Kenca erjabu, kena erban sada keluarga si mbaru. Kena pasti terus ngkelengi ras enghamati orang tua kena, tapi gundari teman geluh nggo jadi si pengtingna kal i bas geluh kena. Enda banci saja la mesukah ialoken orang tua kena. Tapi, prinsip Pustaka si Badia banci nampati kena njaga hubungen dame ras orang tua, ras turang ntah pe senina teman geluh kena, bage pe ras kade-kade si debanna, paksa kena erjuang mbagun rumah tangga si mbaru.

KAI NINA PUSTAKA SI BADIA: ”Pehagalah nande bapandu.” (Epesus 6:2) La soal enggo piga umurndu, kam arus terus enghamati ras ngergai orang tuandu. Teman geluhndu pe lit ka nge orang tuana si arus iperdiatekenna. ”Kalak si erkeleng ate la percian”, emaka ula pernah cian atendu nandangi hubungen teman geluhndu ras orang tuana.​—1 Korinti 13:4; Galatia 5:26.

SI BANCI ILAKOKENNDU:

• Ula belaskenndu kata-kata si bagenda, ”Keluargandu lalap megombang man bangku” ntah pe ”La pernah cocok iakap nandendu kai pe si kulakoken”

• Cubakenlah angkai situasina arah cara rukur teman geluhndu

KAI NINA PUSTAKA SI BADIA: ”Em sabapna dilaki nadingken nande bapana, gelah ersada ia ras ndeharana, maka duana nggo jadi sada.” (Kejadin 2:24) Paksa kam erjabu, banci saja orang tuandu erpengakap maka ia ertanggung jabap denga ngurus kam. Banci saja ikut campur ka atena i bas rumah tangga kena lebih asa patutna.

Kenalah si arus nentuken seh ja orang tua kena banci ikut campur. Kenca e, pebetehken man bana alu manjar-anjar. Kena banci terus terang alu la kasar. (Kuan-kuanen 15:1) Ukur meteruk, kelembuten, ras kesabaren, banci nampati kena gelah tetap meriah ras simetua kena janah ”ula pergelut sapih-sapih kam, erkiteken kekelengen”.​—Epesus 4:2.

SI BANCI ILAKOKENNDU:

• Adi akapndu orang tua kena nggo melalasa ikut campur i bas kegeluhen kena, cakapkenlah ras teman geluhndu paksa keadanna enggo tenang

• Persadalah arih kena i bas cara ngatasi masalah si bagenda