus begiken alu ukur si salang, sekali pe kai si ibegindu la atendu bage

• Cubalah angkai kai tujun ibalik kata-kata teman geluhndu. Perdiateken gerek ras nada sorana ngerana

KAI NINA PUSTAKA SI BADIA: ”Erdahinlah maka kam nggeluh, adi ngeranai janah kundul-kundul saja ngenca, musil me kam.” (Kuan-kuanen 14:23) Setuju nandangi jalan keluarna saja la bias. Kena perlu ndalanken kai si enggo iputusken kena duana. Enda pasti merluken melala upaya ras perjuangen, tapi si enda labo sia-sia. (Kuan-kuanen 10:4) Adi kena sisampat-sampaten selaku sada tim, asil upaya kena banci reh ulina.​—Pengerana 4:9.

SI BANCI ILAKOKENNDU:

• Putusken kai saja si perlu ilakoken kena sekalak-sekalak guna ndungi persoalenna

• Alu ratur, periksalah hasil si enggo dat kena