Kita kerina perlu sen guna nutupi keperlun keluargata. (Kuan-kuanen 30:8) Uga pa pe, ’duit banci mereken ketenangen’. (Pengerana 7:12) Perbulangen ras ndehara banci saja mesera iakapna ncakapken kerna keuangen, tapi ula sempat erkiteken sen turah persoalen i bas perjabun kena. (Epesus 4:32) Kena arus siteken janah sada arih i bas ngaturken cara make sen.

KAI NINA PUSTAKA SI BADIA: ”Adi lit sekalak i bas kam atena erban menara, tentu ibahanna lebe anggaren biaya guna meteh ntah cukup kin duitna ntah lang i bas ndungi menara e.” (Lukas 14:28) Penting erban rencana kerna cara kena nggunaken sen. (Amos 3:3) Putusken kai saja si perlu itukur ras asakai buena sen kena si banci ibelanjaken. (Kuan-kuanen 31:16) Ula erkiteken lit sen saja, mis tukuri kena barang si la perlu. Usahakenlah gelah ula rutang. Ula belanja ngelebihi sen si lit i bas kena.​—Kuan-kuanen 21:5; 22:7.

SI BANCI ILAKOKENNDU:

• Adi lit denga sen kena i bas akhir bulan, putusken ras-ras kuja iban sen e

• Adi sebalikna si terjadi, bahanlah anggaren si jelas guna ngurangi pengeluaren. Contohna, kena banci erdakan i rumah asangken nukur ntah pe man i darat

KAI NINA PUSTAKA SI BADIA: Seh kal pentingna, ’ndalanken si mehuli dingen bujur, labo saja ilebe-lebe Tuhan, tapi pe ilebe-lebe manusia’. (2 Korinti 8:21) Pebetehken man teman geluhndu alu terus terang asakai penghasilen ras pengeluarenndu.

Arihkenlah rusur man teman geluhndu ope denga erban keputusen si penting si lit hubungenna ras keuangen. (Kuan-kuanen 13:10) Si enda banci njaga perdamen i bas perjabun kena. Ingetlah maka penghasilenndu labo sekerajangenndu saja, tapi sekerajangen keluarga.​—1 Timotius 5:8.

SI BANCI ILAKOKENNDU:

• Arihken asakai buena si banci ibelanjaken kena sekalak-sekalak alu la perlu icakapken leben

• Mislah cakapken kerna keuangen kena, ula timai lit persoalen