Ate Jahwe gelah kita setia. (Masmur 18:25, NW; Kuan-kuanen 5:15) Enda seh kal pentingna i bas perjabun perbahan adi la lit kesetian, kena la mungkin siteken. Janah, siteken e penting gelah kekelengen kena reh bagesna.

Gundari, melala pengaruh si la mehuli si erban perbulangen ras ndehara erserana setia sapih-sapih ia. Emaka, guna njaga perjabun, perlu usahakenndu ngelakoken dua hal enda.

KAI NINA PUSTAKA SI BADIA: ’Pilihlah apai si mehulina,’ ntah pe si pentingna. (Pilipi 1:10) Perjabunndu eme salah sada si pentingna kal i bas kegeluhenndu. Emaka, enda patut ipelebe.

Ate Jahwe gelah kam mperdiateken teman geluhndu janah ras-ras ngenanami kegeluhen si ermeriah ukur. (Pengerana 9:9) Alu tangkas ikatakenNa maka ula sekali pe la iperdiatekenndu teman geluhndu, kena duana perlu terus erupaya ndarami cara erban teman geluh kena ermeriah ukur. (1 Korinti 10:24) Bahanlah teman geluhndu nggejapken maka ia iperluken ras iergai.

SI BANCI ILAKOKENNDU:

• Pastiken gelah kena rusur erban waktu guna erdua-dua alu la lit si nimpangken perhatin

• Rukurlah menurut ”kita”, ula menurut ”aku”

KAI NINA PUSTAKA SI BADIA: ”Ise ngenehen sekalak diberu, jenari leket ukurna ras diberu e, si tuhuna ia nggo erlua-lua i bas ukurna.” (Matius 5:28) Adi sekalak jelma terus ngukuri hal-hal si amoral, ia banci ikataken lanai setia kempak teman geluhna.

Jahwe ngataken maka kam perlu ’njaga pusuhndu’. (Kuan-kuanen 4:23, NW; Jeremia 17:9) Guna si e, kam arus njaga matandu. (Matius 5:29, 30) Ikutkenlah usihen si itadingken Jop i bas Pustaka si Badia, si erban perpadanen i bas pusuhna gelah la pernah natap singuda-nguda alu mengga ate. (Jop 31:1) Bulatkenlah ukurndu gelah ula sekali pe ngenehen pornografi. Janah, ula erban hubungen ngena ate i bas bentuk kai pe janah ras ise pe si labo teman geluhndu.

SI BANCI ILAKOKENNDU:

• Cidahken alu jelas man kalak si deban maka kam tuhu-tuhu setia kempak teman geluhndu

• Ukuri perasan teman geluhndu, ras mis lah pengadi hubungen kai pe si banci nakiti perasanna