Arah ogen enda, nggo ipelajarindu maka Pustaka si Badia risiken melala prinsip si erguna man bandu ras keluarganndu. Ate Jahwe gelah kena ermeriah ukur. Ia erjanji maka ”icukupiNa kai si perlu man bandu” adi ipelebe kena Ia. (Matius 6:33) Merhat kal Ia kena jadi temanNa. Gunaken tep-tep kesempaten gelah reh rembakna ras Dibata. Enda sada kehamaten si mbelinna man sekalak jelma.​—Matius 22:37, 38.

KAI NINA PUSTAKA SI BADIA: ”’Aku me jadi Bapandu, janah kam jadi anakKu si dilaki ras si diberu,’ bage me nina Tuhan si Mada Kuasa.” (2 Korinti 6:18) Ate Jahwe kam jadi temanNa si ndeher. Salah sada carana arah pertoton. Jahwe ngundang kam guna ’ertoto katawari pe’. (1 Tesalonika 5:17) IperdiatekenNa kal kai si iukurindu ras kearun atendu. (Pilipi 4:6) Paksa kam ertoto ras keluarga, banci idah keluargandu uga tangkasna Dibata e bas kam.

Selain ngerana ras Dibata, kam pe banci megiken Ia. Carana alu mpelajari KataNa ras ogen si erpalasken Pustaka si Badia. (Masmur 1:1, 2) Ukurilah alu mbages kai si ipelajarindu. (Masmur 77:12, 13) Cara si deban eme alu ratur reh ku perpulungen Kristen.​—Masmur 122:1-4.

Guna mpegegehi hubungenndu ras Jahwe, arus ka iturikenndu kerna Jahwe man kalak si deban. Reh rusurna kam ngelakoken e, reh rembakna kam ras Ia.​—Matius 28:19, 20.

SI BANCI ILAKOKENNDU:

• Banlah waktu tep-tep wari guna ngoge Pustaka si Badia ras ertoto

• Utamaken kegiaten rohani ras keluarga asangken hiburen ras rekreasi

KAI NINA PUSTAKA SI BADIA: ”Rembakkenlah dirindu ku Dibata, e maka Ia pe ngerembakken diriNa man bandu.” (Jakup 4:8) Perlu ijadwalkenndu kebaktin jabu si ratur janah ndalankenca. (Kejadin 18:19) Tapi, la bias e saja. Banndulah Dibata si negu-negu i bas kegeluhenndu tep-tep wari. Pegegehi hubungen keluargandu ras Dibata alu ngerana kerna Ia ”subuk kam i rumah, ntah sanga kam i bas perdalanen, subuk sanga kam ngadi-ngadi ntah pe sanga kam erdahin”. (Ulangen 6:6, 7) Ertekadlah guna ngusih Josua si ngataken, ”Aku ras isi jabungku, TUHAN [Jahwe] saja ngenca isembah kami.”​—Josua 24:15.

SI BANCI ILAKOKENNDU:

• Alu ratur, cakapkenlah keperlun ras persoalen tep-tep anggota keluarga i bas acara kebaktin jabu