Ketubuhen sekalak anak banci erban meriah kal ukur perbulangen ras ndehara, sekaligus maba kinilatihen si luar biasa. Selaku orang tua si mbaru, banci saja la iarap kena melala keri waktu ras gegeh kena guna ngurus anak. Perban kurang medem ras perubahen emosi, hubungen kena banci terganggu. Arus sesuaiken kena diri kena guna ngurus anak ras njaga keersadan perjabun. Uga pedah Pustaka si Badia banci nampati kena?

KAI NINA PUSTAKA SI BADIA: ”Kalak si erkeleng ate, ia arus megenggeng, mehuli.” Bage pe, kalak si erkeleng ate ”la ncariken untung man bana saja, la pergelut.” (1 Korinti 13:4, 5) Paksa mbaru denga jadi sekalak nande, biakna nge adi perhatinndu tertuju man anakndu. Tapi, banci saja perbulangenndu nggejapken maka ia la iperdiateken. Emaka, ula lupa adi ia pe perlu ndatken perhatinndu. Alu sabar dingen perkeleng banlah igejapna maka ia iperluken janah ikut muat bagin i bas ngurus anak kena.

”Perbulangen . . . nggeluhlah kam alu dem pengertin nandangi ndeharandu.” (1 Petrus 3:7) Perlu iangkaindu maka gundari buen gegeh ndeharandu iberekenna man anak kena. Ia ndat tanggung jabap si mbaru si banci saja erban ia stres, latih, ntah pe depresi. Maun-maun banci nembeh atena ngenehen kam. Tapi, tetaplah tenang, perban ”madin jadi kalak saber asangken erkuasa”. (Kuan-kuanen 16:32) Cidahken pengertin ras bereken dukungen si iperlukenna.​—Kuan-kuanen 14:29.

SI BANCI ILAKOKENNDU:

• Bapa: Sampatilah ndeharandu ngurus anak, amin gia bas berngi wari. Batasi waktu si ipakendu guna dahin si deban gelah mbue waktu si banci iberekendu man ndehara ras anakndu

• Nande: Aloken penampat perbulangenndu adi berena dirina guna ngurus anak kena. Aminna pe lenga ilakokenna alu mehuli, ajari ia alu sabar, ula tembehi

KAI NINA PUSTAKA SI BADIA: ”Duana enggo jadi sada.” (Kejadin 2:24) Aminna gia gundari lit anggota si mbaru i bas keluarga, ingetlah maka kam ras teman geluhndu tetap ”sada”. Usahaken gelah hubungen kena tetap nteguh.

Ndehara-ndehara, kataken bujur nandangi dukungen ras penampat perbulangen. Pengergan si icidahkenndu banci ”pepalemken”, ertina mpegegehi hubungen kena i bas situasi si mbaru enda. (Kuan-kuanen 12:18) Perbulangen-perbulangen, turiken man ndeharandu maka keleng dingen meherga kal akapndu ia. Puji ia i bas kinilatihenna ngurus keluarga.​—Kuan-kuanen 31:10, 28.

”Ola ise pe ngukuri untung man bana saja, tapi inget pe ngukuri untung kalak si deban.” (1 Korinti 10:24) Terus lakoken si mehulina man teman geluhndu. Selaku perbulangen ras ndehara, banlah waktu guna ngerana-ngerana, mereken pujin ras megiken sada ras si debanna. Ula mentingken bana i bas hubungen kena kerna ersada kula. Ukuri keperlun teman geluhndu. Pustaka si Badia ngatakenca, ”Ola tulak kerincuhenndu pekepar guna ersada kula, pala alu arih ersada.” (1 Korinti 7:3-5) Emaka, arihken kena duana kerna si e alu terus terang. Kesabaren ras pengertin banci mpegegehi hubungen kena.

SI BANCI ILAKOKENNDU:

• Ula lupa erban waktu guna erdua-dua saja

• Lakokenlah perbahanen-perbahanen kitik si erban teman geluhndu nggejapken maka keleng atendu ia, misalna mereken pujin ras hadiah

KAI NINA PUSTAKA SI BADIA: ”Kitik-kitikndu nari enggo ietehndu kerna Pustaka si Badia, si ngasup mereken kepentaren man bandu, e me si mabai kam ku keselamaten.” (2 Timotius 3:15) Rencanaken uga cara kena ngajari anak kena si kitik denga. Kiningasupen erlajar bayi seh kal hebatna. Kiningasupen enda nggo lit ope denga pe ia tubuh. Paksa i bas bertin denga, banci tandaina sora kena janah perasan kena banci mpegaruhi ia. Ogekenlah buku paksa ia kitik denga. Amin gia banci saja lenga iangkaina, enda banci nampati ia gelah merhat ngoge paksa ia nggo mbelin.

Ula akapndu ia kitiksa denga guna banci megiken pengajarenndu kerna Dibata. Iahken ia gelah ikut ertoto ras kena man Jahwe. (Ulangen 11:19) Janah pe paksa kena ras-ras main-main, turikenlah kerna tinepa Dibata. (Masmur 78:3, 4) Asum ia reh belinna, banci igejapkenna kekelengen kena nandangi Jahwe janah ia pe erlajar engkelengi Ia.

SI BANCI ILAKOKENNDU:

• Ertotolah mindo bimbingen guna ngajari anakndu si kitik denga

• Ulihi kata-kata ras pelajaren si penting gelah banci ia mulai erlajar kitik-kitik nari